ପୁରୁଣା ଭୁବନେଶ୍ୱର, ୧୮ା୧୨(ଡି.ଏନ୍.ଏ.): ଶ୍ରୀଲିଙ୍ଗରାଜଙ୍କ ବିଭିନ୍ନ ସେବା ପୂଜା ପାଇଁ ଥିବା ଶହ ଶହ ଏକର ଜମିକୁ ଜବରଦଖଲକାରୀ ହାତେଇବାରେ ଲାଗିଛନ୍ତି। ମନ୍ଦିର ପ୍ରଶାସନ ପକ୍ଷରୁ ୫ ବର୍ଷ ପୂର୍ବେ ଲିଙ୍ଗରାଜଙ୍କ ବିଭିନ୍ନ ସ୍ଥାନରେ ଥିବା ସମ୍ପତ୍ତି ଚିହ୍ନଟ କରାଯାଇ ନାମଫଳକ ଲଗାଯିବା ସହ ଏହା ମଧ୍ୟକୁ ପ୍ରବେଶ ଦଣ୍ଡନୀୟ ବୋଲି ଉଲ୍ଲେଖ ରହିଛି। ଏହି କ୍ରମରେ ମହତାବ ରୋଡ୍ସ୍ଥିତ ନାରାୟଣୀ କ୍ଲବ ନିକଟରେ ଲିଙ୍ଗରାଜଙ୍କ ମାଲିକାନାରେ ଥିବା ଭୂସମ୍ପତ୍ତିକୁ ଚିହ୍ନଟ କରାଯାଇଥିଲା। ଏହି ସ୍ଥାନରେ ତତ୍କାଳୀନ ଲିଙ୍ଗରାଜ ମନ୍ଦିର ଟ୍ରଷ୍ଟବୋଡର୍ର୍ କାର୍ଯ୍ୟନିର୍ବାହୀ ଅଧିକାରୀ ପ୍ରଦୀପ କୁମାର ସାହୁ ନାମଫଳକ ଲଗାଇଥିଲେ। ତେବେ ଜବରଦଖଲକାରୀ ଏଠାରେ ଥିବା ନାମଫଳକକୁ ଓପାଡ଼ି ଦୋକାନ କରିବା ପାଇଁ କାର୍ଯ୍ୟ ଜାରି ରଖିଛନ୍ତି। ଏନେଇ ସେବାୟତଙ୍କ ମହଲରେ ଅସନ୍ତୋଷ ପ୍ରକାଶ ପାଇଛି। ଖୁବ୍ଶୀଘ୍ର ଠାକୁରଙ୍କ ଏହି ସମ୍ପତ୍ତିକୁ ଚିହ୍ନଟ କରାଯିବା ସହ ନାମଫଳକ ଲଗାଇବା ପାଇଁ ଦାବି ହେଉଛି। ଏ ସମ୍ପର୍କରେ ଟ୍ରଷ୍ଟବୋର୍ଡ କାର୍ଯ୍ୟନିର୍ବାହୀ ଅଧିକାରୀ ଭବାନୀ ପ୍ରସାଦ ମିଶ୍ରଙ୍କ ମୋବାଇଲ ନମ୍ବରକୁ ବାରମ୍ବାର ଯୋଗାଯୋଗ କରାଯାଇଥିଲେ ମଧ୍ୟ ଫୋନ ନ ଉଠେଇବାରୁ ପ୍ରତିକ୍ରିୟା ମିଳିପାରିନାହିଁ।
