ନେଲ୍ଲୋର,୨୯ା୧୨: ଆନ୍ଧ୍ର ପ୍ରଦେଶର କନ୍ଦୁକୁରରେ ପୂର୍ବତନ ମୁଖ୍ୟମନ୍ତ୍ରୀ ଏନ୍. ଚନ୍ଦ୍ରାବାବୁ ନାଇଡ଼ୁଙ୍କ ରୋଡ୍ ଶୋ’ ବେଳେ ଦଳାଚକଟା ହୋଇଛି। ବହୁ ଲୋକ ଏକ ଡ୍ରେନ୍କୁ ଖସିପଡ଼ିଥିବାବେଳେ ସେମାନଙ୍କ ମଧ୍ୟରୁ ୮ ଜଣଙ୍କ ମୃତ୍ୟୁ ଘଟିଛି। ମୃତକଙ୍କ ମଧ୍ୟରେ ଜଣେ ମହିଳା ଥିବା ଜଣାପଡ଼ିଛି।
୨୦୨୪ ବିଧାନସଭା ନିର୍ବାଚନକୁ ଦୃଷ୍ଟିରେ ରଖି ଆନ୍ଧ୍ର ବିଧାନସଭାର ବିରୋଧୀ ଦଳ ନେତା ତଥା ତେଲୁଗୁ ଦେଶମ୍ ପାର୍ଟି (ଟିଡିପି) ମୁଖ୍ୟ ଚନ୍ଦ୍ରାବାବୁ ନାଇଡ଼ୁ ରାଜ୍ୟବ୍ୟାପୀ ‘ଇଦେମି ଖର୍ମା ମାନା ରାଷ୍ଟ୍ରନିକି’ (ଆମ ରାଜ୍ୟର ଭାଗ୍ୟ କାହିଁକି ଏପରି ହୋଇଛି) ଅଭିଯାନ ଚଳାଇଛନ୍ତି। ଏହି କ୍ରମରେ ସେ ବୁଧବାର ରାତିରେ ନେଲ୍ଲୋର ଜିଲା କନ୍ଦୁକୁର ସହରରେ ଏକ ସଭାକୁ ସମ୍ବୋଧନ କରିବା କାର୍ଯ୍ୟକ୍ରମ ଥିଲା। ଚନ୍ଦ୍ରବାବୁଙ୍କ ଗାଡ଼ି ସମ୍ପୃକ୍ତ ଅଞ୍ଚଳରେ ପହଞ୍ଚତ୍ବାବେଳକୁ ତାଙ୍କୁ ଦେଖିବା ପାଇଁ ବହୁ ସମର୍ଥକଙ୍କ ଭିଡ଼ ଜମିଥିଲା। ଦଳାଚକଟା ସ୍ଥିତି ଉପୁଜିବାରୁ ରୁଣ୍ଡ ହୋଇଥିବା ବହୁ ଲୋକ ନିକଟସ୍ଥ ଏକ ଖୋଲା ଡ୍ରେନେଜ୍ କେନାଲକୁ ଖସିପଡ଼ିଥିଲେ।
ଘଟଣାସ୍ଥଳରେ ସେମାନଙ୍କ ମଧ୍ୟରୁ ୮ ଜଣଙ୍କ ମୃତ୍ୟୁ ଘଟିଛି। ଆହୁରି କେତେଜଣ ଆହତଙ୍କୁ ଏକ ସ୍ଥାନୀୟ ହସ୍ପିଟାଲରେ ଭର୍ତ୍ତି କରାଯାଇଥିବା ଅଧିକାରୀମାନେ ସୂଚନା ଦେଇଛନ୍ତି। ଅନ୍ୟପକ୍ଷେ ଚନ୍ଦ୍ରାବାବୁ ତତ୍କାଳ ସଭା ବାତିଲ କରିବା ସହ ମୃତକଙ୍କ ପରିବାରକୁ ୧୦ ଲକ୍ଷ ଟଙ୍କା ଲେଖାଏ ଅନୁକମ୍ପାମୂଳକ ସହାୟତା ରାଶି ଦେବାକୁ ଘୋଷଣା କରିଛନ୍ତି। ମୃତକଙ୍କ ପିଲାଙ୍କ ଶିକ୍ଷା ପାଇଁ ଆର୍ଥିକ ସହାୟତା ମଧ୍ୟ ପ୍ରଦାନ ପାଇଁ ସେ ପ୍ରତିଶ୍ରୁତି ଦେଇଛନ୍ତି। ଏଥିସହ ଆହତମାନଙ୍କ ଉନ୍ନତ ଚିକିତ୍ସା ସୁନିଶ୍ଚିତ କରିବାକୁ ଟିଡିପି ନେତାମାନଙ୍କୁ ସେ ନିର୍ଦ୍ଦେଶ ଦେଇଛନ୍ତି।
ପ୍ରକାଶ ଯେ, ୨୦୧୯ ବିଧାନସଭା ନିର୍ବାଚନରେ ଓ୍ବାଇଏସ୍ଆର୍ କଂଗ୍ରେସ ପାର୍ଟି ମୁଖ୍ୟ ଜଗନ୍ମୋହନ ରେଡ୍ଡୀ ବିଜୟୀ ହୋଇ ମୁଖ୍ୟମନ୍ତ୍ରୀ ଆସନ ଅଳଙ୍କୃତ କରିଛନ୍ତି। ଏହି ନିର୍ବାଚନରେ ଟିଡିପିକୁ ଶୋଚନୀୟ ପରାଜୟବରଣ କରିବାକୁ ପଡ଼ିଥିଲା। ତେବେ ଟିଡିପିର ବାର୍ଷିକ ସମାବର୍ତ୍ତନ କାର୍ଯ୍ୟକ୍ରମକୁ ବିପୁଳ ଜନ ସମର୍ଥନ ମିଳିବାରେ ଲାଗିଛି। ଆସନ୍ତା ଜାନୁୟାରୀରେ ତାଙ୍କ ପୁଅ ନର ଲୋକେଶ ନାଇଡ଼ୁ ୪,୦୦୦ କି.ମି. ପଦଯାତ୍ରା ଆରମ୍ଭ କରିବେ। ‘ଯୁବ ଗଲମ୍’ ନାମରେ ଆୟୋଜିତ ହେବାକୁ ଥିବା ଏହି କାର୍ଯ୍ୟକ୍ରମରେ ଯୁବପିଢ଼ିଙ୍କୁ ସାମିଲ କରି ସେମାନଙ୍କୁ ସ୍ବର ଉତ୍ତୋଳନ କରିବାକୁ ସୁଯୋଗ ଦିଆଯିବ। ‘ଜଗନ୍ ହଟାଅ, ଆନ୍ଧ୍ର ପ୍ରଦେଶକୁ ରକ୍ଷା କର’ ସ୍ଲୋଗାନ ଦେଇ ଚନ୍ଦ୍ରାବାବୁ ୨୦୨୪ ନିର୍ବାଚନ ଲଢ଼ିବେ। ଏହା ତାଙ୍କ ଶେଷ ନିର୍ବାଚନ ହେବ ବୋଲି ସେ ପୂର୍ବରୁ ସ୍ପଷ୍ଟ କରିସାରିଛନ୍ତି।
