ଭୁବନେଶ୍ୱର,୨୬।୩(ବ୍ୟୁରୋ): ରାଜଧାନୀ ଭୁବନେଶ୍ୱରରେ ସହରୀ ଉଚ୍ଚଶିକ୍ଷିତ ଭୋଟର ରହୁଛନ୍ତି। ଅଧିକାଂଶ ଦେଶ ବିଦେଶର କଥା ଉପରେ ଟିପ୍ପଣୀ ଦେବା ସହିତ ରାଜନୀତିକୁ ନେଇ ବହୁ ଆଲୋଚନା ସମାଲୋଚନା କରୁଥିବାର ଦେଖାଯାଇଥାଏ। ତେଣୁ ଗଣତନ୍ତ୍ରର ମହାପର୍ବ ଭୋଟଦାନରେ ସେମାନେ ନିଶ୍ଚିତ ପକ୍ଷେ ନିଜର ମତ ସାବ୍ୟସ୍ତ କରିବା ସହ ଯୋଗ୍ୟ ପ୍ରତିନିଧିଙ୍କୁ ବାଛିବେ ବୋଲି ସମସ୍ତଙ୍କ ଧାରଣା ଥାଏ। ମାତ୍ର ଏହି ପାଠୁଆ ଉଚ୍ଚଶିକ୍ଷିତ ତଥାକଥିତ ବ୍ୟକ୍ତିବିଶେଷମାନେ ଭୋଟଦାନ ଭଳି ମହତ୍ୱପୂର୍ଣ୍ଣ କାର୍ଯ୍ୟକୁ ଅଯଥା ବା ସମୟର ବରବାଦ ଛଡ଼ା ଅନ୍ୟ କିଛି ଭାବୁନାହାନ୍ତି। ଯେଉଁ କାରଣରୁ ମତଦାନ ଅଧିକାର ସାବ୍ୟସ୍ତ କରିବା ସମୟରେ ଏମାନଙ୍କୁ ଦେଖିବାକୁ ମିଳି ନ ଥାଏ। ଫଳରେ ପ୍ରତି ନିର୍ବାଚନରେ ଭୁବନେଶ୍ୱରରେ ମତଦାନ ହାର ସବୁଠାରୁ କମ୍ ରହୁଛି। ମହାନଗର ନିର୍ବାଚନ ହେଉ ଅବା ସାଧାରଣ ନିର୍ବାଚନ ରାଜ୍ୟର ଅନ୍ୟ ଅଞ୍ଚଳ ତୁଳନାରେ ସବୁଥିରେ ପଛରେ ରହୁଛନ୍ତି ରାଜଧାନୀବାସୀ। ଏଠାରେ ମତଦାନ ହାର ୫୦ ପ୍ରତିଶତ ଟପିପାରୁନାହିଁ।
ଦୀର୍ଘ ୭ ବର୍ଷ ପରେ ବିଏମ୍ସି ନିର୍ବାଚନ ହୋଇଥିବାରୁ ରାଜଧାନୀବାସୀଙ୍କ ମଧ୍ୟରେ ଉତ୍କଣ୍ଠା ଦେଖାଦେଇଥିଲା। ସହରର ପ୍ରତିନିଧିମାନଙ୍କୁ ବାଛିବା ପାଇଁ ଶିକ୍ଷିତ ତଥା ସଚେତନ ଭୋଟର ଆଗେଇ ଆସିବେ ବୋଲି ଆଶା ଥିଲା। ମାତ୍ର ଏଥର ମଧ୍ୟ ସବୁଥର ଭଳି ନିରାଶ ହେବାକୁ ପଡିଛି। ମାତ୍ର ୪୩.