ଭୁବନେଶ୍ୱର, ୭।୧(ବ୍ୟୁରୋ):ଆସନ୍ତା ୧୧ ତାରିଖରୁ ରାଜ୍ୟର ସମସ୍ତ ଉଚ୍ଚଶିକ୍ଷାନୁଷ୍ଠାନ ଖୋଲିବ। ଏଥିପାଇଁ ବିଶ୍ୱବିଦ୍ୟାଳୟ ଓ ମହାବିଦ୍ୟାଳୟଗୁଡ଼ିକରେ ପ୍ରସ୍ତୁତି ଆରମ୍ଭ ହୋଇଛି। ଛାତ୍ରୀଛାତ୍ରଙ୍କ ସୁରକ୍ଷାକୁ ଗୁରୁତ୍ୱ ଦିଆଯାଇ କିପରି ଶିକ୍ଷାନୁଷ୍ଠାନ ଖୋଲିବ ସେଥିପାଇଁ ବିଭିନ୍ନ ମହାବିଦ୍ୟାଳୟ ଓ ବିଶ୍ୱବିଦ୍ୟାଳୟ କର୍ତ୍ତୃପକ୍ଷ ବିଚାରବିମର୍ଶ କରୁଛନ୍ତି। କେତେକ ଉଚ୍ଚ ଶିକ୍ଷାନୁଷ୍ଠାନ କୋଭିଡ୍ ନେଗେଟିଭ୍ ରିପୋର୍ଟକୁ ଗୁରୁତ୍ୱ ଦେଇଛନ୍ତି। ଛାତ୍ରୀଛାତ୍ରଙ୍କ ପାଇଁ କୋଭିଡ୍ ନେଗେଟିଭ୍ ରିପୋର୍ଟ ବାଧ୍ୟତାମୂଳକ କରିଛନ୍ତି। କିନ୍ତୁ ଏହା ସରକାରୀ ଗାଇଡ୍ଲାଇନ୍ ନୁହେଁ। ଏପରି କଲେ ଶିକ୍ଷାନୁଷ୍ଠାନରେ ବିଶୃଙ୍ଖଳା ସୃଷ୍ଟି ହେବ। ତେଣୁ ଏଭଳି ସର୍ତ୍ତାବଳୀକୁ ହଟାଇବା ପାଇଁ ଉଚ୍ଚଶିକ୍ଷା ବିଭାଗ ପକ୍ଷରୁ କୁହାଯାଇଛି।
ଏ ନେଇ ବିଭାଗର ପ୍ରମୁଖ ଶାସନ ସଚିବ ଶାସ୍ବତ ମିଶ୍ର କହିଛନ୍ତି, କିଛି ମହାବିଦ୍ୟାଳୟ ଓ ବିଶ୍ୱବିଦ୍ୟାଳୟ ଛାତ୍ରୀଛାତ୍ରଙ୍କ ପାଇଁ କୋଭିଡ୍ ନେଗେଟିଭ୍ ରିପୋର୍ଟ ବାଧ୍ୟତାମୂଳକ କରିଥିବା ଜାଣିବାକୁ ପାଇଲୁ। ଏହା ସରକାରୀ ଗାଇଡ୍ଲାଇନ ଅନୁଯାୟୀ ନୁହେଁ। ରିପୋର୍ଟ ପାଇବା ପାଇଁ ଛାତ୍ରୀଛାତ୍ରମାନେ ଟଙ୍କା ଖର୍ଚ୍ଚ କରିବାକୁ ବାଧ୍ୟ ହେବେ। ୯ ମାସରୁ ଅଧିକ ବନ୍ଦ ପରେ ଛାତ୍ରୀଛାତ୍ର ଶିକ୍ଷାନୁଷ୍ଠାନକୁ ଆସନ୍ତୁ ବୋଲି ଆମେ ଚାହୁଁ। ଏଭଳି ସର୍ତ୍ତାବଳୀ ଲଗାଇ ସେମାନଙ୍କ ଆଗମନକୁ କଠୋର କରିବା ନାହିଁ, ଯାହା ସରକାରୀ ଗାଇଡ୍ଲାଇନ ଅନୁଯାୟୀ ନୁହେଁ। ତେଣୁ ଏହି ସର୍ତ୍ତକୁ ହଟାଇବାକୁ ସଚିବ କହିଛନ୍ତି। ଥର୍ମାଲ ସ୍କ୍ରିନିଂ ମଧ୍ୟ ସରକାରୀ ଗାଇଡ୍ଲାଇନ୍ରେ ନାହିଁ। ସେହି ପର୍ଯ୍ୟାୟ ଏବେ ସମାପ୍ତ ହୋଇସାରିଛି। ସାମାଜିକ ଦୂରତା, ମାସ୍କ ପିନ୍ଧିବା, ହାତ ଧୋଇବା ଓ ସାନିଟାଇଜେଶନ ପରି ମୌଳିକ ଜିନିଷଗୁଡ଼ିକ ଅନୁସରଣ କରାଯିବା ଆବଶ୍ୟକ। ଯାହା ପ୍ରୟୋଜନୀୟ ତାହା ଅନୁସରଣ କରିବା ଉଚିତ ବୋଲି ସଚିବ ମିଶ୍ର କହିଛନ୍ତି।
