ପଣଜୀ,୧୪ା୮: ୧୯୯୪ରେ ମହାନନ୍ଦ ନାଏକଙ୍କୁ ୨୫ ବର୍ଷ ହୋଇଥିଲା। ଗୋଆ ରାଜଧାନୀ ପଣଜୀରୁ ୪୦ କି.ମି. ଦୂର ଶିରୋଡାରେ ସେ ଅଟୋ ଚଳାଉଥିଲେ। ମହାନନ୍ଦଙ୍କ ଘର ଅପରପାର୍ଶ୍ୱରେ ଦର୍ଶନା ନାଏକ(୨୧) ଏକୁଟିଆ ରହୁଥିଲେ। ସେହିବର୍ଷ ସେପ୍ଟେମ୍ବର ୩୦ରେ ଦର୍ଶନାଙ୍କ ଝୁଲନ୍ତା ମୃତଦେହ ଗୋଆ ମେଡିକାଲ କଲେଜ ହସ୍ପିଟାଲ ନିକଟ ବାମ୍ବୋଲିମ୍ର ଏକ କାଜୁ ଗଛରୁ ମିଳିଥିଲା। ଦର୍ଶନାଙ୍କ ବେକରେ ତାଙ୍କ ଦୁପଟ୍ଟା ବା ଓଢ଼ଣି ଭିଡ଼ାଯାଇଥିଲା। ଦର୍ଶନାଙ୍କ ପରିବାର ଗରିବ ହୋଇଥିବାରୁ ତାଙ୍କ ହତ୍ୟାର ତଦନ୍ତ ଆରମ୍ଭ ହେବା ପୂର୍ବରୁ ଶେଷ ହୋଇଯାଇଥିଲା। ଭାଗ୍ୟ ପୁଣି ମହାନନ୍ଦଙ୍କ ସପକ୍ଷରେ ଯାଇଥିଲା। ହତ୍ୟାର ଧାରା ଜାରି ରହିଥିଲା।
ହତ୍ୟାକାଣ୍ଡର ୨ ମାସ ପୂର୍ବରୁ ପଣଜୀରୁ ୨୮ କି.ମି. ଦୂର ଖାଣ୍ଡେପରରେ ମହାନନ୍ଦଙ୍କ ପ୍ରଥମ ଶିକାର ହୋଇଥିଲେ ୩୦ ବର୍ଷୀୟା ଗୁଲାବୀ ଗାଓଁକର। ଗୁଲାବୀ ପୋଣ୍ଡା ବଜାରରେ ଦରଜି କାମ କରୁଥିଲେ, ଯାହା ନିକଟରେ ମହାନନ୍ଦଙ୍କ ଅଟୋ ଷ୍ଟାଣ୍ଡ ରହିଥିଲା। ହତ୍ୟାର ଦିନକ ପରେ ଗୁଲାବୀଙ୍କ ଗଳିତ ମୃତଦେହ ମିଳିଥିଲା। ଜଣେ ଦାଢ଼ି ରଖିଥିବା ବ୍ୟକ୍ତି ତାଙ୍କୁ ନିୟମିତ ଭେଟୁଥିବା କଥା ପୋଲିସକୁ ଜଣେ ପ୍ରତ୍ୟକ୍ଷଦର୍ଶୀ କହିଥିଲେ। ଦାଢ଼ିଧାରୀ ମହାନନ୍ଦଙ୍କୁ ପୋଲିସ ଗିରଫ କରି ହାଜତକୁ ନେଇଥିଲା। କିନ୍ତୁ ସେ ହତ୍ୟା ଦିନ ଷ୍ଟାଣ୍ଡରେ ଥିଲେ ବୋଲି ଅନ୍ୟ ଡ୍ରାଇଭରମାନେ କହିବା ପରେ ମହାନନ୍ଦଙ୍କୁ ପୋଲିସ ଛାଡ଼ି ଦେଇଥିଲା। ଗୁଲାବୀଙ୍କୁ ହତ୍ୟା ପରେ ମୁକୁଳିଆସି ସେ ସାହସ ପାଇଥିଲେ ପରବର୍ତ୍ତୀ ୧୫ ବର୍ଷରେ ଆଉ ୧୫ ଜଣଙ୍କୁ ଜୀବନରେ ମାରିଦେବା ପାଇଁ।
ସବୁବେଳେ ଯୌନସୁଖ ଓ ଟଙ୍କା ଚାହୁଁଥିଲେ। ଏହି କାମାସକ୍ତ ଓ ଅର୍ଥଲୋଭୀ ଯୁବକ ଗୁଲାବୀଙ୍କ ଭଳି ଯୁବତୀଙ୍କୁ ମିଠା କଥା କହି କିପରି ଫସାଇହେବ ତାହା ଭଲଭାବେ ଜାଣିଥିଲେ। ନିଜ ପାରିପାର୍ଶ୍ୱ ବସ୍ଷ୍ଟାଣ୍ଡ, ମାର୍କେଟ, ଇଣ୍ଡଷ୍ଟ୍ରିଆଲ୍ ଇଷ୍ଟେଟ୍ ଭଳି ସ୍ଥାନଗୁଡ଼ିକରେ ସେ ଗୁଲାବୀଙ୍କ ଭଳି ୨୦-୩୫ ବର୍ଷୀୟାମାନଙ୍କୁ ଖୋଜି ବୁଲୁଥିଲେ। ତାଙ୍କ ତୃତୀୟ ହତ୍ୟାର ଶିକାର ହୋଇଥିଲେ ୧୯ ବର୍ଷୀୟା ବାସନ୍ତୀ ଗୌଡ଼େ। ପୋଣ୍ଡାର