ଦ କୋଡେକ୍ସ ଲିସେଷ୍ଟର: ଲିଓ ନାର୍ଡୋ ଦା ଭିନ୍ସିଙ୍କ ଦ୍ୱାରା ରଚିତ ଏହି ପୁସ୍ତକ ପୃଥିବୀର ସବୁଠାରୁ ପ୍ରସିଦ୍ଧ ସାଇଣ୍ଟିଫିକ୍ ଜର୍ନଲ ଅଟେ। ଏହା ‘କୋଡେକ୍ସ ହାମର୍’ ନାମରେ ବି ପରିଚିତ। ଏଥିରେ ୭୨ ପୃଷ୍ଠା ଅଛି। ଏହା ଲିଓନାର୍ଡୋ ଦା ଭିନ୍ସିଙ୍କର ହସ୍ତଲିଖିତ ପାଣ୍ଡୁଲିପି ଅଟେ। ଜୀବାଶ୍ମଠାରୁ ଆରମ୍ଭ କରି ପାଣିର ଗତି, ଚନ୍ଦ୍ରମାର ଔଜ୍ଜଲ୍ୟତା ପର୍ଯ୍ୟନ୍ତ ଏଥିରେ ବର୍ଣ୍ଣିତ। ପ୍ରଥମେ ଏହି ପାଣ୍ଡୁଲିପିକୁ ୧୭୧୭ରେ ଥମାସ୍ କୁକ୍ କିଣିଥିଲେ, ଯେକି ପରବର୍ତ୍ତୀ ସମୟରେ ଅର୍ଲ ଅଫ୍ ଲିସେଷ୍ଟର ହୋଇଥିଲେ। ତେଣୁ ପରେ ତାଙ୍କ ପଦବୀ ଅନୁସାରେ ଏହି ବହିର ନାମ କୋଡେକ୍ସ ଲିସେଷ୍ଟର ରଖାଯାଇଥିଲା। ବର୍ତ୍ତମାନ ଏହି ପୁସ୍ତକ ପୃଥିବୀର ସବୁଠାରୁ ଧନୀ ବ୍ୟକ୍ତି ବିଲ୍ ଗେଟ୍ସଙ୍କ ପାଖରେ ଅଛି। ୧୯୯୪ରେ କ୍ରିଷ୍ଟିସ୍ ଅକ୍ସନ ହାଉସ୍ରୁ ସେ ଏହାକୁ ୩୦ ମିଲିୟନ ବା ୨୦୦ କୋଟିରୁ ଉର୍ଦ୍ଧ୍ୱରେ କିଣି ଓ୍ବାର୍ଲଡ ରେକର୍ଡ କରିଥିଲେ।
ମ୍ୟାଗ୍ନା କାର୍ଟା: ଇଂଲଣ୍ଡର ରାଜା ଜନ୍ ଓ ଷ୍ଟିଫେନ୍ ଲାଙ୍ଗଟନ୍ ଏହି ପୁସ୍ତକକୁ ୧୨୯୭ରେ ରଚନା କରିଥିଲେ। ପରେ ଏହାକୁ ଆମେରିକାର ରସ୍ ପେରୋ ଓ ତା’ପରେ ଏହାକୁ କାର୍ଲାଇଲ୍ ଗ୍ରୁପ୍ର କୋ-ଫାଉଣ୍ଡର ଡେଭିଡ ରୁବେନ୍ଷ୍ଟିନ୍ କିଣିଥିଲେ। ଉକ୍ତ ପୁସ୍ତକର ମୂଲ୍ୟ ୨୪.୫ ମିଲିୟନ ଡଲାର।
ସେଣ୍ଟ କଥବର୍ଟ ଗୋସ୍ପେଲ: ଏହାର ଲେଖକ ସମ୍ପର୍କରେ ବିଶେଷ କିଛି ଜଣା ନ ଥିଲେ ହେଁ ଲାଟିନ୍ ଭାଷାରେ ଲିଖିତ ଉକ୍ତ ପୁସ୍ତକ ଅଷ୍ଟମ ଶତାବ୍ଦିର ବୋଲି କୁହାଯାଏ। ସେଣ୍ଟ ଜନ୍ଙ୍କ ଶାସ୍ତ୍ରର ଏହା ଏକ ଛୋଟିଆ କପି। ଏହାର କଭର୍ କାଠ ବୋର୍ଡରେ ତିଆରି, ଯାହାକି ରେଡ୍ ଗୋଟ ସ୍କିନ୍ କଭର୍ ହୋଇଛି। ଜେସୁଇଟ୍ସ୍(ସୋସାଇଟି ଅଫ୍ ଜେସସ୍) ଏହାକୁ ବ୍ରିଟିଶ ଲାଇବ୍ରେରୀକୁ ବିକ୍ରି କରି ଦେଇଥିଲେ। ଏହାର ମୂଲ୍ୟ ୧୫.୧ ମିଲିୟନ ଡଲାର।
