ନୂଆଦିଲ୍ଲୀ, ୧୦।୨ : ଭାରତୀୟ ରିଜର୍ଭ ବ୍ୟାଙ୍କ (ଆରବିଆଇ) ପକ୍ଷରୁ ଗୁରୁବାର ମୁଦ୍ରା ନୀତି ସମୀକ୍ଷାର ଫଳାଫଳ ପ୍ରକାଶିତ ହୋଇଛି। ଏଥିରେ ନୀତି ହାରରେକୌଣସି ପରିବର୍ତ୍ତନ କରାଯାଇନାହିଁ। ଏହା ଅନୁସାରେ ବର୍ତ୍ତମାନ ରେପୋ ରେଟ୍ ୪ ପ୍ରତିଶତରେ ଏବଂ ରିଭର୍ସ ରେପୋ ରେଟ୍ ୩.୩୫ ପ୍ରତିଶତରେ ରଖାଯାଇଛି।
ସେହିପରି ମାର୍ଜିନାଲ ଷ୍ଟାଣ୍ଡିଂ ଫାସିଲିଟି ହାର ୪.୨୫ ପ୍ରତିଶତ ଏବଂ ବ୍ୟାଙ୍କ ରେଟ୍ ୪.୨୫ ପ୍ରତିଶତରେ ସ୍ଥିର ରହିଛି। ମୁଦ୍ରା ନୀତି କମିଟି (ଏମପିସି)ର ୬ ଜଣ ସଦସ୍ୟଙ୍କ ମଧ୍ୟରୁ ୫ ଜଣ ସଦସ୍ୟ ସୁଧ ହାରରେ କୌଣସି ପରିବର୍ତ୍ତନ ସପକ୍ଷରେ ନ ଥିଲେ। ଆରବିଆଇ ଗଭର୍ନର ଶକ୍ତିକାନ୍ତ ଦାସ ଏହା ଘୋଷଣା କରିଛନ୍ତି। ମୁଦ୍ରା ନୀତି କମିଟି ପରାମର୍ଶ ଦେଇଥିଲା ଯେ ବିଦ୍ୟମାନ ନୀତି ବଜାୟ ରଖିବା ଆବଶ୍ୟକ ଯାହା ଦ୍ୱାରା ଅର୍ଥନୀତି ସ୍ବାଭାବିକ ହୋଇପାରିବ।
ଫଳରେ ଆର୍ବିଆଇ ମୁଦ୍ରାନୀତି ସମୀକ୍ଷାରେ ଲଗାତାର ୧୦ ଥର ପାଇଁ ନୀତିଗତ ହାରରେ କୌଣସି ପରିବର୍ତ୍ତନ କରାଯାଇ ନାହିଁ। ଇଏମ୍ଆଇ ଶସ୍ତା ହେବ ବୋଲି ଆଶା କରାଯାଉଥିଲା। ମାତ୍ର ମୁଦ୍ରାନୀତି ଅପରିବର୍ତ୍ତିତ ରହିବା ଯୋଗୁ ଲୋକ ନିରାଶ ହୋଇଛନ୍ତି।
ଆରବିଆଇ ଗଭର୍ନର କହିଛନ୍ତି ଯେ ୨୦୨୨-୨୩ରେ ଜିଡିପି ଅଭିବୃଦ୍ଧି ହାର ୭.୮ ପ୍ରତିଶତ ହୋଇପାରେ। ସେ କହିଛନ୍ତି ଆଇଏମ୍ଏଫ୍ ଅନୁସାରେ ଟିକାକରଣ ଏବଂ ଅନ୍ୟାନ୍ୟ ଆବଶ୍ୟକୀୟ ପଦକ୍ଷେପ ଯୋଗୁଁ ଭାରତ ଦ୍ରୁତ ଗତିରେ ବିକାଶ କରିବାର ଆଶା ରହିଛି।
ସେ କହିଛନ୍ତି ଯେ ବିଶ୍ୱ ବଜାରରେ କୋଭିଡ-୧୯ ମହାମାରୀ ଯୋଗୁ ବହୁ ଆହ୍ବାନ ସୃଷ୍ଟି ହୋଇଛି ଏବଂ ଭାରତ ମଧ୍ୟ ଏହାର ସମ୍ମୁଖୀନ ହୋଇଛି। ଏକ୍ଷେତ୍ରରେ ଆରବିଆଇ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବାକୁ ଚେଷ୍ଟା କରିଛି। ବର୍ତ୍ତମାନ ଭାରତ କରୋନା ସହିତ ମୁକାବିଲା କରିବା ପାଇଁ ଏକ ଭଲ ସ୍ଥିତିରେ ରହିଛି।
ଗତ କିଛି ମାସ ମଧ୍ୟରେ ମୁଦ୍ରାସ୍ଫୀତି ହାରର ବୃଦ୍ଧି ବେସ୍ କାରଣରୁ ସୃଷ୍ଟି ହୋଇଛି। ବହୁ ଦେଶରେ ମୁଦ୍ରାସ୍ଫୀତି ଅଧିକ ରହିଛି। ଏହାଯୋଗୁ ସାଧାରଣ ଲୋକେ ଦରଦାମ୍ ବୃଦ୍ଧି ଯୋଗୁ ହସ୍ତସନ୍ତ ହେବାରେ ଲାଗିଛନ୍ତି। ଯେଉଁଥିପାଇଁ ବିଭିନ୍ନ ଦେଶର କେନ୍ଦ୍ରୀୟ ବ୍ୟାଙ୍କଗୁଡ଼ିକ ସୁଧ ହାର ବଢ଼ାଉଛନ୍ତି।
ଫଳରେ ବିଶ୍ୱସ୍ତରରେ ଆର୍ଥିକ ସ୍ଥିତି ସଙ୍କଟରେ ରହିଛି। କେତେକ ମୂଳ କାରଣ ପାଇଁ ମୁଦ୍ରାସ୍ଫୀତି ହାରରେ ବୃଦ୍ଧି ଘଟିଛି। ତେବେ ଅଶୋଧିତ ତୈଳ ମୂଲ୍ୟରେ ବୃଦ୍ଧି ଚିନ୍ତାର କାରଣ ପାଲଟିଛି। ଯେଉଁଥିପାଇଁ ମୁଦ୍ରାସ୍ଫୀତି ବୃଦ୍ଧି ହେବାର ଆଶଙ୍କା ରହିଛି। ଅଶୋଧିତ ତୈଳ ଦର ବୃଦ୍ଧି ଉପରେ ନଜର ରଖିବା ଜରୁରୀ ବୋଲି ଆର୍ବିଆଇ ଗଭର୍ନର କହିଛନ୍ତି।
