ଭୁବନେଶ୍ୱର (ବ୍ୟୁରୋ)/ପୁରୁଣା ଭୁବନେଶ୍ୱର, ୧୩।୧(ଡି.ଏନ୍.ଏ.): ଭେଜାଲ ଖାଦ୍ୟ ସାମଗ୍ରୀ କାରଖାନା ଏବେ ସାରା ରାଜ୍ୟରେ କାୟା ବିସ୍ତାର କରିଚାଲିଛି। କେଉଁଠି ନକଲି ମସଲା ତ ଆଉ କେଉଁଠି ନକଲି ତେଲ କାରଖାନା ଠାବ କରାଯାଉଛି। ରାଜ୍ୟବାସୀ ଏବେ ଖାଦ୍ୟ ନାଁରେ ଜହର ଖାଇଚାଲିଛନ୍ତି। କିଛି ଅର୍ଥ ଲୋଭରେ କେତେଜଣ ଅସାମାଜିକ ବ୍ୟକ୍ତି ଲକ୍ଷ ଲକ୍ଷ ଲୋକଙ୍କୁ ମରଣ ମୁହଁକୁ ଠେଲି ଦେଉଛନ୍ତି। ରାସାୟନିକ ଦ୍ରବ୍ୟ ମିଶାଇ ପ୍ରସ୍ତୁତ କରାଯାଉଥିବା ଏହି ବିଷାକ୍ତ ଖାଦ୍ୟ ଖାଇବା ଦ୍ୱାରା ମଣିଷ ଅକାଳରେ ନିଜ ମରଣକୁ ଡାକିଆଣୁଛି। ଆମେ ଖାଉଥିବା ଖାଦ୍ୟ ହିଁ ଆମର ଖାଦକ ସାଜିଛି। କଟକ ପରେ ମଙ୍ଗଳବାର ଭୁବନେଶ୍ୱରସ୍ଥ ଏୟାରଫିଲ୍ଡ ଥାନା ଅଧୀନ ସୁନ୍ଦରପଦା ତ୍ରିଲୋଚନ ବିହାରରେ ଏକ ନକଲି ଘିଅ କାରଖାନା ଠାବ କରାଯାଇଛି। କାରଖାନା ମାଲିକ ଅଭିମନ୍ୟୁ ପୃଷ୍ଟିଙ୍କୁ ଅଟକ ରଖି ପୋଲିସ ପଚରାଉଚରା କରୁଛି। କାରଖାନାରୁ ବିପୁଳ ପରିମାଣର ନକଲି ଘିଅ, କେମିକାଲ୍, କଞ୍ଚାମାଲ ଓ ଯନ୍ତ୍ରପାତି ଜବତ କରାଯାଇଛି।
ଅଭିମନ୍ୟୁଙ୍କର ଏକ ତିନିମହଲା ଘରେ ଏହି ନକଲି ଘିଅ କାରଖାନା ଦୀର୍ଘଦିନ ଧରି ଚାଲିଥିଲା। କୌଣସି ସୂତ୍ରରୁ ଏହି ସୂଚନା ପାଇ ଏୟାରଫିଲ୍ଡ ଥାନା ପୋଲିସ ଓ କୁଇକ୍ ଆକ୍ସନ୍ ଟିମ୍ (କ୍ୟୁଏଟି) ମିଳିତ ଭାବେ ମଙ୍ଗଳବାର ଉକ୍ତ କାରଖାନାରେ ଚଢାଉ କରିଥିଲେ। ପାମୋଲିନ୍ ତେଲ, ବିଭିନ୍ନ ରାସାୟନିକ ଦ୍ରବ୍ୟ, ରାସାୟନିକ ରଙ୍ଗ, ବନସ୍ପତି ଓ ବାସ୍ନା ପାଇଁ ଅତର ମିଶାଯାଇ ନକଲି ଘିଅ ପ୍ରସ୍ତୁତ କରାଯାଉଥିଲା। ପ୍ୟାକେଟ୍ରେ ବଡ଼ ବଡ଼ ବ୍ରାଣ୍ଡର ଲୋଗୋ ଲଗାଯାଇ ଏହି ନକଲି ଘିଅ ବଜାରକୁ ପଠାଯାଉଥିଲା। ପୋଲିସ ଅଭିଯୁକ୍ତଙ୍କ ବିରୋଧରେ କେସ୍ ନ. ୧୮/୨୧ରେ ଆଇପିସି ଧାରା ୪୨୦/୪୬୮/୨୭୨/୨୭୩, ୭୮/୭୯ ଟ୍ରେଡ ଆଣ୍ଡ ମର୍ଚ୍ଚାଣ୍ଡାଇଜ୍ ଆକ୍ଟ ୧୯୫୮, ୧୦୧/୧୦୨/୧୦୩/୧୦୪ ଟ୍ରେଡ୍ ମାର୍କ ୧୯୯୯ରେ ମାମଲା ରୁଜୁ କରିଛି। ପ୍ୟାକ୍ ଉପରେ ପ୍ରସ୍ତୁତ ତାରିଖ, ବ୍ୟାଜ୍, ଓଜନ କିଛି ଉଲ୍ଲେଖ ନ ଥିଲା। ଖାଦ୍ୟ ଓ ସୁରକ୍ଷା ବିଭାଗ ପକ୍ଷରୁ ଘିଅ ନମୁନା ସଂଗ୍ରହ କରାଯାଇଥିବାବେଳେ ଏହା ଖାଦ୍ୟ ଉପଯୋଗୀ ନୁହେଁ ବୋଲି କୁହାଯାଇଛି। ଅଧିକ ପରୀକ୍ଷା ପାଇଁ ରାଜ୍ୟ ଖାଦ୍ୟ ନିରାପତ୍ତା ଲାବ୍କୁ ନମୁନା ପଠାଯାଇଛି।
