ନୂଆଦିଲ୍ଲୀ,୬।୭: ଦିଲ୍ଲୀ ମଦ ଦୁର୍ନୀତି ମାମଲାରେ ଅଭିଯୁକ୍ତ ଦିଲ୍ଲୀର ପୂର୍ବତନ ଉପମୁଖ୍ୟମନ୍ତ୍ରୀ ମନୀଷ ସିସୋଡିଆ ସୁପ୍ରିମକୋର୍ଟରେ ଜାମିନ ଆବେଦନ କରିଛନ୍ତି। ସିସୋଡିଆ ଉଭୟ ସିବିଆଇ ଏବଂ ଇଡି ମାମଲାରେ ସୁପ୍ରିମକୋର୍ଟରେ ଜାମିନ ପାଇଁ ଆବେଦନ କରିଛନ୍ତି। ଉଭୟ ମାମଲାରେ ଜାମିନ ପ୍ରଦାନ କରିବାକୁ ଦିଲ୍ଲୀ ହାଇକୋର୍ଟ ମନା କରିଦେଇଥିଲେ। ସିବିଆଇ ମାମଲାରେ ସିସୋଡିଆଙ୍କ ଜାମିନ ଆବେଦନକୁ ହାଇକୋର୍ଟ ମେ ୩୦ରେ ପ୍ରତ୍ୟାଖ୍ୟାନ କରିଥିବାବେଳେ ଇଡି ମାମଲାରେ ଜାମିନ ଆବେଦନକୁ ଜୁଲାଇ ୩ରେ ଦିଲ୍ଲୀ ହାଇକୋର୍ଟ ପ୍ରତ୍ୟାଖ୍ୟାନ କରିଥିଲେ। ଜାମିନ ଆବେଦନକୁ ପ୍ରତ୍ୟାଖ୍ୟାନ କରି କୋର୍ଟ କହିଛନ୍ତି,ମନୀଷ ସିସୋଡିଆ ଦିଲ୍ଲୀ ସରକାରରେ ଏକ ପ୍ରଭାବଶାଳୀ ପଦବୀରେ ଥିଲେ। ଏଭଳି ପରିସ୍ଥିତିରେ ଜାମିନ ପାଇବାରେ ସାକ୍ଷୀଙ୍କୁ ପ୍ରଭାବିତ କରିବାର ସମ୍ଭାବନାକୁ ଏଡ଼ାଇ ଦିଆଯାଇପାରିବ ନାହିଁ।
ଦିଲ୍ଲୀର ପୂର୍ବତନ ଉପମୁଖ୍ୟମନ୍ତ୍ରୀ ତଥା ଶିକ୍ଷା ମନ୍ତ୍ରୀ ମନୀଷ ସିସୋଡିଆ ମଦ ଦୁର୍ନୀତି ମାମଲାରେ ସିବିଆଇ ଏବଂ ଇଡି ଯାଞ୍ଚର ସମ୍ମୁଖୀନ ହୋଇଛନ୍ତି। ୨୬ ଫେବୃଆରୀରୁ ସିସୋଡିଆ ଜେଲରେ ଅଛନ୍ତି। ନିକଟରେ ସେ ୧୦୩ ଦିନ ପରେ ସ୍ତ୍ରୀ ସୀମା ସିସୋଡିଆଙ୍କୁ ଭେଟିଥିଲେ।
