ବଲାଙ୍ଗୀର,୨୭।୫(ସୁନୀଲ କୁମାର ମହାନ୍ତି): ପାଟଣାଗଡ଼ ନିର୍ବାଚନ ମଣ୍ଡଳୀରେ ଉଗ୍ର ରୂପ ନେଉଛି ବିଦ୍ୟୁତ ସମସ୍ୟା। ଅଘୋଷିତ ବିଦ୍ୟୁତ୍ କାଟ ପ୍ରତିବାଦରେ ଆଗାମୀ ଦିନରେ ବିଦ୍ୟୁତ ଅଫିସ ଘେରାଉ ସହ ଏକ ବଡ଼ ଧରଣର ଆନ୍ଦୋଳନ କରାଯିବ। ପାଟଣାଗଡ଼ ବିଜୁ ଜନତା ଦଳ (ବିଜେଡି) କାର୍ଯ୍ୟାଳୟଠାରେ ଅନୁଷ୍ଠିତ ଏକ ଗୁରୁତ୍ୱପୂର୍ଣ୍ଣ ପ୍ରସ୍ତୁତି ବୈଠକରେ ଏହି ନିଷ୍ପତ୍ତି ନିଆଯାଇଛି।
ବୈଠକରେ ପାଟଣାଗଡ଼ ନିର୍ବାଚନମଣ୍ଡଳୀର ପୂର୍ବତନ ବିଧାୟକ ତଥା ଜିଲା ବିଜେଡି ସଭାପତି ସରୋଜ କୁମାର ମେହେର ଯୋଗଦେଇ ବିଦ୍ୟୁତ୍ ଯୋଗାଣ କରୁଥିବା ଟାଟା ପାୱାର୍ କମ୍ପାନୀ ଉପରେ ବର୍ଷିଛନ୍ତି। ଜିଲାରେ ବାରମ୍ବାର କାହିଁକି ଏଭଳି ଅଘୋଷିତ ବିଦ୍ୟୁତ୍ କାଟ କରାଯାଉଛି ବୋଲି ସେ ପ୍ରଶ୍ନ କରିଛନ୍ତି। ଏହି ଆନ୍ଦୋଳନରେ ଅଞ୍ଚଳର ସମସ୍ତ ଗ୍ରାମର ବିଦ୍ୟୁତ୍ ଉପଭୋକ୍ତାମାନେ ସାମିଲ ହେବାକୁ ସେ ଆହ୍ବାନ ଦେଇଛନ୍ତି।
ପ୍ରଚଣ୍ଡ ଗରମ ସମୟରେ ଅହେତୁକ ବିଦ୍ୟୁତ୍ କାଟ ଯୋଗୁ ଗ୍ରାମାଞ୍ଚଳର ଲୋକେ ସାରା ରାତି ଅନିଦ୍ରା ହୋଇ କଷ୍ଟ ପାଉଛନ୍ତି। ଏପରିକି ପାନୀୟ ଜଳ ଯୋଗାଣ ପ୍ରକଳ୍ପଗୁଡ଼ିକ ଅଚଳ ହୋଇପଡ଼ିଛି, ଯାହାଦ୍ୱାରା ଲୋକେ ଜଳକଷ୍ଟ ଭୋଗୁଛନ୍ତି। ଦିନବେଳା ପ୍ରବଳ ଗରମ ଏବଂ ଗୁଳୁଗୁଳିରେ ଛୋଟ ଛୋଟ ପିଲା ଏବଂ ବୟସ୍କ ଲୋକେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି। ବିଦ୍ୟୁତ୍ ବିଭାଗର ଏଭଳି ମନମୁଖୀ କାର୍ଯ୍ୟକଳାପ ଏବଂ ଚରମ ଅବହେଳା ବିରୋଧରେ ଆଗାମୀ ଦିନରେ ବ୍ୟାପକ ଜନଆନ୍ଦୋଳନ କରାଯିବ। ଅଞ୍ଚଳବାସୀଙ୍କ ହକ ପାଇଁ ବିଦ୍ୟୁତ୍ ଅଫିସ ସମ୍ପୂର୍ଣ୍ଣ ଘେରାଉ କରାଯିବ ବୋଲି ବୈଠକରେ ଚେତାବନୀ ଦିଆଯାଇଛି।
