ଚେନ୍ନାଇ,୨୧ା୪: ଏଡାପ୍ପାଡି କେ. ପାଲାନିସ୍ବାମୀ (ଇପିଏସ୍)ଙ୍କୁ ଏଆଇଏଡିଏମ୍କେର ସାଧାରଣ ସମ୍ପାଦକ ଭାବେ ଭାରତର ନିର୍ବାଚନ କମିଶନ (ଇସି) ଗୁରୁବାର ସ୍ବୀକୃତି ପ୍ରଦାନ କରିବା ସହ ତାଙ୍କ ଦଳକୁ ଦ୍ୱିପତ୍ର ନିର୍ବାଚନୀ ଚିହ୍ନ ପ୍ରଦାନ କରିଛନ୍ତି। ଏଥିସହିତ ଦଳ ନିୟମାବଳୀରେ ସଂଶୋଧନ କରାଯିବା ସହ ପଦାଧିକାରୀମାନଙ୍କୁ ପରିବର୍ତ୍ତନ କରାଯାଇଛି। ଇପିଏସ୍ ମାର୍ଚ୍ଚ ୨୮ ଓ ଏପ୍ରିଲ ୧୩ରେ ନିର୍ବାଚନ କମିଶନଙ୍କୁ ପତ୍ର ଲେଖି ସେ ସାଧାରଣ ସମ୍ପାଦକ ଭାବେ ନିର୍ବାଚିତ ହେବା ସହ ଦଳ ବାଇ ଲ’ରେ ହୋଇଥିବା ପରିବର୍ତ୍ତନ ସମ୍ପର୍କରେ ଜଣାଇଥିଲେ। ଏଥିସହିତ ମାର୍ଚ୍ଚ ୨୮ର ମାଡ୍ରାସ୍ ହାଇକୋର୍ଟ ରାୟ, ଏପ୍ରିଲ ୧୨ର ଦିଲ୍ଲୀ ହାଇକୋର୍ଟ ରାୟ ଏବଂ ଫେବୃୟାରୀ ୨୩ର ସୁପ୍ରିମକୋର୍ଟଙ୍କ ରାୟ ସମ୍ପର୍କରେ ପାଲାନିସ୍ବାମୀ ଇସିଙ୍କୁ ଅବଗତ କରାଇଥିଲେ। ଏଆଇଏଡିଏମ୍କେ ଦେଇଥିବା ପ୍ରାର୍ଥୀଙ୍କୁ ଦ୍ୱିପତ୍ର ନିର୍ବାଚନୀ ଚିହ୍ନ ମଞ୍ଜୁର କରିବାକୁ ନିର୍ବାଚନ କମିଶନ କର୍ନାଟକର ମୁଖ୍ୟ ନିର୍ବାଚନ ଅଧିକାରୀଙ୍କୁ ଜଣାଇଛନ୍ତି। ଫଳରେ ଓ. ପନିରସେଲ୍ଭାମ ଗୁରୁବାର ସକାଳେ ଯେଉଁମାନଙ୍କୁ ପ୍ରାର୍ଥୀ ଦେଇଛନ୍ତି, ସେମାନେ ସ୍ବାଧୀନ ପ୍ରାର୍ଥୀ ଭାବେ ନିର୍ବାଚନ ଲଢ଼ିବେ।
