ନୂଆଦିଲ୍ଲୀ,୭ା୭(ପି.ଟି.):ଚଳିତ ବର୍ଷ ବିଶ୍ୱ ପାଣିପାଗରେ ଦେଖାଦେଇଥିବା ‘ଏଲ୍ ନିନୋ’ର ସବୁଠାରୁ ମାରାତ୍ମକ ପ୍ରଭାବ ଭାରତର ଶକ୍ତି ବ୍ୟବସ୍ଥା ଉପରେ ପଡ଼ିବାକୁ ଯାଉଛି। ଅନ୍ତର୍ଜାତୀୟ ଗବେଷଣା ସଂସ୍ଥା ‘ସେଣ୍ଟର ଫର୍ ରିସର୍ଚ୍ଚ ଅନ୍ ଏନର୍ଜି ଆଣ୍ଡ୍ କ୍ଲିନ୍ ଏୟାର’ (ସିଆର୍ଇଏ)ର ଏକ ନୂତନ ବିଶ୍ଳେଷଣାତ୍ମକ ରିପୋର୍ଟରୁ ଏହି ଚେତାବନୀ ମିଳିଛି। ରିପୋର୍ଟ ଅନୁଯାୟୀ, ଏଲ୍ ନିନୋ ପ୍ରଭାବରେ ବିଶ୍ୱର ଅନ୍ୟ କୌଣସି ଦେଶ ତୁଳନାରେ ଭାରତ ସବୁଠାରୁ ବଡ଼ ସଙ୍କଟର ସାମ୍ନା କରିବ। ଏଲ୍ ନିନୋ ଯୋଗୁ ଦେଶରେ ପବନର ବେଗ କମିବା ସହ ବର୍ଷାର ପରିମାଣ ହ୍ରାସ ପାଇବ। ଫଳରେ ପବନଚାଳିତ ଟର୍ବାଇନ ଏବଂ ଜଳବିଦ୍ୟୁତ୍ ପ୍ରକଳ୍ପଗୁଡ଼ିକରୁ ବିଦ୍ୟୁତ୍ ଉତ୍ପାଦନ ଅନେକାଂଶରେ କମିଯିବ। ଅନ୍ୟପଟେ ପ୍ରବଳ ଗରମ ଯୋଗୁ ଏୟାର କଣ୍ଡିଶନର ବ୍ୟବହାର ବଢ଼ିବ ଏବଂ ବିଦ୍ୟୁତ୍ ଚାହିଦା ବହୁ ଅଧିକ ହେବ। କେବଳ ଘର ଓ କାର୍ଯ୍ୟାଳୟକୁ ଥଣ୍ଡା ରଖିବା ପାଇଁ ବାର୍ଷିକ ଅତିରିକ୍ତ ୧୦ ଟେରାୱାଟ ଆୱାର (ଟିଡବ୍ଲ୍ୟୁଏଚ୍) ବିଦ୍ୟୁତ୍ର ଆବଶ୍ୟକତା ପଡ଼ିବ, ଯାହା ସମ୍ପୂର୍ଣ୍ଣ ଦିଲ୍ଲୀ ସହରର ବାର୍ଷିକ ବିଦ୍ୟୁତ୍ ବ୍ୟବହାରର ପ୍ରାୟ ଏକ ଚତୁର୍ଥାଂଶ ସହ ସମାନ।
ସଂସ୍ଥାର ଆକଳନ ଅନୁଯାୟୀ, ଚଳିତ ଜୁଲାଇ ୨୦୨୬ରୁ ଜୁନ୍ ୨୦୨୭ ମଧ୍ୟରେ ଏହି ପାଣିପାଗ ପରିବର୍ତ୍ତନର ବଡ଼ ପ୍ରଭାବ ଦେଖିବାକୁ ମିଳିବ। ଅକ୍ଷୟ ଶକ୍ତିର ଉତ୍ପାଦନ ହ୍ରାସ ଏବଂ ବିଦ୍ୟୁତ୍ ଚାହିଦା ବୃଦ୍ଧି ପାଇବା ଯୋଗୁ ଭାରତରେ ପ୍ରାୟ ୧୮ ଟେରାୱାଟ ଆୱାରର ଏକ ବଡ଼ ବିଦ୍ୟୁତ୍ ନିଅଣ୍ଟ ସ୍ଥିତି ସୃଷ୍ଟି ହୋଇପାରେ। ଏହି ସଙ୍କଟକୁ ମେଣ୍ଟାଇବା ପାଇଁ ଭାରତକୁ ପୁଣି ଥରେ କୋଇଲା ଭିତ୍ତିକ ବିଦ୍ୟୁତ୍ ପ୍ରକଳ୍ପ ଉପରେ ନିର୍ଭର କରିବାକୁ ପଡ଼ିବ, ଯଦ୍ଦ୍ବାରା ପରିବେଶକୁ ପ୍ରାୟ ୧୭ ନିୟୁତ ଟନ୍ ଅଙ୍ଗାରକାମ୍ଳ ଗ୍ୟାସ୍ ନିର୍ଗତ ହେବା ଆଶଙ୍କା ରହିଛି। ଯଦି ସ୍ଥିତି ଅଧିକ ଗମ୍ଭୀର ହୁଏ, ତେବେ କୋଇଲା ଜନିତ ଅତିରିକ୍ତ ବିଦ୍ୟୁତ୍ ଉତ୍ପାଦନ ୨୪ ଟେରାୱାଟ ଆୱାରରେ ପହଞ୍ଚିପାରେ।
