ଥୁଆମୂଳ ରାମପୁର,୧୧।୮(ଦୁର୍ଗା କୀର୍ତ୍ତି): କଳାହାଣ୍ଡି ଜିଲା ଥୁଆମୂଳ ରାମପୁର ବ୍ଲକ୍ ଅନ୍ତର୍ଗତ ପାଡେପଦର ଗ୍ରାମପଞ୍ଚାୟତର ଦୁରେଶପଦର ଶିବମନ୍ଦିର ଛକଠାରୁ ଡୁମୁଲି ନାଳ ପର୍ଯ୍ୟନ୍ତ ଯାଇଥିବା ମୁଖ୍ୟ ରାସ୍ତାଟି ସମ୍ପୂର୍ଣ୍ଣ ବିପର୍ଯ୍ୟସ୍ତ ହୋଇପଡ଼ିଛି। ଆଣ୍ଠୁଏ କାଦୁଅ ଓ ଖାଲଖମାରେ ପରିଣତ ହୋଇଥିବା ଏହି ରାସ୍ତା ବର୍ତ୍ତମାନ ଚାଷ ଜମି ଭଳି ଦୃଶ୍ୟମାନ ହେଉଛି। ରାସ୍ତାର ଅବସ୍ଥା ଏପରି ହୋଇଛି ଯେ ସେଥିରେ ସିଧା ଧାନ ରୋଇଦେଲେ ଗଜା ହୋଇଯିବ ବୋଲି ପୂର୍ବତନ ସରପଞ୍ଚ ତଥା ସମାଜସେବୀ ଶଙ୍କର୍ଷଣ ନାଏକ ପ୍ରଶାସନିକ ନିର୍ମାଣ ନୀତିକୁ ନେଇ ଗଭୀର କ୍ଷୋଭ ପ୍ରକାଶ କରିଛନ୍ତି।
ଏହି ଗୁରୁତ୍ୱପୂର୍ଣ୍ଣ ରାସ୍ତା ଉପରେ ଖମାରପଦର, ଭୂତଗୁଡ଼ା, ଟାଙ୍ଗନିଗୁଡ଼ା, ମୁଣ୍ଡିଘାଟି, ଦୁରେଶପଦର ଏବଂ ମହୁଲପାଟଣା ପଞ୍ଚାୟତର ଅନେକ ଗାଁର ହଜାର ହଜାର ଲୋକ ନିର୍ଭର କରନ୍ତି। ନବରଙ୍ଗପୁର ଜିଲାକୁ ଯିବା ପାଇଁ ଏହା ସବୁଠାରୁ କମ୍ ଦୂରତାର ରାସ୍ତା ହୋଇଥିବା ବେଳେ, ପଞ୍ଚାୟତ କାର୍ଯ୍ୟାଳୟରୁ ପିଡିଏସ ଚାଉଳ ଓ ଭତ୍ତା ଆଣିବା, ହାଇସ୍କୁଲ ଛାତ୍ରଛାତ୍ରୀଙ୍କ ଯାତାୟାତ ଏବଂ ବେଣାଖମାର ସାପ୍ତାହିକ ବଜାର ଯିବା ପାଇଁ ଏହା ଏକମାତ୍ର ମୁଖ୍ୟ ସାହାରା ଅଟେ। ମାତ୍ର ରାସ୍ତାରେ ଜମିଥିବା କାଦୁଅ ଯୋଗୁ ଜରୁରୀକାଳୀନ ସମୟରେ ଆମ୍ବୁଲାନ୍ସ ଯିବା ସମ୍ପୂର୍ଣ୍ଣ ଅସମ୍ଭବ ହୋଇପଡ଼ିଥିବାରୁ ଗର୍ଭବତୀ ଓ ଗୁରୁତର ରୋଗୀଙ୍କ ଜୀବନ ପ୍ରତି ପ୍ରତିଦିନ ବିପଦ ସୃଷ୍ଟି ହେଉଛି।
