ମଣିଷ ମଣିଷ ମଧ୍ୟରେ ସମାନତା ରହିଲେ ପୃଥିବୀର ସାମଗ୍ରିକ ବିକାଶ ଧାରା ସହଜ ହୋଇଥାଏ। ସମାନତା ହିଁ ବିକାଶର ପ୍ରଥମ ପାହାଚ। ଏହାକୁ ଦୃଷ୍ଟିରେ ରଖି ପ୍ରତିବର୍ଷ ଡିସେମ୍ବର ୨ରେ ଅନ୍ତର୍ଜାତୀୟ ଦାସତ୍ୱ ବିଲୋପ ଦିବସ ପାଳନ କରାଯାଇଥାଏ।
ଦାସତ୍ୱର ବିଲୋପ ପାଇଁ ମିଳିତ ଜାତିସଂଘର ସାଧାରଣ ସଭା ଦ୍ୱାରା ୧୯୮୬ଠାରୁ ଏହି ଦିବସ ପାଳିତ ହୋଇଆସୁଛି। ମାନବ ଚୋରା ଚାଲାଣ,ବ୍ୟଭିଚାର ଏବଂ ଶୋଷଣ ବିରୋଧରେ ୧୯୪୯ ଡିସେମ୍ବର ୨ରେ ଜାତିସଂଘର ସାଧାରଣ ସଭାରେ ଏନେଇ ଏକ ପ୍ରସ୍ତାବ ଆଗତ କରାଯାଇଥିଲା। ଦାସତ୍ୱ ବିରୁଦ୍ଧରେ ସଂଗ୍ରାମ ତଥା ଏହାର ବିଲୋପକୁ ସ୍ମରଣ କରିବା ପାଇଁ ଏହି ଦିବସ ପାଳନ ଲାଗି ଘୋଷଣା କରାଯାଇଥିଲା ।
ଏହି ଦିବସ ପାଳନ ଅବସରରେ ଯୌନ ଶୋଷଣ, ଶିଶୁ ଶ୍ରମିକ, ଜୋର୍ ଜବରଦସ୍ତ ବିବାହ, ଏବଂ ସଶସ୍ତ୍ର ବିବାଦରେ ପିଲାମାନଙ୍କୁ ବାଧ୍ୟତାମୂଳକ ନିଯୁକ୍ତି ବିରୋଧରେ ସଚେତନତା ସୃଷ୍ଟି କରାଯାଇଥାଏ।
ଅଦ୍ୟାବଧି ବିଶ୍ୱ ସମସ୍ତ କ୍ଷେତ୍ରରେ ଅଗ୍ରଗତି କରିଛି ତଥାପି ବହୁ ସଂଖ୍ୟକ ଲୋକ ଦାସତ୍ୱର ଶିକାର ହେଉଛନ୍ତି। ଅନ୍ତର୍ଜାତୀୟ ଶ୍ରମ ସଂଗଠନ (ଆଇଏଲଏ) ଅନୁଯାୟୀ ବିଶ୍ୱର ୪୦ ନିୟୁତରୁ ଅଧିକ ଲୋକ ଆଧୁନିକ ଦାସତ୍ୱର ଶିକାର ହେଉଛନ୍ତି। ସେହିପରି ୧୫୦ ମିଲିୟନରୁ ଅଧିକ ଶିଶୁ ଶ୍ରମିକ ରହିଛନ୍ତି। ବିଶ୍ୱରେ ପ୍ରତି ଦଶ ପିଲାଙ୍କ ମଧ୍ୟରୁ ଜଣେ ଶିଶୁ ଶ୍ରମିକ ଭାବେ କାର୍ଯ୍ୟ କରୁଛନ୍ତି। ଏସମସ୍ତ ସମ୍ପର୍କରେ ସଚେତନତା ସୃଷ୍ଟି ଲାଗି ଏହି ଦିବସ ପାଳନ ଅବସରରେ ଉଦ୍ୟମ ହୋଇଥାଏ।
