ଚଳିତ ବର୍ଷ ରାବଣ ଦହନକୁ ନେଇ ସାରା ଦେଶରେ ଲୋକେ ଉତ୍ସାହର ସହ ଅପେକ୍ଷା ରଖିଛନ୍ତି । ହେଲେ ମଧ୍ୟ ପ୍ରଦେଶର ମନ୍ଦସୋର ଜିଲାରେ ଲୋକେ ରାବଣକୁ ଦହନ କରିବା ପରିବର୍ତ୍ତେ ସାରା ବର୍ଷ ରାବଣ ମୂର୍ତ୍ତିର ପୂଜା କରିଥାଆନ୍ତି ।
ମନ୍ଦସୋର ଜିଲାର ଖାନପୁରା ଅଞ୍ଚଳରେ ରୁଣ୍ଡିରେ ରାବଣଙ୍କ ଦଶମୁଣ୍ଡବାଲା ପ୍ରତିମା ସ୍ଥାପନ କରାଯାଇଛି । ଏହି ଗାଁକୁ ରାବଣଙ୍କ ଶ୍ୱଶୁର ଘର ବୋଲି କୁହାଯାଇଥାଏ । ଲୋକକଥା ଅନୁଯାୟୀ, ମନ୍ଦୋଦରୀ ଏହିଠାରେ ରହୁଥିଲେ । ପୂର୍ବରୁ ଏହି ଗାଁ ଦଶପୁର ନାମରେ ପରିଚିତ ଥିଲା । ତେବେ ରାବଣଙ୍କର ଏହା ଶ୍ୱଶୁର ଘର ବୋଲି କୌଣସି ପୌରାଣିକ ପ୍ରମାଣ ନ ଥିଲେ ମଧ୍ୟ ଗାଁର ନାମ ମନ୍ଦସୋର ହୋଇଥିବାରୁ ବରିଷ୍ଠ ନାଗରିକମାନେ ଏହାକୁ ମନ୍ଦୋଦରୀଙ୍କ ନାମ ସହ ଯୋଡି ଏହାକୁ ରାବଣଙ୍କ ଶ୍ୱଶୁର ଘର ବୋଲି କହିଥାଆନ୍ତି ଓ ରାବଣ ଏହି ଗାଁର ଜ୍ୱାଇଁ ବୋଲିଇ ଲୋକେ ମାନନ୍ତି ।
ରାବଣ ଏହି ଗାଁର ଜ୍ୱାଇଁ ହୋଇଥିବାରୁ କୌଣସି ମହିଳା ବିନା ଓଢଣାରେ ରାମଣଙ୍କ ମୂର୍ତ୍ତି ସାମ୍ନାକୁ ଯାଇ ନ ଥାଆନ୍ତି । ଆହୁରି ମଧ୍ୟ ଲୋକେ ବିଶ୍ୱାସ କରନ୍ତି ଯେ ରାବଣଙ୍କ ମୂର୍ତ୍ତିର ଗୋଡରେ କଳା ସୂତା ବିନ୍ଧିଲେ କୌଣସି ରୋଗବ୍ୟାଧି ହୋଇ ନ ଥାଏ । ଏମିତିକି ଦଶହରା ଦିନ ଲୋକେ ଏଠାରେ ରାବଣଙ୍କ ଗୋଡରେ କଳା ସୂତା ବାନ୍ଧିଥାଆନ୍ତି ।
