ସୋସିଆଲ ମିଡିଆରେ ସ୍ବତନ୍ତ୍ର ପରିଚୟ ସୃଷ୍ଟି କରିପାରିଥିବା ଶିଳ୍ପପତି ଆନନ୍ଦ ମହିନ୍ଦ୍ରା ପ୍ରାୟ ସମୟରେ ବିଭିନ୍ନ ପ୍ରକାରର ଆକର୍ଷଣୀୟ ଟୁଇଟ କରିଥାନ୍ତି। ନିକଟରେ ସେହିଭଳି କିଛି ସେ ଏକ ମଜାଦାର ଟୁଇଟ କରି ଚର୍ଚ୍ଚାର ପରିସରକୁ ଆସିଛନ୍ତି। ଗୁରୁବାର ଆନନ୍ଦ ମହିନ୍ଦ୍ରା ଏକ ଆକର୍ଷଣୀୟ ପର୍ଯ୍ୟଟନସ୍ଥଳୀର ଏକ ଫଟୋ ଶେୟାର କରିଛନ୍ତି। ଯେଉଁଥିରେ ଦେଶର ଶେଷ ଗାଁ, ଶେଷ ଢ଼ାବା ଏବଂ ଶେଷ କାଫେର ଫଟୋ ଦେଖିବାକୁ ମିଳିଛି। ଯାହା ସେଲଫି ନେବା ପାଇଁ ଏକ ସର୍ବୋତ୍ତମ ସ୍ଥାନ ବୋଲି କୁହାଯାଉଛି। ସୋସିଆଲ ମିଡ଼ିଆରେ ଏହି ଫଟୋ ଏବେ ଭାଇରାଲ ହେବାରେ ଲାଗିଛି। ଆଉ ଏହାକୁ ୟୁଜର୍ସମାନେ ବେଶ୍ ପସନ୍ଦ କରିବା ସହ ସକାରତ୍ମକ ପ୍ରତିକ୍ରିୟା ମଧ୍ୟ ଦେଉଛନ୍ତି। ସୂଚନାଯୋଗ୍ୟ,ଉତ୍ତରାଖଣ୍ଡ ଜିଲାର ଭାରତ-ଚାଇନା ସୀମାରେ ଥିବା ମାନା ଗ୍ରାମରେ ଏହି ଦୋକାନ ଅବସ୍ଥିତ। ଏହି ଦୋକାନକୁ ଚନ୍ଦର ସିଂହ ବଡଓ୍ବାଲ ନାମକ ଜଣେ ବ୍ୟକ୍ତି ପରିଚାଳନା କରୁଥିବା ଜଣାପଡ଼ିଛି। ଗତ ପ୍ରାୟ ୨୫ବର୍ଷ ପୂର୍ବରୁ ଚନ୍ଦର ସିଂହ ହେଉଛନ୍ତି ପ୍ରଥମ ବ୍ୟକ୍ତି ଯିଏ ଏଠାରେ ପ୍ରଥମେ ଚା’ ଦୋକାନ ଖୋଲିଥିଲେ। ଯାହାକୁ ଦେଶର ଶେଷ ଦୋକାନ ଭାବେ ବିବେଚନା କରାଯାଏ। ଆନନ୍ଦ ମହିନ୍ଦ୍ରା ଏହି ଚା’ ଦୋକାନର ଫଟୋ ଉଠାଇ ଟୁଇଟ କରିଛନ୍ତି। ଏଥିସହ କ୍ୟାପସନରେ ଲେଖିଛନ୍ତି, ‘ଦେଶର ଶେଷ ଦୋକାନ’। ଏହି ଚା’ ଦୋକାନର ପ୍ରଂଶସା କରିବା ସହ ଭାରତର ଶେଷ୍ଠ ସେଲ୍ଫି ପଏଣ୍ଟ ମଧ୍ୟରୁ ଏହା ଅନ୍ୟତମ ବୋଲି ସେ କହିଛନ୍ତି। ଏଥିସହ ସେ କହିଛନ୍ତି, ଏହି ସ୍ଥାନରେ ଗୋଟେ କପ୍ ଚା’ ପିଇବାର ମଜା କିଛି ନିଆରା। ଆନନ୍ଦ ମହିନ୍ଦ୍ରାଙ୍କ ଏହି ପୋଷ୍ଟ ପରେ ୟୁଜର୍ସମାନେ ମଧ୍ୟ ରିଟୁଇଟ କରି ସେମାନଙ୍କର ଫଟୋ ଶେୟାର କରିଥିବା ଦେଖିବାକୁ ମିଳିଛି।
