ଦୁବାଇ, ୧୩।୧୨: ସଂଯୁକ୍ତ ଆରବ ଏମିରେଟ୍ସର ଯୁବରାଜ ତଥା ଦୁବାଇର କ୍ରାଉନ ପ୍ରିନ୍ସ ଶେଖ ହାମଦାନ ବିନ ମହମ୍ମଦ ବିନ ରସିଦ ଅଲ ମାକତୁମ ଘୋଷଣା କରିଛନ୍ତି ଯେ ଦୁବାଇ ସରକାର ବିଶ୍ୱରେ ପ୍ରଥମ ‘ପେପରଲେସ୍’ସରକାର ହୋଇପାରିଛନ୍ତି। ଫଳରେ ଦୁବାଇ ପୃଥିବୀର ପ୍ରଥମ ‘ପେପରଲେସ୍’ ସରକାରର ମାନ୍ୟତା ହାସଲ କରିଛି। ଏହାଦ୍ୱାରା ୧.୩ ବିଲିୟନ ଦିରହମ (୩୫କୋଟି ଡଲାର) ଏବଂ କୋଟିଏ ୪୦ ଲକ୍ଷ ଶ୍ରମ ଘଣ୍ଟା ସଞ୍ଚୟ ହୋଇ ପାରିଛି। ଏହାଦ୍ୱାରା ଦୁବାଇ ସରକାରଙ୍କ ସମସ୍ତ ଆଭ୍ୟନ୍ତରୀଣ, ବାହ୍ୟ କାରବାର ଏବଂ ପ୍ରକ୍ରିୟା ବର୍ତ୍ତମାନ ୧୦୦ ପ୍ରତିଶତ ଡିଜିଟାଲ ହୋଇପାରିଛି। ଏକ ବ୍ୟାପକ ଡିଜିଟାଲ ସରକାରୀ ସେବା ପ୍ଲାଟଫର୍ମ ଦ୍ୱାରା ଏହା ପରିଚାଳିତ ହେଉଛି। ଫଳରେ ସରକାରୀ କାର୍ଯ୍ୟରେ କାଗଜର ବ୍ୟବହାରକୁ ବନ୍ଦ କରାଯାଇଛି।
ଶେଖ ହାମଦାନ ଏକ ବିବୃତ୍ତିରେ କହିଛନ୍ତି ଯେ ଏହି ଲକ୍ଷ୍ୟ ହାସଲ କରିବା ଦୁବାଇର ସମସ୍ତ କାର୍ଯ୍ୟକୁ ଡିଜିଟାଇଜେଶନ କରିବା ପାଇଁ ଏକ ନୂତନ ପର୍ଯ୍ୟାୟର ଆରମ୍ଭ ମାତ୍ର। ସରକାରଙ୍କ ‘ପେପରଲେସ୍’ ନୀତି ପାଞ୍ଚଟି ପର୍ଯ୍ୟାୟରେ କାର୍ଯ୍ୟକାରୀ କରାଯାଇଥିଲା। ଖବର ଅନୁଯାୟୀ, ପର୍ଯ୍ୟାୟ ଶେଷ ସୁଦ୍ଧା ସମସ୍ତ ୪୫ଟି ସରକାରୀ ଅନୁଷ୍ଠାନରେ କାଗଜ ବିହୀନ ନୀତି କାର୍ଯ୍ୟକାରୀ କରାଯାଇଥିଲା।
ଏହି ନୀତିରୁ ଦୁବାଇ ସରକାର ବହୁତ ଲାଭବାନ ହେବେ। କାଗଜବିହୀନ ଯିବା କେବଳ ଟଙ୍କା ସଞ୍ଚୟ କରିବ ନାହିଁ ବରଂ ମାନବା ଶ୍ରମ ଶକ୍ତି ମଧ୍ୟ ସଞ୍ଚୟ କରିବ। ଏହା ଦ୍ୱାରା ସରକାର ପ୍ରତିବର୍ଷ ପ୍ରାୟ ୨୭୦୦ କୋଟି ଟଙ୍କା ସଞ୍ଚୟ କରିପାରିବେ। ଏହି ପଦକ୍ଷେପର ମୂଳଦୁଆ ୨୦୧୮ ରେ ରଖାଯାଇଥିଲା। ଯାହା ପରିବେଶ ଦୃଷ୍ଟିକୋଣରୁ ଏକ ପ୍ରଶଂସନୀୟ ପଦକ୍ଷେପ ଭାବରେ ମଧ୍ୟ ବିବେଚନା କରାଯାଉଛି। ଦୁବାଇର କ୍ରାଉନ ପ୍ରିନ୍ସ ଏହାକୁ ଏକ ନୂତନ ଯୁଗର ଆରମ୍ଭ ବୋଲି କହିଛନ୍ତି। ସେ କହିଛନ୍ତି ଯେ ଆସନ୍ତା ଦଶନ୍ଧି ମଧ୍ୟରେ ଡିଜିଟାଲ ସେବାକୁ ଆଧୁନିକୀକରଣ ତଥା ସୁଗମ କରିବା ପାଇଁ ସରକାର କାର୍ଯ୍ୟ କରିବେ।
ଆମେରିକା, ବ୍ରିଟେନ, କାନାଡା ସେମାନଙ୍କର ଟେକ୍ନୋଲୋଜି ଏବଂ ସେବାକୁ ଆଧୁନିକୀକରଣ କରିବା ପାଇଁ ନିରନ୍ତର ପ୍ରୟାସ କରୁଛନ୍ତି। କିନ୍ତୁ ସାଇବର ସୁରକ୍ଷା ପ୍ରତି ବିପଦ ଥିବାରୁ ସେମାନଙ୍କ ପାଇଁ ପେପରଲେସ୍ ଲକ୍ଷ୍ୟ ହାସଲ କରିବା ସହଜ ହୋଇ ପାରୁ ନାହିଁ। ଅତୀତରେ ଏହା ଦେଖାଯାଇଛି ଯେ ଆମେରିକା ଭଳି ଶକ୍ତିଶାଳୀ ଦେଶ ମଧ୍ୟ ହ୍ୟାକିଂର ଶିକାର ହୋଇଛି। ତେଣୁ ବହୁ ପାଶ୍ଚାତ୍ୟ ଦେଶରେ ଏହି ଲକ୍ଷ୍ୟ ହାସଲ କରିବାକୁ କଷ୍ଟକର ହୋଇ ପଡୁଛି।
