ଭୁବନେଶ୍ୱର,୭।୭(ବନ୍ଦନା ସେଠୀ): ସରକାରୀ ଖାତାକୁ ଫେରିଲା ୮ ଏକର ୧୪୦ ଡିସିମିଲ ଜମି। କଳାରାହାଙ୍ଗ ମୌଜାର ସରକାରୀ ଖାତା ନମ୍ବର ୭୬୬ର ପ୍ଲଟ ନମ୍ବର ୨୯୪ ଓ ୨୯୫ରେ ଦୀର୍ଘଦିନ ଧରି ବେଆଇନ ଜବରଦଖଲ ହୋଇଥିଲା। ଭୁବନେଶ୍ୱର ତହସିଲଦାରଙ୍କ ରିକ୍ୟୁଜିଶନ କ୍ରମେ ବିଡିଏ ସମ୍ପୃକ୍ତ ଜବରଦଖଲକାରୀଙ୍କୁ ହଟାଇଥିଲା। ଏଥିରେ ୧୫ଟି ଆଜବେଷ୍ଟସ ଘର, ୩ଟି ଟିଣ ଶେଡ୍, ଗୋଟିଏ ଗୁହାଳ, ଗୋଟିଏ ଗେଟ୍, ୩ଶହ ଫୁଟ ଲମ୍ବର ପାଚେରି, ଗୋଟିଏ ଅର୍ଦ୍ଧନିର୍ମିତ ଘର ଏବଂ ଗୋଟିଏ ପୂଜାମଣ୍ଡପକୁ ଉଚ୍ଛେଦ କରାଯାଇଥିଲା। ପ୍ଲଟ ନମ୍ବର ୨୯୪ରେ ୨ ଏକର ୫୪୦ ଡିସିମିଲ ଓ ପ୍ଲଟ୍ ନମ୍ବର ୨୯୭ରେ ୫ ଏକର ୬୦୦ ଡିସିମିଲ ଜମିକୁ ବିଡିଏ ଜବଦଖଲ ମୁକ୍ତ କରିଛି। ଆଇଶୃଙ୍ଖଳା ପରିସ୍ଥିତି ପାଇଁ ଏକ ପ୍ଲାଟୁନ ରିଜର୍ଭ ପୋଲିସ ଏବଂ ଗୋଟିଏ ସେକ୍ସନ ମହିଳା ପୋଲିସ ମୁତୟନ କରାଯାଇଥିଲା। ଉଚ୍ଛେଦବେଳେ ବିଡିଏ ଯୁଗ୍ମ କମିଶନର (ଏନ୍ଫୋର୍ସମେଣ୍ଟ) ଶ୍ୱେତ କୁମାର ଦାଶ, ବିଡିଏ ଲିଆସନ ଅଫିସର ଶୁଭ୍ରାଂଶୁ ଶେଖର ମହାନ୍ତି, ଭୁବନେଶ୍ୱର ଅତିରିକ୍ତ ତହସିଲଦାର, ଇନ୍ଫୋସିଟି ଥାନା ଆଇଆଇସି ଉପସ୍ଥିତ ଥିଲେ। ସେହିପରି ଚନ୍ଦ୍ରଶେଖରପୁର ମୌଜା ଅନ୍ତର୍ଗତ ହାଉସିଂ ବୋର୍ଡ କଲୋନୀରେ ଥିବା ସରକାରୀ ଜମିରୁ ଜବରଦଖଲ ଉଚ୍ଛେଦ କରାଯାଇଛି। ସମ୍ପୃକ୍ତ ସ୍ଥାନରେ ବିଏମ୍ସି ୱାର୍ଡ ଅଫିସ ପାଇଁ ଏହି ଉଚ୍ଛେଦ ହୋଇଥିଲା। ଏଥିରେ ୩ଟି ଆଜବେଷ୍ଟସ ଘର, ଗୋଟିଏ କବାଡ଼ିଆ ଦୋକାନ, ୨ଟି କ୍ୟାବିନ ଏବଂ ୨ଟି ଉଠାଦୋକାନ ଭଙ୍ଗାଯାଇଥିଲା। ପ୍ରାୟ ୮୦୦୦ ବର୍ଗ ଫୁଟ ଜମିକୁ ଜବରଦଖଲ ମୁକ୍ତ କରାଯାଇଛି।