୩୦ ପ୍ରତିଶତ ଭୋଟର ନିଜ ମତଦାନ କରିଛନ୍ତି। ସହରରେ ମୋଟ ୭ଲକ୍ଷ ୨୫ ହଜାର ୭୬୫ ଭୋଟର ରହିଛନ୍ତି। ସେମାନଙ୍କ ମଧ୍ୟରୁ ୩ଲକ୍ଷ ୯୪ହଜାର ୫୧୦ଜଣ ପୁରୁଷ ଥିବାବେଳେ ୩ଲକ୍ଷ ୩୦ହଜାର ୮୧୫ଜଣ ମହିଳା ଏବଂ ୪୪୦ଜଣ ଅନ୍ୟାନ୍ୟ ବର୍ଗର ଭୋଟର ରହିଛନ୍ତି। ତେବେ ମାତ୍ର ୩ଲକ୍ଷ ୧୪ହଜାର ୨୬୮ ଜଣ ଭୋଟର ମତଦାନ ସାବ୍ୟସ୍ତ କରିଛନ୍ତି। ସେମାନଙ୍କ ମଧ୍ୟରେ ୧ଲକ୍ଷ ୭୦ହଜାର ୧୩୭ ପୁରୁଷ ଥିବାବେଳେ ୧ଲକ୍ଷ ୪୪ହଜାର ୭୯ଜଣ ମହିଳା ଏବଂ ୫୨ଜଣ ତୃତୀୟ ଲିଙ୍ଗୀ ରହିଛନ୍ତି। ଏହା କେବଳ ଚଳିତ ବର୍ଷର ଘଟଣା ନୁହେଁ, ୨୦୧୪ ପୌର ନିର୍ବାଚନରେ ଭୁବନେଶ୍ବରରେ ମତଦାନ ହାର ୪୩.୩୦% ଥିବାବେଳେ ୨୦୦୮ରେ ଏହା ୩୮.୨୯% ଏବଂ ୨୦୦୩ରେ ୪୮.୮% ରହିଥିଲା। ୨୦୧୯ ସାଧାରଣ ନିର୍ବାଚନରେ ମଧ୍ୟ ଭୁବନେଶ୍ବରରେ ମତଦାନ ହାର ମାତ୍ର ୪୫% ରହିଥିଲା। ସେଥିମଧ୍ୟରୁ ଅଧିକାଂଶ ଭୋଟର ବସ୍ତି ଅଞ୍ଚଳର ଥିଲେ। ରାଜଧାନୀର ବିଭିନ୍ନ ବସ୍ତି ଅଞ୍ଚଳରେ ପ୍ରାୟ ଅଢେଇ ଲକ୍ଷ ଭୋଟର ରହୁଥିବାରୁ ରାଜନେତାମାନେ ସେହି ଅଞ୍ଚଳକୁ ଅଧିକ ଫୋକସ୍ କରୁଛନ୍ତି। ଗୋଟେପଟେ ବସ୍ତି ଭୋଟ୍କୁ ହାତେଇବା ପାଇଁ ବିଭିନ୍ନ ସରକାରୀ ଯୋଜନା ପ୍ରଣୟନ କରାଯାଉଛି। ଅନ୍ୟପଟେ ସହରରେ ରହୁଥିବା ବଡ଼ବଡ଼ିଆ ଓ ମଧ୍ୟବିତ୍ତ ଶ୍ରେଣୀର ଲୋକଙ୍କ ପାଇଁ ସରକାରଙ୍କ ପକ୍ଷରୁ ସେପରି କିଛି ଯୋଜନା କରାଯାଉନାହିଁ ବା ଏମାନେ ସରକାରୀ ଯୋଜନା ଉପରେ ନିର୍ଭରଶୀଳ ନୁହନ୍ତି। ତେଣୁ ନିର୍ବାଚନ କିଏ ଜିତିଲା ନ ଜିତିଲା ସେଥିରେ ସେମାନଙ୍କର କୌଣସି ଫରକ ପଡୁନାହିଁ ବୋଲି ଭାବୁଛନ୍ତି। ମତଦାନ ପ୍ରତି ଲୋକଙ୍କ ଆଗ୍ରହ ବଢାଇବା ପାଇଁ ସମ୍ପୃକ୍ତ ଦିନକୁ ସରକାରୀ ଛୁଟି ରୂପେ ଘୋଷଣା କରାଯାଉଛି। ମାତ୍ର ଏହା ସତ୍ତ୍ୱେ ଅଧିକାଂଶ ଲୋକ ଭୋଟ୍ ଦେବାକୁ ନ ଯାଇ ବରଂ ଖାଇପିଇ ଛୁଟି ପାଳନ କରିବାକୁ ପସନ୍ଦ କରୁଛନ୍ତି। ଫଳରେ ଗତ ଦୁଇ ଦଶନ୍ଧି ଧରି ଭୁବନେଶ୍ବରରେ ମତଦାନ ହାର ରାଜ୍ୟର ଅନ୍ୟ ଅଞ୍ଚଳ ତୁଳନାରେ କମ ରହୁଛି।