କେନ୍ଦୁଝର, ୨୯ା୬(ଡି.ଏନ.ଏ.): କେନ୍ଦୁଝର ଜିଲାରେ ହାତୀ ଆତଙ୍କ କମିବାର ନାଁ ଧରୁନାହିଁ ା ଗତ ଦୁଇ ବର୍ଷରେ ହାତୀ ଆକ୍ରମଣରେ ୧୫ ଜଣ ବ୍ୟକ୍ତିଙ୍କ ଜୀବନ ଚାଲିଯାଇଥିବାବେଳେ ୯୨ ଜଣ ବ୍ୟକ୍ତି ବିକଳାଙ୍ଗ ହୋଇଥିବା ସରକାରୀ ଭାବେ ଜଣାପଡିଛି ା ଏହି ଦୁଇ ବର୍ଷ ମଧ୍ୟରେ ୧୩ ହାତୀଙ୍କ ଜୀବନ ଯାଇଥିବା ଜଣାପଡିଛି। ମିଳିଥିବା ସୂଚନା ଅନୁସାରେ, ୨୦୧୯-୨୦ ବର୍ଷରେ ହାତୀ ଆକ୍ରମଣରେ ୯ଜଣ ବ୍ୟକ୍ତିଙ୍କର ମୃତ୍ୟୁ ହୋଇଥିବାବେଳେ ୩୮ ଜଣ ଶାରିରୀକ ଭାବେ କ୍ଷତିଗ୍ରସ୍ତ ହୋଇଛନ୍ତି ା ଏହି ବର୍ଷରେ ୩୧୫ଟି ବାସଗୃହ ନଷ୍ଟ ହୋଇଥିବା ଜଣାପଡିଛି। ୩୫୮୧ ଜଣ ବ୍ୟକ୍ତି, ହାତୀର ଉପଦ୍ରବରେ କ୍ଷତିଗ୍ରସ୍ତ ହୋଇଥିବା ଜଣାପଡିଛି। ଏହି ଆର୍ଥିକ ବର୍ଷରେ ୯୦୪.୭୧ ଏକର ଚାଷଜମି ନଷ୍ଟ ହୋଇଛି। ଭିନ୍ନ ଭିନ୍ନ କାରଣ ପାଇଁ ୬ଟି ହାତୀ ମୃତ୍ୟୁମୁଖରେ ପଡିଛନ୍ତି। ସେହିପରି ୨୦୨୦-୨୧ ବର୍ଷରେ ୬ଜଣ ବ୍ୟକ୍ତିଙ୍କର ମୃତ୍ୟୁ ହୋଇଥିବାବେଳେ ୫୪ ଜଣ ଲୋକ ଶାରିରୀକ ଭାବେ କ୍ଷତିଗ୍ରସ୍ତ ହୋଇଛନ୍ତି ା ଗତ ବର୍ଷରେ ୧୩୯ଟି ବାସଗୃହ ନଷ୍ଟ ହୋଇଛି। କରୋନା ମହାମାରୀ ସମୟରେ ଲୋକେ କାମଧନ୍ଦା ନ ପାଇ ଘରେ ମୁଣ୍ଡରେ ହାତ ଦେଇ ବସିଥିବାବେଳେ ୩୮୫୯ଜଣ ବ୍ୟକ୍ତି ହାତୀର ଆକ୍ରମଣରେ କ୍ଷତିଗ୍ରସ୍ତ ହୋଇଛନ୍ତି। ୨୦୨୦-୨୧ ବର୍ଷରେ ୮୩୬.୪୯ ଏକର ଚାଷଜମି ନଷ୍ଟ ହୋଇଛି। ହାତୀ-ମଣିଷର ଏହି ଲଢେଇରେ ୭ଟି ହାତୀ ମୃତ୍ୟୁମୁଖରେ ପଡିଛନ୍ତି ଯାହାକି ପରିବେଶପ୍ରେମୀଙ୍କୁ ଚିନ୍ତିତ କରି ପକାଇଛି ା ସାଧାରଣ ଲୋକେ ଏବେ ଜୀବନ-ଜୀବିକାର ଦୋ ଛକିରେ ସଂଘର୍ଷ କରୁଥିବାବେଳେ ହାତୀ ଆକ୍ରମଣ ସାଧାରଣ ଲୋକଙ୍କୁ ଆହୁରି ଦୁର୍ଦ୍ଦଶାକୁ ଠେଲି ଦେଇଛି। କେନ୍ଦୁଝର ଜିଲାରେ ଏହି ହାତୀ-ମଣିଷର ଲଢେଇ ତିନି ଦଶନ୍ଧି ତଳର ନିରବଚ୍ଛିନ୍ନ ଯନ୍ତ୍ରଣା ହୋଇଥିବାବେଳେ ଏହା କମିବା ବଦଳରେ ବଢିବାରେ ଲାଗିଛି ା ହାତୀ-ମଣିଷର ଏହି ଲଢେଇର ଅନ୍ତ କେବେ ତାହାକୁ ନେଇ ସାଧାରଣରେ ଚିନ୍ତା ପ୍ରକଟ କରାଯାଇଛି ା
