ମୁନିଗୁଡା,୨୫।୪(ନନ୍ଦ କିଶୋର ପଟ୍ଟନାୟକ): ରାୟଗଡ଼ା ଜିଲା ମୁନିଗୁଡ଼ା ଥାନା ମୁନିଖୋଲ ପଞ୍ଚାୟତ ଅଧୀନ ଗୋରଠା ଗ୍ରାମରେ ସାନଭାଇଙ୍କ ଟାଙ୍ଗିଆ ଚୋଟରେ ତାଙ୍କ ବଡ଼ଭାଇଙ୍କ ମୃତ୍ୟୁ ଘଟିଥିଲା। ଏହି ଘଟଣାରେ ଅଭିଯୁକ୍ତ ସାନଭାଇ ଆଦୁ ଜାକାସିକାଙ୍କୁ ମୁନିଗୁଡ଼ା ପୋଲିସ ଶୁକ୍ରବାର ନିୟମଗିରି ପର୍ୱତ୍ୟାଞ୍ଚଳର କଲ୍ୟାଣସିଂପୁର ଅଞ୍ଚଳରୁ ଗିରଫ କରିଥିବା ବେଳେ ଶନିବାର କୋର୍ଟ ଚାଲାଣ କରିଥିବା ମୁନିଗୁଡା ଥାନା ଅଧିକାରୀ କେଶବ ଷଡ଼ଙ୍ଗୀ ସୂଚନା ଦେଇଛନ୍ତି।
ସୂଚନା ଅନୁଯାୟୀ, ଗୋରଠା ଗ୍ରାମର ୨ଭାଇ ଗୁଲଟା ଜାକାସିକା ଏବଂ ଆଦୁ ଜାକାସିକାଙ୍କ ମଧ୍ୟରେ ଗଣ୍ଡଗୋଳ ହୋଇଥିଲା। ହଠାତ୍ ସାନଭାଇ ଆଦୁ ଉତ୍କ୍ଷିପ୍ତ ହୋଇ ନିକଟରେ ପଡ଼ିଥିବା ଏକ ଟାଙ୍ଗିଆରେ ବଡଭାଇ ଗୁଲଟାଙ୍କୁ ଆକ୍ରମଣ କରିବାରୁ ଘଟଣାସ୍ଥଳରେ ତାଙ୍କର ମୃତ୍ୟୁ ଘଟିଥିଲା। ହତ୍ୟାକାଣ୍ଡ ପରେ ସାନଭାଇ ଆଦୁ ଘଟଣାସ୍ଥଳରୁ ଫେରାର ହୋଇଯାଇଥିଲେ। ଏ ନେଇ ଏସ୍ଡିପିଓ ସନ୍ତୋଷିନୀ ଓରାମଙ୍କ ନିର୍ଦ୍ଦେ ଶ କ୍ରମେ ମୁନିଗୁଡ଼ା ଥାନାରେ ଏକ ମାମଲା(ନଂ.୧୨୬/୨୬) ରୁଜୁ ହୋଇଥିଲା। ମୁନିଗୁଡ଼ା ପୋଲିସ ତଦନ୍ତ କରି ଅଭିଯୁକ୍ତ ସାନଭାଇଙ୍କୁ ଧରିବାରେ ସକ୍ଷମ ହୋଇଛି।
