ଖୋର୍ଦ୍ଧା ଅଫିସ,୬ା୩: ଟାଙ୍ଗୀ ଥାନା ଭୂଷଣ୍ଡପୁର ଜେଟିରେ ଦୋଳ ଉତ୍ସବ ପାଇଁ ସୋମବାର ବାଣ ଭିଡ଼ିବା ସମୟରେ ବିସ୍ଫୋରଣ ଘଟି ୪ ଜଣଙ୍କ ମୃତ୍ୟୁ ଘଟିଥିବା ବେଳେ ୩ ଜଣ ଗୁରୁତର ହୋଇଛନ୍ତି। ଆହତଙ୍କୁ ଟାଙ୍ଗୀ ପରେ ଭୁବନେଶ୍ବର ମେଡିକାଲକୁ ସ୍ଥାନାନ୍ତର କରାଯାଇଛି। ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି।
ରାତି ପାହିଲେ ଦୋଳ ଉତ୍ସବ। ଏଥିଲାଗି କୈବର୍ତ୍ତମାନଙ୍କ ପକ୍ଷରୁ ବାଣ ପଟୁଆର ପାଇଁ ଭିଡ଼ା ଚାଲିଥିଲା। ଆଜି ପୂର୍ବାହ୍ନରେ ହଠାତ୍ ବିସ୍ଫୋରଣ ହୋଇଥିଲା। ଭୟଙ୍କର ଶବ୍ଦ ସହ ନିଆଁ ଉଗ୍ରରୂପ ଧାରଣ କରିଥିଲା। ଏହି ସମୟରେ ସେଠାରେ ବାଣ, ବାରଦ ଜଳି ବିସ୍ଫୋରକ ରୂପ ନେଇଥିଲା। ଘଟଣାସ୍ଥଳରେ ୪ ଜଣ ଜଳି ଯାଇଥିବା ବେଳେ ୩ ଗୁରୁତର ହୋଇଥିଲେ। ସ୍ଥାନୀୟ ଲୋକେ ପହଞ୍ଚି ଆହତଙ୍କୁ ଉଦ୍ଧାର କରି ଟାଙ୍ଗୀ ମେଡିକାଲ ନେଇଥିଲେ। ସେଠାରୁ ଗୁରୁତର ଅବସ୍ଥାରେ ଭୁବନେଶ୍ୱର ସ୍ଥାନାନ୍ତର କରାଯାଇଛି। ଖବରପାଇ ଅଗ୍ନିଶମ କର୍ମଚାରୀ ପହଞ୍ଚି ନିଆଁକୁ ଆୟତ୍ତ କରିଛନ୍ତି।
ଘଟଣାସ୍ଥଳରେ ଜିଲାପାଳ କେ.ସୁଦର୍ଶନ ଚକ୍ରବର୍ତ୍ତୀ, ଏସ୍ପି ସିଦ୍ଧାର୍ଥ କଟ୍ଟାରିଆ, ଏସ୍ଡିପିଓ ମାନସ ରଞ୍ଜନ ବାରିକ ପ୍ରମୁଖ ଉପସ୍ଥିତ ଅଛନ୍ତି। ଦୁଇଟି ଅଗ୍ନିଶମ ଗାଡ଼ି ଲାଗିଛି। ନିଆଁର ପ୍ରକୋପ ବଢୁଛି। ମୃତାହତ ସଂଖ୍ୟା ବଢ଼ିପାରେ ବୋଲି ଆଶଙ୍କା କରାଯାଉଛି। ଆହତମାନେ ହେଲେ ମହେଶ୍ବର ବେହେରା, ସୁଦର୍ଶନ ବେହେରା ଓ ଦୋଳଗୋବିନ୍ଦ ବେହେରା।
