ପାରଳାଖେମୁଣ୍ଡି,୧୨ା୮(ଡି.ଏନ୍.ଏ.): ଗଜପତି ଜିଲା ପାରଳାଖେମୁଣ୍ଡି ସହକାରୀ ବନ ସଂରକ୍ଷକ(ଏସିଏଫ୍) ସୌମ୍ୟରଞ୍ଜନ ମହାପାତ୍ରଙ୍କ ମୃତ୍ୟୁ ଘଟଣାକୁ ଶୁକ୍ରବାର ମାସେ ପୂରିବ। ହେଲେ ଏ ଯାଏ ପୋଲିସ ସୌମ୍ୟଙ୍କ ଦେହରେ କିଭଳି ନିଆଁ ଲାଗିଲା ତାହା ସ୍ପଷ୍ଟ କରିପାରି ନାହିଁ। ଅନ୍ୟପକ୍ଷେ ନ୍ୟାୟ ପାଇଁ ସୌମ୍ୟଙ୍କ ପରିବାର ଲୋକେ ଚାହିଁ ରହିଛନ୍ତି। ଘଟଣାର ତଦନ୍ତ ପାଇଁ ପୋଲିସ ସୌମ୍ୟଙ୍କ ଘର ବାଲେଶ୍ୱର ଜିଲା ଖଇରା, ଶ୍ୱଶୁର ଘର ମୟୂରଭଞ୍ଜ ଜିଲା କପ୍ତିପଦା ଓ ସ୍ତ୍ରୀ ବିଦ୍ୟାଭାରତୀ ପଢୁଥିବା ବଲାଙ୍ଗୀର ଜିଲାକୁ ଯାଇ ତଦନ୍ତ କରିଛି। ଏପର କି ପାରଳାଖେମୁଣ୍ଡି ଡିଏଫଓଙ୍କୁ ମଧ୍ୟ ପଚରାଉଚୁରା କରିଛି। ଏସବୁ ସତ୍ତ୍ୱେ ପୋଲିସ ସୌମ୍ୟଙ୍କ ମୃତ୍ୟୁର କାରଣ ସ୍ପଷ୍ଟ କରି ନ ଥିବାରୁ ତଦନ୍ତକୁ ନେଇ ସୌମ୍ୟଙ୍କ ପରିବାର ପ୍ରଶ୍ନ ଉଠାଇଛନ୍ତି ।
ସୌମ୍ୟଙ୍କ ମୃତ୍ୟୁ ସମୟରେ ଗଜପତି ଏସ୍ପି ଥିବା ତପନ କୁମାର ପଟ୍ଟନାୟକ ଗତମାସରେ ଅବସର ଗ୍ରହଣ କରିଛନ୍ତି। ବର୍ତ୍ତମାନ ଏସ୍ପିଙ୍କ ଦ୍ୱାୟିତ୍ୱରେ ଥିବା ବାମଦେବ ସିଂ ସୌମ୍ୟଙ୍କ ମୃତ୍ୟୁ ଘଟଣାର ତଦନ୍ତ କରୁଛନ୍ତି। ଟେକ୍ନିକାଲ ରିପୋର୍ଟ ଆସିନାହିଁ। ରିପୋର୍ଟ ଆସିବା ପରେ ତଦନ୍ତ ଆଗକୁ ବଢ଼ିବ ବୋଲି ସେ କହିଛନ୍ତି।
ସୂଚନାଯୋଗ୍ୟ, ଜୁଲାଇ ୧୨ ତାରିଖ ରାତିରେ ସ୍ତ୍ରୀଙ୍କ ସହ ଥିବା ବେଳେ ପୋଡ଼ି ଯାଇଥିଲେ ସୌମ୍ୟ। ତାଙ୍କୁ ପ୍ରଥମେ ପାରଳାଖେମୁଣ୍ଡି ମୁଖ୍ୟ ଚିକିତ୍ସାଳୟ ପରେ ବ୍ରହ୍ମପୁର ବଡ଼ ମେଡିକାଲ ନିଆଯାଇଥିଲା। ଅବସ୍ଥା ଗୁରୁତର ହେବାରୁ ତାଙ୍କୁ କଟକର ଏକ ଘରୋଇ ହସ୍ପିଟାଲକୁ ନିଆଯାଇଥିଲା। ହେଲେ ୧୩ ତାରିଖରେ ସୌମ୍ୟଙ୍କ ମୃତ୍ୟୁ ଘଟିଥିଲା। ସୌମ୍ୟଙ୍କୁ ଯୋଜନାବଦ୍ଧ ଭାବେ ପୋଡ଼ି ମାରି ଦିଆଯାଇଥିବା ପରିବାର ଲୋକେ ଅଭିଯୋଗ କରିଥିଲେ। ଘଟଣା ପରେ ପୋଲିସ, ସାଇଣ୍ଟିଫିକ୍ ତଦନ୍ତ କରିଛି। ଏପରିକି କ୍ରାଇମ୍ବ୍ରାଞ୍ଚ ଟିମ ମଧ୍ୟ ପାରଳାଖେମୁଣ୍ଡିକୁ ଯାଇ ପୋଲିସକୁ ତଦନ୍ତରେ ସହଯୋଗ କରିଛି। ୩୦ ଦିନ ଭିତରେ ବିଦ୍ୟାଭାରତୀଙ୍କୁ ତାଙ୍କ ବାଘଘରେ ପୋଲିସ ୨ ଥର ଜେରା କରିଛି। ତାଙ୍କ ସହ ମାମଲାରେ ପକ୍ଷଭୁକ୍ତ ଥିବା ଗଜପତି ଡିଏଫଓ, ରୋଷେୟା ଓ ଗୁରାଣ୍ଡି ଥାନା ଆଇଆଇସି, ବଲାଙ୍ଗୀର ଯାଇଥିବା କାର୍ ଡ୍ରାଇଭରଙ୍କୁ ବି ଜେରା ହୋଇସାରିଛି। ତଥାପି ମୃତ୍ୟୁ ରହସ୍ୟ ଉପରୁ ପରଦା ହଟିପାରି ନାହିଁ।
