ଭୁବନେଶ୍ୱର,୧୯।୯(ସତ୍ୟଜିତ୍ ରାଉତ):ଦୈନିକ ଖବରକାଗଜ ‘ସମ୍ବାଦ’ ସମ୍ପାଦକ ସୌମ୍ୟରଞ୍ଜନ ପଟ୍ଟନାୟକ ନିଜ ସଂସ୍ଥାର ମାନବ ସମ୍ବଳ ଓ ବିତ୍ତ ବିଭାଗ ଅଧିକାରୀଙ୍କ ଜରିଆରେ ଚାପ ପକାଇ, ଚାକିରି ନେଇଯିବାର ଭୟ ଦେଖାଇ ଏବଂ କାଗଜପତ୍ର ଜାଲିଆତି କରି ପ୍ରାୟ ୩୦୦ କର୍ମଚାରୀଙ୍କ ନଁାରେ ୫୦ କୋଟିରୁ ଊର୍ଦ୍ଧ୍ୱ ଟଙ୍କାର ବ୍ୟାଙ୍କ ଋଣ ଦୁର୍ନୀତି କରିଥିବା ଅଭିଯୋଗ ହୋଇଛି। ଏନେଇ ଏହି ଗଣମାଧ୍ୟମ ସଂସ୍ଥାର ଜଣେ ପୂର୍ବତନ କର୍ମଚାରୀ କ୍ରାଇମବ୍ରାଞ୍ଚର ଅର୍ଥନୈତିକ ଅପରାଧ ଶାଖା (ଇଓଡବ୍ଲ୍ୟୁ)ରେ ଅଭିଯୋଗ କରିଛନ୍ତି। ତଦନୁଯାୟୀ ଇଓଡବ୍ଲ୍ୟୁ ପକ୍ଷରୁ ସୋମବାର ଭୁବନେଶ୍ୱର ରସୁଲଗଡ଼ ଶିଳ୍ପାଞ୍ଚଳସ୍ଥିତ ସମ୍ବାଦର ମୁଖ୍ୟ କାର୍ଯ୍ୟାଳୟରେ ଚଢ଼ାଉ କରାଯାଇଛି। ଏଥିରେ ଇଓଡବ୍ଲ୍ୟୁର ୩ଟି ଟିମ୍ରେ ୧୨ ଜଣ ଅଧିକାରୀ ସାମିଲ ହୋଇଥିଲେ। ସେମାନେ ମଧ୍ୟାହ୍ନ ପ୍ରାୟ ସାଢ଼େ ୧୨ଟାରେ ଯାଞ୍ଚ ପ୍ରକ୍ରିୟା ଆରମ୍ଭ କରିଥିଲେ। ଶହୀଦନଗର ଥାନା ପୋଲିସ ମଧ୍ୟ ଉପସ୍ଥିତ ଥିଲା। ରାତି ପ୍ରାୟ ୮ଟାରେ ଇଓଡବ୍ଲ୍ୟୁ ଅଧିକାରୀମାନେ ସମ୍ବାଦ କାର୍ଯ୍ୟାଳୟରୁ ବାହାରିଥିଲେ। ଏହି ଋଣ ଦୁର୍ନୀତି ମାମଲାକୁ ନେଇ ଇଓଡବ୍ଲ୍ୟୁ ସୋମବାର ସନ୍ଧ୍ୟାରେ ଏକ ପ୍ରେସ୍ ନୋଟ୍ ଜାରି କରିଛି।
ଇଓଡବ୍ଲ୍ୟୁର ପ୍ରେସ୍ ନୋଟ୍ ଅନୁଯାୟୀ, ସମ୍ବାଦ/ଇଷ୍ଟର୍ଣ୍ଣ ମିଡିଆ ଲିମିଟେଡ୍ ଭୁବନେଶ୍ୱରର ପୂର୍ବତନ କର୍ମଚାରୀ ଅସୀମ ମହାପାତ୍ର ଏହି ବ୍ୟାଙ୍କ ଋଣ ଦୁର୍ନୀତି ସମ୍ପର୍କରେ ଅଭିଯୋଗ କରିଛନ୍ତି। ମହାପାତ୍ରଙ୍କ ଅଭିଯୋଗକୁ ଭିତ୍ତିକରି ଇଓଡବ୍ଲ୍ୟୁ ଗତ ୧୬ ତାରିଖରେ ସମ୍ବାଦ ସମ୍ପାଦକ ସୌମ୍ୟରଞ୍ଜନ ପଟ୍ଟନାୟକ ଏବଂ ଏହି ଗଣମାଧ୍ୟମ ସଂସ୍ଥାର ମାନବ ସମ୍ବଳ ଅଧିକାରୀ ବୈଜୟନ୍ତୀ କରଙ୍କ ସମେତ ଅନ୍ୟ କେତେଜଣଙ୍କ ନାମରେ ଆଇପିସି ଦଫା ୫୦୬, ୪୬୭, ୪୬୮, ୪୭୧, ୪୨୦, ୧୨୦ (ଖ) ଅନୁଯାୟୀ ୨୪/୨୦୨୩ ନମ୍ବରରେ ଏକ ମାମଲା ରୁଜୁ କରିଛି। ମାମଲାର ତଦନ୍ତ ସମୟରେ ଏଯାଏ କେତେଜଣ ଗୁରୁତ୍ୱପୂର୍ଣ୍ଣ ସାକ୍ଷୀଙ୍କୁ ପଚରାଉଚରା କରାଯାଇଛି। ସମ୍ବାଦ ଅଫିସରୁ ଅଭିଯୋଗ ସମ୍ବନ୍ଧୀୟ ଏକାଧିକ ଦସ୍ତାବିଜ୍ ଜବତ କରାଯାଇଛି। ତେବେ ଏପର୍ଯ୍ୟନ୍ତ ସମ୍ବାଦର ୧୫ରୁ ୨୦ଜଣ ପୂର୍ବତନ କର୍ମଚାରୀ ସମାନ ଅଭିଯୋଗ ଆଣିଥିବା ଇଓଡବ୍ଲ୍ୟୁ ପ୍ରେସ୍ ନୋଟ୍ରେ ଦର୍ଶାଇଛି। ମାମଲାର ଠିକ୍ ତଦନ୍ତ କରି ସତ୍ୟ ସାମ୍ନାକୁ ଆଣିବାକୁ ବରିଷ୍ଠ ଓ ଦକ୍ଷ ତଦନ୍ତ ଅଧିକାରୀଙ୍କୁ ଟିମ୍ରେ ନିୟୋଜିତ କରାଯାଇଥିବା ଇଓଡବ୍ଲ୍ୟୁ ପକ୍ଷରୁ କୁହାଯାଇଛି।
ଅନ୍ୟପକ୍ଷରେ ସମ୍ବାଦ କାର୍ଯ୍ୟାଳୟରେ ଚଢ଼ାଉ ସମ୍ପର୍କରେ ଇଷ୍ଟର୍ଣ୍ଣ ମିଡିଆ ଲିମିଟେଡ୍ର ବୈଦୁତିକ ଗଣମାଧ୍ୟମ ‘କନକ ଟିଭି’ରେ ପ୍ରସାରିତ ଖବର ସଂକ୍ରାନ୍ତରେ ଇଓଡବ୍ଲ୍ୟୁ ପକ୍ଷରୁ ସ୍ପଷ୍ଟୀକରଣ ରଖାଯାଇଛି। ସମ୍ବାଦ ଅଫିସକୁ ଯାଇଥିବା ଇଓଡବ୍ଲ୍ୟୁ ଟିମ୍ ‘ଚାପରେ ଅଛି’ ବୋଲି କନକ ଟିଭିରେ ଖବର ପ୍ରସାରଣ ହୋଇଥିଲା। ହେଲେ ‘ଚାପ କିଛି ନାହିଁ’। ଉକ୍ତ ଟିଭି ଚ୍ୟାନେଲ୍ ତଥ୍ୟକୁ ବିକୃତ କରି ମିଥ୍ୟା ପ୍ରଚାର କରୁଥିବା ଇଓଡବ୍ଲ୍ୟୁ ପକ୍ଷରୁ କୁହାଯାଇଛି। ଏହି ଚଢ଼ାଉ ତଥା ଯାଞ୍ଚ ସମୟରେ ଇଓଡବ୍ଲ୍ୟୁ ଅଧିକାରୀମାନେ ସମ୍ବାଦ କର୍ମଚାରୀଙ୍କ ପ୍ରତି ନମ୍ର ବ୍ୟବହାର କରିଥିଲେ। କର୍ମଚାରୀଙ୍କୁ କୌଣସି ଅସୁବିଧା କରାଯାଇନାହିଁ ଏବଂ ଖବରକାଗଜର ଦୈନନ୍ଦିନ କାର୍ଯ୍ୟରେ ବ୍ୟାଘାତ ନ କରି ଯାଞ୍ଚ ପ୍ରକ୍ରିୟା ହୋଇଥିବା ଇଓଡବ୍ଲ୍ୟୁ ପକ୍ଷରୁ କୁହାଯାଇଛି।
ସୂଚନାଥାଉ କି ରବିବାର ସମ୍ବାଦର ପ୍ରକାଶକ ତଥା ସିଓଓ କମଳାକାନ୍ତ ମହାପାତ୍ରଙ୍କୁ ଇଓଡବ୍ଲ୍ୟୁ ପ୍ରାୟ ଅଢ଼େଇ ଘଣ୍ଟା ଜେରା କରିଥିଲା।
