ବାରାଣସୀ,୯ା୧୨: ଅଯୋଧ୍ୟାର ନବନିର୍ମିତ ମନ୍ଦିରରେ ରାମ ଲାଲାଙ୍କ ବିଗ୍ରହ ପ୍ରତିଷ୍ଠା ଜାନୁୟାରୀ ୨୨ରେ ହେବାକୁ ଥିବାବେଳେ ଏଥିରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଯୋଗଦେବେ। ମହାପୂଜନ ପାଇଁ ଜାନୁୟାରୀ ୧୬ରୁ ରୀତିନୀତି ଆରମ୍ଭ ହେବ ବୋଲି ମନ୍ଦିର ଟ୍ରଷ୍ଟ ପକ୍ଷରୁ କୁହାଯାଇଛି। ଆଚାର୍ଯ୍ୟ ଲକ୍ଷ୍ମୀକାନ୍ତ ମଥୁରାନାଥ ଦୀକ୍ଷିତଙ୍କ ନେତୃତ୍ୱରେ ବୈଦିକ ପଣ୍ଡିତ ତଥା ପୂଜକମାନେ ସର୍ବପ୍ରାୟଶ୍ଚିତ୍ତ ହୋମ, ସରଯୂ ନଦୀରେ ସ୍ନାନ, ଯଜ୍ଞ ଅନୁଷ୍ଠାନ ପାଇଁ ଯଜମାନଙ୍କ ଆସ୍ଥାନ ଗ୍ରହଣ ସମେତ ମୂଳ ରୀତିନୀତି ୧୬ ତାରିଖ ଅପରାହ୍ନରୁ ଆରମ୍ଭ ହେବ। ୧୭ରେ ଜଳଯାତ୍ରା, ତୀର୍ଥ ଓ କଳସ ପୂଜନ ଏବଂ କଳସ ଯାତ୍ରା ଅନୁଷ୍ଠିତ ହେବ। ପ୍ରଧାନ ସଙ୍କଳ୍ପ ଏବଂ ଗଣେଶାମ୍ବିକା ପୂଜନ ସହ ୧୮ ତାରିଖ ଅପରାହ୍ନରୁ ବିଗ୍ରହ ପ୍ରତିଷ୍ଠାର ମୁଖ୍ୟ ରୀତିନୀତି ଆରମ୍ଭ ହେବ। ସେହିଦିନ ମଣ୍ଡପ ପ୍ରବେଶ ଓ ପୂଜନ ତଥା ଯଜ୍ଞଭୂମି ପୂଜନ ମଧ୍ୟ ଅନୁଷ୍ଠିତ ହେବ। ୧୯ରେ ଦେବତା ପୂଜନ, ସମସ୍ତ ବେଦର ଆବୃତ୍ତି, ଅଧିବାଶନ, କୁଣ୍ଡ ପୂଜନ, ପ୍ରାକୃତିକ ହବନ ପଦ୍ଧତିରେ ଅଗ୍ନିପ୍ରବାହ, ଜଳାଧିବାସ ଆଦି ହେବାକୁ ଥିବାବେଳେ ୨୦ରେ ମନ୍ଦିରର ବାସ୍ତୁ ପୂଜନ ଏବଂ ମନ୍ଦିର ପରିସରକୁ ଶୁଦ୍ଧୀକରଣ କରାଯିବ। ୨୧ ତାରିଖରେ ବିଭିନ୍ନ ତୀର୍ଥକ୍ଷେତ୍ର ଏବଂ ନଦୀରୁ ଅଣାଯାଇଥିବା ପବିତ୍ର ଜଳରେ ବିଗ୍ରହଙ୍କୁ ସ୍ନାନ କରାଯିବା ପରେ ମହାପୂଜା ଓ ନଗର ଭ୍ରମଣ କରାଯିବ। ଏହା ପରେ ବିଗ୍ରହକୁ ଯଜ୍ଞ ମଣ୍ଡପକୁ ଅଣାଯାଇ ଶାୟାଧିବାସ, ତତ୍ତ୍ୱନ୍ୟାସ, ମହାନ୍ୟାସ ଆଦି ନୀତି ସମ୍ପନ୍ନ ହେବ। ୨୨ ଅପରାହ୍ନରେ ବିଗ୍ରହଙ୍କୁ ଅଧିଷ୍ଠାନ ସ୍ଥାନକୁ ନିଆଯାଇ ଦେବପ୍ରାଣପ୍ରତିଷ୍ଠା କରାଯିବ। ଏହାପରେ ସଂସ୍କାର ମହାପୂଜନ, ଆରତୀ ଓ ପୂର୍ଣ୍ଣାହୁତି ଅନୁଷ୍ଠିତ ହେବ।
