ବଲାଙ୍ଗୀର ଅଫିସ,୨୪ା୩: ବଲାଙ୍ଗୀର ଡାକମଣ୍ଡଳର ୮୩ ବ୍ରାଞ୍ଚ ପୋଷ୍ଟ ମାଷ୍ଟର, ଏବିପିଏମ ଓ ଡାକସେବକ ପଦବୀ ପାଇଁ ବିଜ୍ଞପ୍ତି ପ୍ରକାଶ ପାଇଥିଲା। ଏହି ପଦବୀ ପାଇଁ ବହୁ ପ୍ରାର୍ଥୀ ଆବେଦନ କରିଛନ୍ତି। ଶୁକ୍ରବାର ବଲାଙ୍ଗୀର ପ୍ରଧାନ ଡାକଘରରେ ଏହି ପଦବୀଗୁଡିକର ସାର୍ଟିଫିକେଟ୍ ଭେରିଫିକେଶ କରାଯାଇଥିଲା। ଭେରିଫିକେଶନ ସମୟରେ କେତେକ ପ୍ରାର୍ଥୀଙ୍କ ବିଭିନ୍ନ ସାର୍ଟିଫିକେଟ ଉତ୍ତର ପ୍ରଦେଶର ବିଭିନ୍ନ ଶିକ୍ଷାନୁଷ୍ଠାନର ହୋଇଥିବା ଜଣାପଡିଥିଲା। ଏପରିକି ବିଭିନ୍ନ ବିଷୟରେ ୯୯ ପ୍ରତିଶତ ପର୍ଯ୍ୟନ୍ତ ଅନେକ ପ୍ରାର୍ଥୀ ମାର୍କ ରଖିଥିବା ଦେଖାଯାଇଥଇଲା। ଏଭଳି ଦେଖିବା ପରେ ବଲାଙ୍ଗୀର ପ୍ରଧାନ ଡାକଘର ଅଧିକ୍ଷକ ରାଜେନ୍ଦ୍ର କୁମାର ପଟ୍ଟନାୟକ ସମ୍ପୃକ୍ତ ସାର୍ଟିଫିକେଟ୍ ନକଲି ସନ୍ଦେହ କରିଥିଲେ। ଭେରିଫିକେଶ ପାଇଁ ଆସିଥିବା ଦୁଇଜଣ ପ୍ରାର୍ଥୀଙ୍କୁ ସନ୍ଦେହ କରି କିଛି ଲେଖା ଲେଖିବା ପାଇଁ କହିଥିଲେ। ସେମାନଙ୍କ ମାର୍କଶିଟ୍ରେ ଇଂଲିଶରେ ୯୯ ମାର୍କ ଉଲ୍ଲେଖ ଥିବାବେଳେ ଇଂରାଜୀ ଶବ୍ଦ ଲେଖି ଜାଣି ନ ଥିବା ଏବଂ ଠିକ କରି କହିପାରୁ ନ ଥିବା ଦେଖିଥିଲେ। ଏହାପରେ ତାଙ୍କର ସନ୍ଦେହ ବଢ଼ିଥିଲା। ସମ୍ପୃକ୍ତ ସାର୍ଟିଫିକେଟରେ ଡ ଆମ୍ବେଦକର ଇଣ୍ଟର କଲେଜ, ପ୍ରେମନଗର ଝାନ୍ସି ଲେଖାଯାଇଛି। ସାର୍ଟିଫିକେଟରେ ବିଭିନ୍ନ ବିଷୟରେ ୯୦ରୁ ୯୯ ପ୍ରତିଶତ ରହିଥିବା ଦେଖାଯାଇଥିଲା। ଡାକଘର ପଦବୀରେ ମାର୍କସିଟ୍ ଦେଖାଯାଇଥାଏ। ଅଧିକ ମାର୍କ ରଖିଥିବା ପ୍ରାର୍ଥୀଙ୍କୁ ଚାକିରି ଦିଆଯାଏ। ତେବେ ଏଠାରେ ଡାକଘର ଅଧିକ୍ଷକ ଉତ୍ତର ପ୍ରଦେଶ ମାର୍କଶିଟ୍ ଓ ସାର୍ଟିଫିକେଟ ଦେଖି ସନ୍ଦେହ କରିଥିଲେ। ଏହାପରେ ସେ ଟାଉନ୍ ଥାନା ଯାଇ ଘଟଣା ବିଷୟରେ ଅଭିଯୋଗ କରିବା ସହ ଦୁଇଜଣ ଯୁବତୀ ପ୍ରାର୍ଥୀଙ୍କ ବିରୋଧରେ କହିଥିଲେ। ତେବେ ବଲାଙ୍ଗୀର ଟାଉନ୍ ଥାନା ପକ୍ଷରୁ ଅଭିଯୋଗ ପାଇବା ପରେ ମାମଲା ରୁଜୁ କରା ନ ଯାଇ ଏକ ଷ୍ଟେସନ୍ ଡାଇରୀ କରାଯାଇଛି। ସନ୍ଦେହ ହେଉଥିବା ଉକ୍ତ ସାର୍ଟିଫିକେଟଗୁଡିକ ପ୍ରକୃତରେ ନକଲି କି ନାହିଁ ପ୍ରଥମେ ଯାଞ୍ଚ ହେବା କଥା। ଯାଞ୍ଚ ପାଇଁ ବିଧିବଦ୍ଧ ଭାବେ ସମ୍ପୃକ୍ତ ଶିକ୍ଷାନୁଷ୍ଠାନ ଗୁଡିକୁ ପଠାଯିବା କଥା। ଏହା ନକରି କିଭଳି ଭାବେ ଏହା ନକଲି ବୋଲି କୁହାଯାଇ ପାରିବ ବୋଲି ପୋଲିସ ପକ୍ଷରୁ ପ୍ରଶ୍ନ କରାଯାଇଛି। ବର୍ତ୍ତମାନ ଷ୍ଟେଶନ୍ ଡାଇରୀ କରାଯାଇଛି ଏବଂ ଯାଞ୍ଚ ପରେ ନକଲି ବୋଲି ସମ୍ପୃକ୍ତ ବୋର୍ଡ ଲିଖିତ ଜଣାଇବା ପରେ ଅଭିଯୁକ୍ତଙ୍କ ବିରୋଧରେ ମାମଲା ରୁଜୁ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଏସ୍ଡିପିଓ ତୋଫାନ ବାଗ ସୂଚନା ଦେଇଛନ୍ତି।