ବେ ସାଲ୍ମ ବୁକ୍: ଏହାକୁ ବ୍ରିଟିଶ ନର୍ଥ ଆମେରିକାର ପ୍ରଥମ ଛପା ପୁସ୍ତକ ଭାବେ ଗଣନା କରାଯାଏ। ୧୬୪୦ରେ ମାସାଚୁସେଟ୍ସସ୍ଥ ଷ୍ଟିଫେନ୍ ଡେ’ ପ୍ରେସ୍ରେ ଏହାକୁ ଛପା ଯାଇଥିଲା। ଏହି ପୁସ୍ତକଟିର ଲେଖକ କିଏ ଜଣା ନାହିଁ। ଏହାର ପ୍ରଥମ ସଂସ୍କରଣର ଏକ ମାତ୍ର ସଂରକ୍ଷିତ କପି ୨୦୧୩ରେ ୧୪.୧ ମିଲିୟନ ଡଲାରରେ ନିଲାମ ହୋଇଥିଲା।
ଦ ଗୋସ୍ପେଲ ଅଫ୍ ହେନରୀ ଦ ଲାୟନ୍ : ରୋମ ସଂସ୍କୃତି ଉପରେ ରଚିତ ଉକ୍ତ ପୁସ୍ତକକୁ ସେଣ୍ଟ ବେନେଡିକ୍ଟ ୧୧୭୪ରେ ରଚନା କରିଥିଲେ। ଏହି ପୁସ୍ତକକୁ ୧୯୮୩ ମସିହାରେ ଜର୍ମାନୀର ସରକାର କିଣିନେଇଥିଲା। ୫୦ ପୃଷ୍ଠା ସମ୍ବଳିତ ଉକ୍ତ ପୁସ୍ତକର ମୂଲ୍ୟ ୧୧.୭ ମିଲିୟନ ଡଲାର।
ଦ କ୍ୟାଣ୍ଟରବରୀ ଟେଲ୍ସ: ‘ଇଂରାଜୀ ଭାଷା ସାହିତ୍ୟ’ ଓ ‘ଇଂରାଜୀ କବିତା’ର ଜନକଭାବେ ପରିଚିତ ଜେଓଫ୍ରେ ଚାଉସର୍ଙ୍କର ଏହା ଏକ ଗଳ୍ପ ପୁସ୍ତକ। ଏଥିରେ ୨୪ଟି ଗଳ୍ପ ରହିଛି। ଜେଓଫ୍ରେ ଚାଉସର୍ଙ୍କର ଏହା ହେଉଛି ସବୁଠାରୁ ଚର୍ଚ୍ଚିତ ପୁସ୍ତକ। ମିଡିଲ ଇଂଲିଶରେ ରଚିତ ଏହି ପୁସ୍ତକ ୧୯୯୮ରେ କ୍ରିଷ୍ଟିସ୍ ଅକ୍ସନରେ ୭.୫ ମିଲିୟନ ଡଲାରରେ ନିଲାମ ହୋଇଥିଲା।
ଫର୍ଷ୍ଟ ଫୋଲିଓ: ଇଂରାଜୀ ସାହିତ୍ୟର ମହାନ୍ ନାଟକକାର ଓ୍ବିଲିୟମ ସେକ୍ସପିୟରଙ୍କ ଦ୍ୱାରା ରଚିତ ଉକ୍ତ ପୁସ୍ତକର ମୂଳ କପି ୨୦୦୧ରେ ନ୍ୟୁୟର୍କରେ ନିଲାମ ହୋଇଥିଲା। ମାଇକ୍ରୋସଫ୍ଟ କମ୍ପାନୀର ସହ ସଂସ୍ଥାପକ ପଲ୍ ଏଲେନ୍ ଏହାକୁ ୨ ମିଲିୟନ ଡଲାରରେ କିଣିଥିଲେ।
