ମହାକାଳପଡ଼ା,୨ା୧୧(ପ୍ରତାପ ଚନ୍ଦ୍ର ସ୍ବାଇଁ)କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଅଧୀନରେ କେନାଲ ବନ୍ଧ ପାର୍ଶ୍ୱ ଖାଲୁଆ ଜମିକୁ ଛାଡ଼ି ଦେଲେ ଅନ୍ୟ ଢିପଜମି ଫାଟି ଅଁା କଲାଣି। ଅଣଜଳସେଚିତ ଜମିରେ ପାଣି ଅଭାବରୁ ଧାନଗଛ ଏବେ ଗର୍ଭ ଧାରଣ କରିଛି। ପାଣି ମୁନ୍ଦେ ପାଇଁ ଧାନଗଛରୁ ଥୋଡ ବାହାରିପାରୁନି ବୋଲି ଚାଷୀମାନେ କହିଛନ୍ତି।
ମିଳିଥିବା ସୂଚନା ଅନୁସାରେ, ବ୍ଲକରେ ୨୮ ହଜାର ହେକ୍ଟର ଜମି ରହିଛି। ସେଥିମଧ୍ୟରୁ ୭ ହଜାର ହେକ୍ଟର ଜମିରେ ଜଳସେଚନ ସୁବିଧା ରହିଛି। ହେଲେ କେନାଲ ଜଳସେଚନରେ ବାଧା ଉପୁଜିବାରୁ ଜମିର ଶେଷମୁଣ୍ଡରେ ପାଣି ପହଞ୍ଚତ୍ ପାରୁନି। ବ୍ଲକରେ ଦେଢ଼ଶହରୁ ଅଧିକ ଉଠାଜଳସେଚନ ପ୍ରକଳ୍ପ ଥିଲେ ମଧ୍ୟ ଶହେରୁ ଅଧିକ ପ୍ରକଳ୍ପ ଅଚଳ ହୋଇପଡ଼ିଛି। ଉଠାଜଳସେଚନ ଓ କେନାଲରେ ପାଣି ଆସୁନାହିଁ। ବିଭାଗୀୟ କର୍ମଚାରୀମାନଙ୍କ ଖାମଖିଆଲ ନୀତି ଯୋଗୁ ସ୍ଥାନୀୟ ଚାଷୀମାନଙ୍କୁ ଜଳସେଚନ ସୁବିଧା ମିଳୁନାହିଁ ବୋଲି ବ୍ଲକ ଅଧୀନ ରାଜଗଡ଼ ଗଁାର ଚାଷୀମାନେ ଅଭିଯୋଗ କରିଛନ୍ତି। ଅପରପକ୍ଷରେ ଏହି ଚାଷୀମାନଙ୍କ କହିବା କଥା ଆମେ ସଙ୍କରଜାତୀୟ ଧାନ ଫସଲ କରିଛୁ। ଟଙ୍କା ଧାର କରଜ ଓ ଋଣ କରି ଫସଲ କରିଥିଲେ ମଧ୍ୟ ପାଣି ଅଭାବ ଯୋଗୁଁ ଧାନ ଫସଲ ନଷ୍ଟ ହେଉଛି ବୋଲି ଚାଷୀ ମାନସ ରଞ୍ଜନ ଦାସ, ପ୍ରକାଶ ଚନ୍ଦ୍ର ବାରିକ ପ୍ରମୁଖ କହିଛନ୍ତି। ସେହିପରି ମହାକାଳପଡ଼ା ବ୍ଲକ ସମ୍ମୁଖ ଜମ୍ବୁ-ମାର୍ଶାଘାଇ ମୁଖ୍ୟ କେନାଲରେ ପାଣି ଆସୁନି। ଫଳରେ ତଳିଆ ଅଞ୍ଚଳରେ ଜଳସେଚନ ହୋଇପାରୁନି ବୋଲି କୁହାଯାଇଛି। ତେବେ ନଦୀକୂଳରେ ଜମିରେ ଜଳ ନାହିଁ। ଲୋକମାନେ ବାଧ୍ୟ ହୋଇ ସେଣା, ମଟରରେ ପାଣି ଉଠାଇ ଚାଷ କରୁଥିବା ଦେଖିବାକୁ ମିଳୁଛି। ତେବେ କେନାଲରେ ଉପର ମୁଣ୍ଡରୁ ଜଳ ଛାଡିବା ପାଇଁ ସ୍ଥାନୀୟ ଚାଷୀମାନେ କହିଛନ୍ତି। ସବୁ ଅଞ୍ଚଳର ଖାଲ ପାଟରେ ପାଣି ଶୁଖି ଗଲାଣି ବୋଲି ଦେଖିବାକୁ ମିଳୁଛି। ଏ ସଂକ୍ରାନ୍ତରେ କେନ୍ଦ୍ରାପଡ଼ା ଜଳସେଚନ ବିଭାଗ ଅଧୀକ୍ଷଣ ଯନ୍ତ୍ରୀ ଉମେଶ ଚନ୍ଦ୍ର ସେଠୀଙ୍କୁ ପଚାରିବାରେ ଉପର ମୁଣ୍ଡରୁ ଜଳ ଯୋଗାଣ ପର୍ଯ୍ୟାୟକ୍ରମେ ହେଉଛି। ତେବେ ସବୁ ଅଞ୍ଚଳରେ ପାଣିର ଆବଶ୍ୟକତା ରହିଛି। ଚାଷୀଙ୍କ ସ୍ବାର୍ଥ ଦୃଷ୍ଟିରୁ ବିଭାଗ ପକ୍ଷରୁ ପଦକ୍ଷେପ ଗ୍ରହଣ କରାଯିବ ବୋଲି ସେ କହିଛନ୍ତି।