ବାସନ୍ତୀ ଜଣେ ଗରିବ ଚାକରାଣୀ ଥିଲେ। ପର ଘରେ କାମ କରି ଦୁଇପଇସା ରୋଜଗାର କରୁଥିଲେ। ମହାନନ୍ଦ ତାଙ୍କୁ ୫୦,୦୦୦ ଟଙ୍କା ଦେବାକୁ ପ୍ରତିଶ୍ରୁତି ଦେଇଥିଲେ। ୧୯୯୫ ସେପ୍ଟେମ୍ବର ୧୧ରେ ବାସନ୍ତୀଙ୍କୁ ସେ ଶାନ୍ତିନଗରସ୍ଥିତ ଏକ ନିଛାଟିଆ ସ୍ଥାନକୁ ନେଇଥିଲେ। ଏହା ପରଠୁ ବାସନ୍ତୀଙ୍କୁ ଆଉ ଦେଖାଯାଇ ନ ଥିଲା। ଏପରି କି ତାଙ୍କ ମୃତଦେହ ମଧ୍ୟ ଠାବ ହୋଇପାରି ନ ଥିଲା।
ଏପ୍ରିଲ ୨୧ରେ ପୁଣି ଗିରଫ ହେବା ପରେ ମହାନନ୍ଦ ହତ୍ୟା ପଛର କାରଣ ପୋଲିସକୁ ଜଣାଇଥିଲେ। ଜଣେ ବ୍ୟବସାୟୀର ପରିଚୟ ଦେଇ ସେ ଯୁବତୀଙ୍କୁ ଫସାଉଥିଲେ। ପ୍ରତି ଥର ନିଜ ନାମ ବଦଳାଇ କହୁଥିଲେ। ଯେପରି କି ଗୁଲାବୀଙ୍କ ସହ କଥା ହେବାବେଳେ ନିଜକୁ ଗୋବିନ୍ଦ ବୋଲି କହିଥିଲେ। ୨୦୦୯ରେ ତାଙ୍କ ଶେଷ ଶିକାର ହୋଇଥିବା ଯୋଗିତାଙ୍କୁ ମହାନନ୍ଦ ନିଜ ନାମ ଯୋଗେଶ ବୋଲି କହିଥିଲେ। ଯେଉଁ ଯୁବତୀ ତାଙ୍କ ଜାଲରେ ଫସୁଥିଲେ, ତାଙ୍କୁ ସେ କହୁଥିଲେ, ତୁମେ ମୋ ବାପାଙ୍କ ପସନ୍ଦ। ତୁମେ ମୋ ସ୍ତ୍ରୀ ହେବ। ସେମାନଙ୍କ ଆଗରେ ମହାନନ୍ଦ ଗୋଟିଏ ସର୍ତ୍ତ ବାଢ଼ୁଥିଲେ, ମୋ ଭଉଣୀ ଓ ଆଣ୍ଟିଙ୍କ ସାମ୍ନାକୁ ଯିବା ପର୍ଯ୍ୟନ୍ତ ବିବାହ କରିବା ନେଇ କାହାକୁ କିଛି କହିବ ନାହିଁ। ଗଲାବେଳକୁ ସୁନା ଅଳଙ୍କାର ପିନ୍ଧିକି ଆସିବ। ଏହି ସର୍ତ୍ତରେ ଯିଏ ରାଜି ହେଉଥିଲେ ତାଙ୍କୁ ସେ ଲୁଟ୍ କରିବା ପରେ ତଣ୍ଟିରେ ଦୁପଟ୍ଟା ଭିଡ଼ି ଜୀବନରେ ମାରିଦେଉଥିଲେ। ଏଥିପାଇଁ ମହାନନ୍ଦ ‘ଦୁପଟ୍ଟା କିଲର’ ନାମରେ କୁଖ୍ୟାତ।
ଜେଲରେ ୧୪ ବର୍ଷ ବିତାଇସାରିଥିବା ମହାନନ୍ଦଙ୍କୁ ବର୍ତ୍ତମାନ ୫୪ ବର୍ଷ। ଯୋଗିତା ନାଏକଙ୍କ ମାମଲା ସାମ୍ନାକୁ ଆସିବା ପରେ ଲୋକେ ଶିରୋଡାସ୍ଥିତ ତାଙ୍କ ଘରେ ନିଅଁା ଲଗାଇଦେଇଥିଲେ। କେନ୍ଦ୍ର ସରକାରଙ୍କ ଅଧୀନରେ ଚାକିରି କରୁଥିବା ତାଙ୍କ ସ୍ତ୍ରୀଙ୍କୁ ଏକ ସୁରକ୍ଷିତ ସ୍ଥାନକୁ ପଠାଇ ଦିଆଯାଇଥିଲା। ଏହି ହତ୍ୟାକାରୀଙ୍କ କାହାଣୀକୁ ନେଇ ‘ମହାନନ୍ଦ: ମଣିଷ ନା ସଇତାନ’ ଶୀର୍ଷକ ନାଟକ ଦର୍ଶକ ମହଲରେ ଖୁବ୍ ଲୋକପ୍ରିୟ ହୋଇଛି। ୨ଟି ହତ୍ୟା ପାଇଁ ସେ ଦୋଷୀ ସାବ୍ୟସ୍ତ ହୋଇଥିବାବେଳେ ଅବଶିଷ୍ଟ ୧୪ ମାମଲା ବିଚାରାଧୀନ ରହିଛି।
