ନୂଆଦିଲ୍ଲୀ, ୨୮।୪ : ଭାରତର ଜାତୀୟ ରାଜଧାନୀ ଦିଲ୍ଲୀର ତାପମାତ୍ରା ଚଳିତ ସପ୍ତାହରେ ୪୦ ଡିଗ୍ରୀ ସେଲସିୟସ ଅତିକ୍ରମ କରିଛି। ପାଣିପାଗ ବିଭାଗ ପକ୍ଷରୁ ଏକ ଚେତାବନୀ ଜାରି ହୋଇଛି ଯେ ଚଳିତ ମାସର ଶେଷ ପର୍ଯ୍ୟନ୍ତ ଝାଞ୍ଜି ପବନ ଜାରି ରହିବ। ସେହିପରି ମେ’ ମାସ ଆରମ୍ଭରୁ ତାତି କମିବାର ସମ୍ଭାବନା ରହିଛି। ବୁଧବାର ସିରି ଫୋର୍ଟ କମ୍ପ୍ଲେକ୍ସରେ ଦିଲ୍ଲୀର ସର୍ବୋଚ୍ଚ ତାପମାତ୍ରା ୪୪.୨ ଡିଗ୍ରୀ ସେଲସିୟସରେ ରେକର୍ଡ କରାଯାଇଛି। ଦିଲ୍ଲୀ ପାଇଁ ଏକ ’ୟୋଲୋ ଆଲର୍ଟ’ ମଧ୍ୟ ଜାରି କରାଯାଇଛି।
ଆଇଏମଡି ବୈଜ୍ଞାନିକ ଆର.କେ ଜେନାମଣି ସୂଚନା ଦେଇଛନ୍ତି ଯେ ଏପ୍ରିଲ ୨୯ ରେ ଉତ୍ତର ଭାରତରେ ଧୂଳି ଝଡ଼ ସୃଷ୍ଟି ହେବାର ସମ୍ଭାବନା ରହିଛି। ଯାହା ଦ୍ୱାରା ମେ ୧ ରୁ ତାପମାତ୍ରା ହ୍ରାସ ପାଇବାର ପୂର୍ବାନୁମାନ କରାଯାଇଛି। ଆଇଏମଡି ଅନୁଯାୟୀ ପଞ୍ଜାବ, ହରିୟାଣା-ଚଣ୍ଡିଗଡ଼, ଦିଲ୍ଲୀ, ଉତ୍ତରପ୍ରଦେଶ, ରାଜସ୍ଥାନ, ମଧ୍ୟପ୍ରଦେଶ, ବିଦର୍ଭ, ଛତିଶଗଡ, ବିହାର, ଝାଡଖଣ୍ଡ, ଆଭ୍ୟନ୍ତରୀଣ ଗ୍ୟାଙ୍ଗେଟିକ ପଶ୍ଚିମବଙ୍ଗ, ଆଭ୍ୟନ୍ତରୀଣ ଓଡ଼ିଶା ଏବଂ ଗୁଜୁରାଟର ଉତ୍ତର ଭାଗରେ ଝାଞ୍ଜି ପବନ ଅସହ୍ୟ ହେବାର ସମ୍ଭାବନା ରହିଛି।
ସେହିପରି ସ୍କାଏମେଟ ପାଣିପାଗ କହିଛି ଯେ ଝାଞ୍ଜି କେବଳ ଦିଲ୍ଲୀରେ ସୀମିତ ରହିବ ନାହିଁ, ଏହା ଉତ୍ତର ଭାରତର ବାସିନ୍ଦାଙ୍କୁ ମଧ୍ୟ ପ୍ରଭାବିତ କରିବ। ସ୍କାଏମେଟ ପାଣିପାଗ ଟୁଇଟରରେ ଲେଖିଛି, ଚଳିତ ମାସ ଶେଷ ପର୍ଯ୍ୟନ୍ତ ହିଟୱଭ ଅବସ୍ଥା ଜାରି ରହିବ। ଉତ୍ତର ଭାରତର ବାସିନ୍ଦାଙ୍କୁ ଏହା ପ୍ରଭାବିତ କରିବ। ତଥାପି ମେ’ ମାସ ଆରମ୍ଭରୁ ସ୍ଥିତିରେ କେତେକ ପରିବର୍ତ୍ତନ ହୋଇପାରେ।
ଗରମ ଝାଞ୍ଜି ପବନ ଅବସ୍ଥା ମାସର ଶେଷ ପର୍ଯ୍ୟନ୍ତ ରହିବ। ପାଣିପାଗ ବିଭାଗ ପୂର୍ବାନୁମାନ କରିଛି, ତାପମାତ୍ରା ୪୩ ଡିଗ୍ରୀ ସେଲସିୟସରୁ ଅଧିକ ରହିବ ବୋଲି ଆଶା କରାଯାଉଛି। ରାଜସ୍ଥାନରେ ତାପମାତ୍ରା ସର୍ବାଧିକ ୪୫ ଡିଗ୍ରୀ ସେଲସିୟସ ମଧ୍ୟ ଛୁଇଁବାର ସମ୍ଭାବନା ରହିଛି। ପଞ୍ଜାବ, ହରିୟାଣା, ଦିଲ୍ଲୀ, ରାଜସ୍ଥାନ ଏବଂ ଉତ୍ତରପ୍ରଦେଶରେ ତାତି ଏପ୍ରିଲ ୨୮ ରୁ ମାସ ଶେଷ ପର୍ଯ୍ୟନ୍ତ ଜାରି ରହିବ।
ସେହିପରି ଚଣ୍ଡିଗଡ଼ର ପାଣିପାଗ କେନ୍ଦ୍ରର ନିର୍ଦ୍ଦେଶକ ମନମୋହନ ସିଂ କହିଛନ୍ତି ଯେ ତାପମାତ୍ରା ସ୍ବାଭାବିକଠାରୁ ଅଧିକ ଉତ୍ତପ୍ତ ରହିବ। ପଞ୍ଜାବ ଏବଂ ହରିୟାଣାର କିଛି ସ୍ଥାନରେ ଝାଞ୍ଜି ଚେତାବନୀ ଦିଆଯିବା ସହ ଆଗାମୀ ଦିନରେ ତାପମାତ୍ରା ବୃଦ୍ଧି ପାଇବ ବୋଲି ସେ କହିଛନ୍ତି।
ଉଲ୍ଲେଖଯୋଗ୍ୟ, ଉତ୍ତର-ପଶ୍ଚିମ ଭାରତ ଚଳିତ ବର୍ଷ ୧୨୨ ବର୍ଷ ମଧ୍ୟରେ ସବୁଠାରୁ ତାତି ମାର୍ଚ୍ଚ ରେକର୍ଡ କରିଥିଲା। ଯେଉଁଠାରେ ହାରାହାରି ସର୍ବାଧିକ ତାପମାତ୍ରା ୨୦୦୪ ରେ ୩୦.୬୭ ଡିଗ୍ରୀ ସେଲସିୟସ ରେକର୍ଡକୁ ଅତିକ୍ରମ କରିଥିଲା।