ରିପୋର୍ଟରେ ଉଲ୍ଲେଖ କରାଯାଇଛି ଯେ, ଭାରତ ନିକଟରେ ଏକ ଭୟଙ୍କର ଗ୍ରୀଷ୍ମ ପ୍ରବାହ ଏବଂ ସର୍ବକାଳୀନ ଗରମ ଗ୍ରୀଷ୍ମଋତୁର ସାମ୍ନା କରିଛି, ଯାହା ଦେଶର ମୋଟ ବିଦ୍ୟୁତ୍ ଚାହିଦାକୁ ଗତ ମେ ମାସରେ ୨୭୦ ଗିଗାୱାଟ (ଜିଡବ୍ଲ୍ୟୁ)ର ସର୍ବକାଳୀନ ରେକର୍ଡ ସ୍ତରକୁ ନେଇଯାଇଥିଲା। ଏହି ଚାହିଦାକୁ ପୂରଣ କରିବା ପାଇଁ ଦେଶର ବିଦ୍ୟୁତ୍ ଗ୍ରୀଡ୍ ଉପରେ ପ୍ରବଳ ଚାପ ପଡ଼ୁଛି। ଏହାସହିତ ଦେଶରେ ଜଳ ସଙ୍କଟ ଗଭୀର ହେବା ସହ
କୃଷିକ୍ଷେତ୍ର ଉପରେ ମଧ୍ୟ ଏହାର ପ୍ରତିକୂଳ ପ୍ରଭାବ ପଡ଼ିବା ଆରମ୍ଭ ହୋଇଛି। ପ୍ରତି ୨ରୁ ୭ ବର୍ଷ ମଧ୍ୟରେ ଆସୁଥିବା ଏହି ‘ସୁପର ଏଲ୍ ନିନୋ’ ଚ୍ୟାଲେଞ୍ଜକୁ ପ୍ରତିହତ କରିବାକୁ ହେଲେ ଭାରତକୁ ୨୦୩୦ ସୁଦ୍ଧା ୫୦୦ ଗିଗାୱାଟ୍ ଅକ୍ଷୟ ଶକ୍ତି ଉତ୍ପାଦନର ଲକ୍ଷ୍ୟ ହାସଲ କରିବା ସହ ବ୍ୟାଟେରି ଷ୍ଟୋରେଜ୍ ଏବଂ ଗ୍ରୀଡ୍ର ଆଧୁନିକୀକରଣ କାର୍ଯ୍ୟକୁ ଅଧିକ ତୀବ୍ରଗତିରେ କରିବାକୁ ହେବ।
ଏହି ଜଟିଳ ସ୍ଥିତିରୁ ରକ୍ଷା ପାଇବା ପାଇଁ ସୌରଶକ୍ତି ସବୁଠାରୁ ବଡ଼ ବିକଳ୍ପ ଭାବେ ଉଭା ହୋଇଛି। ବର୍ତ୍ତମାନ ଦେଶର ଦିନ ସମୟର ମୋଟ ବିଦ୍ୟୁତ୍ ଚାହିଦାର ପ୍ରାୟ ୨୪ ପ୍ରତିଶତ କେବଳ ସୌରଶକ୍ତି ମାଧ୍ୟମରେ ପୂରଣ କରାଯାଉଛି। ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି, ଏଲ୍ ନିନୋର ପ୍ରଭାବ ସୌରଶକ୍ତି ଉତ୍ପାଦନ ଉପରେ ଆଦୌ ପଡ଼ି ନ ଥାଏ। ତେଣୁ ଭାରତରେ ଯେତେ ଅଧିକ ସୋଲାର ପ୍ୟାନେଲ ଏବଂ ବ୍ୟାଟେରି ବ୍ୟବସ୍ଥା ସ୍ଥାପନ ହେବ, ଭବିଷ୍ୟତରେ ଏଭଳି ଚରମ ପାଣିପାଗ ସଙ୍କଟରୁ ଦେଶର ବିଦ୍ୟୁତ୍ ଗ୍ରୀଡ୍ ସେତେ ଅଧିକ ସୁରକ୍ଷିତ ରହିପାରିବ ବୋଲି ବିଶ୍ଳେଷଣରେ ପ୍ରକାଶ ପାଇଛି।
Dharitri – Odisha’s No.1 Odia Daily
