ମୁମ୍ବାଇ,୩।୧୨ : ଅନେକ ରାଜ୍ୟ ସରକାର ଏବଂ ରାଜ୍ୟପାଳଙ୍କ ମଧ୍ୟରେ ଚାଲିଥିବା ବିବାଦ ବନ୍ଦ ହେବାର ନା ଧରୁନି। ତାମିଲନାଡୁରୁ ରାଜ୍ୟପାଳଙ୍କୁ ହଟାଇବାକୁ ଦାବି ହେଉଛି ଏବଂ କେରଳ ରାଜ୍ୟପାଳଙ୍କ ଉଦ୍ଦେଶ୍ୟ ଉପରେ ପ୍ରଶ୍ନ ଉଠିଛି। ଏଥି ସହିତ ମହାରାଷ୍ଟ୍ରର ପୂର୍ବତନ ମୁଖ୍ୟମନ୍ତ୍ରୀ ଉଦ୍ଧବ ଠାକରେ ଏବେ ଏହି ବିବାଦରେ ମୁହଁ ଖୋଲିଛନ୍ତି। ରାଜ୍ୟପାଳ ପଦବୀ ପାଇଁ ଚୟନ ପାଇଁ କିଛି ଯୋଗ୍ୟତା ମାନଦଣ୍ଡ ସ୍ଥିର କରାଯିବା ଉଚିତ ବୋଲି ସେ ଶନିବାର କହିଛନ୍ତି।
ଉଦ୍ଧବ ଠାକରେ କହିଛନ୍ତି ଯେ ମହାରାଷ୍ଟ୍ର ରାଜ୍ୟପାଳ ଭଗତ ସିଂ କୋଶୟାରି ଛତ୍ରପତି ଶିବାଜୀ ମହାରାଜ ତଥା ସାମାଜିକ ସଂସ୍କାରକ ଜ୍ୟୋତିବା ଫୁଲେ ଏବଂ ସାବିତ୍ରୀବାଈ ଫୁଲେଙ୍କ ପରି ସମ୍ମାନିତ ବ୍ୟକ୍ତିତ୍ୱଙ୍କୁ ଅପମାନ କରୁଛନ୍ତି। ଏହା ସତ୍ତ୍ୱେ ଏଭଳି ଲୋକମାନେ ଏବେବି ନିଜ ପଦବୀରେ ଅଛନ୍ତି । ଏହା ଅତ୍ୟନ୍ତ ଦୁଃଖର ବିଷୟ ବୋଲି ସେ କହିଛନ୍ତି।
ଉଦ୍ଧବ କହିଛନ୍ତି ଯେ ରାଜ୍ୟପାଳ ହେଉଛନ୍ତି ଭାରତର ରାଷ୍ଟ୍ରପତିଙ୍କ ପ୍ରତିନିଧୀ ଏବଂ ଏପରି ପଦବୀରେ କାହାକୁ ନିଯୁକ୍ତ କରାଯାଇପାରିବ ସେଥିପାଇଁ କିଛି ମାନଦଣ୍ଡ ରହିବା ଉଚିତ। ମୁଁ ଦାବି କରୁଛି ଯେ ଏହିପରି ନିୟମ ପ୍ରସ୍ତୁତ କରାଯାଉ। ଯାହାଫଳରେ ସଠିକ ବ୍ୟକ୍ତି ଏହି ପଦବୀରେ ବସିପାରିବେ। ମହାରାଷ୍ଟ୍ର ଏବଂ କର୍ନାଟକ ମଧ୍ୟରେ ସୀମା ରେଖା ବିଷୟରେ ସେ କହିଛନ୍ତି ଯେ ବେଲଗାମରେ ଏଠାକାର ମନ୍ତ୍ରୀମାନଙ୍କୁ ସ୍ବାଗତ କରାଯାଇନଥିବା ନେଇ ମୁଖ୍ୟମନ୍ତ୍ରୀ ଏକନାଥ ଶିନ୍ଦେ ତାଙ୍କ ପ୍ରତିପକ୍ଷ ବାସଭରାଜ ବୋମ୍ମାଇଙ୍କ ବିବୃତ୍ତିରେ ଚୁପ ରହିଛନ୍ତି।
ଉଦ୍ଧବ କହିଛନ୍ତି ଯେ ମହାରାଷ୍ଟ୍ର ମନ୍ତ୍ରୀ ଚନ୍ଦ୍ରକାନ୍ତ ପାଟିଲ ଏବଂ ଶମ୍ଭୁରଜ ଦେଶାଇଙ୍କ ଶୁକ୍ରବାର ବେଲାଗାଭି ଗସ୍ତ ନେଇ ବୋମ୍ମାଇ ଆପତ୍ତି କରିଛନ୍ତି। ଆହୁରି ମଧ୍ୟ କହିଛନ୍ତି ଯେ ସିନ୍ଦେ ଏବଂ ତାଙ୍କ ବିଧାୟକମାନେ ଆସାମର ଗୁଆହାଟି ଯାଇ କାମାକ୍ଷୀ ଦେବୀଙ୍କୁ କର୍ନାଟକର ବେଲଗାମ ଏବଂ ମରାଠୀ ଭାଷାଭାଷୀ ଅଞ୍ଚଳକୁ ମହାରାଷ୍ଟ୍ରକୁ ଆଣିବା ପାଇଁ ପ୍ରାର୍ଥନା କରିବା ଉଚିତ।