ପୂର୍ବତନ ସରପଞ୍ଚଙ୍କ ଅଭିଯୋଗ ଅନୁଯାୟୀ, ୨୦୨୧-୨୨ ଆର୍ଥିକ ବର୍ଷରେ ମନରେଗା ଯୋଜନାରେ ୧୦ ଲକ୍ଷ ଟଙ୍କା ବ୍ୟୟରେ ମେଟାଲ-ମୋରମ୍ ରାସ୍ତା ନିର୍ମାଣ ହୋଇଥିଲା। ମାତ୍ର ୨୦୨୫-୨୬ ଆର୍ଥିକ ବର୍ଷରେ ସେହି ଭଲ ରାସ୍ତା ଉପରେ ପୁନର୍ବାର ମନରେଗା କାମ ଦେଖାଇ ଜେସିବି ମେସିନ୍ ଦ୍ୱାରା ତାହାକୁ ଖୋଳତାଡ଼ କରାଯାଇଥିଲା। ବିନା ସୂଚନା ଫଳକରେ ବର୍ତ୍ତମାନର ସରପଞ୍ଚ ନିଜେ ଠିକାଦାର ସାଜି ଏହି କାର୍ଯ୍ୟ କରିଥିବା ଅଭିଯୋଗ ହୋଇଛି। ଏଣୁ ଗ୍ରାମ୍ୟ ନିର୍ମାଣ ବିଭାଗ ଦ୍ୱାରା ଏହାକୁ ପ୍ରଧାନମନ୍ତ୍ରୀ ଗ୍ରାମ ସଡ଼କ ଯୋଜନାରେ ପକାଇ ସ୍ଥାୟୀ ନିର୍ମାଣ କରିବାକୁ ଦାବି ଜୋର ଧରିଛି।
ବିଡିଓଙ୍କୁ ବାରମ୍ବାର ଅଭିଯୋଗ କଲେ ମଧ୍ୟ କୌଣସି ପଦକ୍ଷେପ ନନିଆଗଲେ ଗ୍ରାମବାସୀ ଏକଜୁଟ୍ ହୋଇ ପିଇଓ, ସରପଞ୍ଚ ଓ ବ୍ଲକ୍ ପ୍ରଶାସନ ବିରୋଧରେ ରାଜରାସ୍ତାକୁ ଓହ୍ଲାଇବେ ବୋଲି ଚେତାବନୀ ଦେଇଛନ୍ତି। ଅପରପକ୍ଷରେ, କନିଷ୍ଠ ଯନ୍ତ୍ରୀ ସତ୍ୟନାରାୟଣ ବେହେରା ସ୍ପଷ୍ଟୀକରଣ ଦେଇ କହିଛନ୍ତି ଯେ ପୂର୍ବତନ ଓ ବର୍ତ୍ତମାନର ସରପଞ୍ଚଙ୍କ ମଧ୍ୟରେ ଥିବା ଅସନ୍ତୋଷ ଯୋଗୁ ଏପରି ସମସ୍ୟା ସୃଷ୍ଟି ହୋଇଛି। ପୂର୍ବରୁ ଅଭିଯୋଗ ହେବାରୁ କାମ ସ୍ଥଗିତ ରହିଥିଲା ଏବଂ ବର୍ତ୍ତମାନ ରାସ୍ତାଟି ଆରଡି ବିଭାଗକୁ ହସ୍ତାନ୍ତର ହୋଇସାରିଛି। ଟେଣ୍ଡର ପ୍ରକ୍ରିୟା ଶେଷ ହୋଇଥିବାରୁ ଖୁବଶୀଘ୍ର ନିର୍ମାଣ କାର୍ଯ୍ୟ ଆରମ୍ଭ ହେବ ଏବଂ ବର୍ତ୍ତମାନର ଯାତାୟାତ ସମସ୍ୟା ଦୂର ପାଇଁ ତୁରନ୍ତ ସାମୟିକ ବିକଳ୍ପ ବ୍ୟବସ୍ଥା କରାଯିବ ବୋଲି ସେ ପ୍ରକାଶ କରିଛନ୍ତି।
