ନୟାଗଡ ଅଫିିସ/ଭୁବନେଶ୍ୱର,୧୪ା୧୨ (ବ୍ୟୁରୋ):ନୟାଗଡ଼ ସଦର ଥାନା ଅଧୀନ ଯଦୁପୁରର ଶିଶୁକନ୍ୟା ପରୀ ହତ୍ୟାକାଣ୍ଡର ତଦନ୍ତ କରୁଥିବା ଏସ୍ଆଇଟି ମୁଖ୍ୟ ଅରୁଣ ବୋଥ୍ରାଙ୍କ ନଁାରେ ସଙ୍ଗିନ ଅଭିଯୋଗ ଆଣିଛନ୍ତି ଯୁକ୍ତ ୩ ପ୍ରଥମ ବର୍ଷ କଳା ଛାତ୍ର ସରୋଜ ସେଠୀ। ତାଙ୍କୁ ହତ୍ୟାକାରୀ ଦର୍ଶାଇ ଫସାଇବାକୁ ଉଦ୍ୟମ ଚାଲିଛି। ଏଥିପାଇଁ ଧମକଚମକ ଦିଆଯିବା ସହ ୫ ଲକ୍ଷ ଟଙ୍କା ଲୋଭ ଦେଖାଉଥିବା ନେଇ ସରୋଜ ରବିବାର ଗଣମାଧ୍ୟମ ଆଗରେ ଅଭିଯୋଗ କରି ନ୍ୟାୟ ମାଗିଛନ୍ତି।
ଯଦୁପୁରର ବାସିନ୍ଦା ସରୋଜ କହିଛନ୍ତି ଯେ, ‘ମୁଁ ସତ କଥା କହି ହଇରାଣ ହେଉଛି। ମୋ ପରିବାର ଫସିଯାଇଛୁ। ଭଉଣୀର ବାହାଘର ଏହି ଡିସେମ୍ବର ମାସରେ କିପରି ହେବ ସେନେଇ ଆମେ ଚିନ୍ତିତ ହୋଇପଡିଛୁ। ଅପହରଣ ପୂର୍ବଦିନ ଜୁଲାଇ ୧୩ରେ ପରୀ ଆମ ଘର ପାଖ ଜାମୁକୋଳି ଗଛ ନିକଟକୁ ଆସି କୋଳି ଗୋଟାଉଥିଲା ବୋଲି ତା’ର ମା’ବାପାଙ୍କୁ କହିଥିଲି। ଏହାପରେ ନିର୍ଯାତନା ଓ ମାଡ଼ ଖାଇବା ସହ ଚାପରେ ରହିଛି। ମୃତଦେହ ଉଦ୍ଧାର ପରଦିନ ଜୁଲାଇ ୨୫ରେ ମୋତେ ପୋଲିସ ଜେରା ପାଇଁ ଡାକିନେଲା। ନୟାଗଡ ସଦର ଥାନାରେ ଆଇଆଇସି ରୀନାରାଣୀ ସାହୁ, ଏସ୍ଡିପିଓଙ୍କ ଉପସ୍ଥିତିରେ ଜଣେ ଗୋରା ଓ ଚଷମା ପିନ୍ଧା ଅଫିସର ମୋତେ ମାଡ଼ ମାରିଲେ। ପରେ ଡିସେମ୍ବର ୨ରେ ଏସ୍ଆଇଟି ଅଧିକାରୀମାନେ ଆସି ଆମ ଘରୁ ଚାର୍ଜରେ ବସିଥିବା ନାନୀର ମୋବାଇଲ ଫୋନ ନେଇଗଲେ। ମୋତେ ସର୍କିଟ ହାଉସ୍ରେ ଅରୁଣ ବୋଥ୍ରା ସକାଳୁ ସନ୍ଧ୍ୟା ପର୍ଯ୍ୟନ୍ତ ଜେରା କରିଲେ। ପ୍ରମାଣ ମିଳିଛି, ତୁମେ ପରୀକୁ ମାରିଛ କହି ଚାପ ପ୍ରୟୋଗ କଲେ। ହତ୍ୟା କରିଛ ବୋଲି ସ୍ବୀକାର ନ କଲେ ହତ୍ୟାକାରୀ ବୋଲି ଫସେଇ ଦେବାକୁ ଧମକ ଦେଲେ। ଆଗକୁ ବଡ଼ ଅସୁବିଧା ହେବ ବୋଲି ଡରାଇଲେ। ନ ମାନିଲେ ଫିଙ୍ଗରପ୍ରିଣ୍ଟ, ଡିଏନ୍ଏ ଓ ରକ୍ତ ନମୁନା ମିଶାଇ ହତ୍ୟାକରୀ ବୋଲି ପ୍ରମାଣ କରିଦେବୁ ବୋଲି କହିଲେ। ଆମ କଥା ମାନ। ସାବାଳକ ହେଲେ ବି ବାଳ ଅପରାଧୀ କରିଦେବୁ। ୫ ଲକ୍ଷ ଟଙ୍କା ପୁରସ୍କାର ମିଳିବ। ଫାଶୀ ହେବନି କି ଜେଲ ଯିବାକୁ ପଡିବନି ବୋଲି ଆଶ୍ୱାସନା ଦେଲେ । ନିର୍ଭୟା କେସ୍ର ଉଦାହରଣ ଦେଇ ମୋବାଇଲରେ ଏହାର କିଛି ଦୃଶ୍ୟ ଦେଖାଇଲେ । ନିର୍ଭୟା ଘଟଣାର ବାଳ ଅପରାଧୀ ଖସିଲା ପରି ଖସାଇଦେବୁ କହିଲେ। ମୁଁ ପୂରା ଭୟଭୀତ ଥିବାବେଳେ ହଉ ଚାଲିଯାଅ କହି ଛାଡିଦେଲେ। ୧୦ ତାରିଖରେ ଘରକୁ ଆସି ନେଇଯାଇଥିବା ମୋବାଇଲ ଫୋନ୍ର ପାସ୍ୱାର୍ଡ ମାଗିଲେ। ଆମେ ଲକ୍ କରିନୁ କହିବା ପରେ ଚାଲିଗଲେ। ୧୨ ତାରିଖରେ ଆସି ଘର ଭିତରେ ଅଢ଼େଇ ଘଣ୍ଟା ରହିଲେ। ମୋର ପ୍ୟାଣ୍ଟ, ଶାର୍ଟ, ତକିଆ, ଚଡି, ବେଡ୍, ବେଡଶିଟ୍ ଓ ନାନୀର ଗାମୁଛା ନେଇଗଲେ। କହିଲେ ମୋବାଇଲ ପାସ୍ୱାର୍ଡ ଖୋଲିଯାଇଛି। ତୁମକୁ ଶୀଘ୍ର ଫେରାଇ ଦିଆଯିବ। ତେବେ ମୋବାଇଲ ଫେରାଉ ନାହାନ୍ତି। ମୁଁ ଯଦି ଦୋଷୀ ମୋତେ ଗିରଫ କରାଯାଉ। ହେଲେ ସତ୍ୟ ଥାଇ ଏସ୍ଆଇଟି ପଦକ୍ଷେପ ନେଉ। ମୋତେ ପୂର୍ବପରି ଆଉ ଭୟଭୀତ ନ କରୁ। ମୋ ପାଠପଢ଼ା ଉପରେ ଏହାର ପ୍ରଭାବ ପଡୁଛି।’ ସରୋଜଙ୍କ ଏଭଳି ଅଭିଯୋଗରେ କେତେ ସତ୍ୟତା ରହିଛି ତାହା ତଦନ୍ତସାପେକ୍ଷ। ଅନ୍ୟପକ୍ଷରେ ଏହାକୁ ନେଇ ଚର୍ଚ୍ଚା ହେଉଛି ଯେ, ବିରୋଧୀଙ୍କ ମୁହଁ ବନ୍ଦ କରିବା ପାଇଁ ତୁରନ୍ତ ପରୀ ହତ୍ୟାକାଣ୍ଡ ଫାଇଲ୍ କ୍ଲୋଜ କରିବାକୁ ଉଦ୍ୟମ କରାଯାଉଛି।
ଅନ୍ୟପକ୍ଷରେ ଅଭିଯୋଗକୁ ଖଣ୍ଡନ କରିଛନ୍ତି ଏସ୍ଆଇଟି ମୁଖ୍ୟ ଅରୁଣ ବୋଥ୍ରା। ସେ କହିଛନ୍ତି ଯେ, ତଦନ୍ତ ସମୟରେ ସରୋଜଙ୍କ ଉପରେ ବହୁ ସନ୍ଦେହ ସୃଷ୍ଟି ହୋଇଛି। ପଚରାଉଚରା ବେଳେ ସେ ସହଯୋଗ କରୁ ନ ଥିବାବେଳେ ନିଜର ମୋବାଇଲ ପାସ୍ଓ୍ବାର୍ଡ ଜାଣି ନ ଥିବା କହୁଛନ୍ତି। ୫ ଲକ୍ଷ ଟଙ୍କା ଲୋଭ ଦେଖାଇବା କଥା ମନଗଢ଼ା। ଏଥିରୁ ତାଙ୍କ ଉପରେ ସନ୍ଦେହ ଅଧିକ ବଢ଼ୁଛି। ଆମେ ଆଇନ ଅନୁଯାୟୀ ତଦନ୍ତ ଚଳାଇଛୁ, ଯେଭଳି ପରୀର ପରିବାରକୁ ନ୍ୟାୟ ମିଳିପାରିବ ବୋଲି ବୋଥ୍ରା କହିଛନ୍ତି।
