ଭଞ୍ଜନଗର,୯।୨(ଡି.ଏନ.ଏ) ଭଞ୍ଜନଗର ସହରବାସୀଙ୍କୁ ବିଶୁଦ୍ଧ ପାଣି ଯୋଗାଇ ଦେବାପାଇଁ ସରକାର ପଦକ୍ଷେପ ନେଇଛନ୍ତି।ଏହି ପରିପ୍ରେକ୍ଷୀରେ ନୂଆ ନୂଆ ପ୍ରକଳ୍ପ ହେଉଛି । ହେଲେ ବିଭିନ୍ନ କାରଣ ଯୋଗୁ କାମଗୁଡ଼ିକ ନିର୍ଦ୍ଧାରିତ ସମୟରେ ଶେଷ ହେଉନାହିଁ। ସହରର ଅନେକ ଅଞ୍ଚଳକୁ ଇତିମଧ୍ୟରେ ନୂଆ ପାଇପ ଲାଇନ ବିଛା ହୋଇଛି। ସେସବୁକୁ ଡ଼ିସେମ୍ବର ସୁଦ୍ଧା ପୁରୁଣା ପାଇପ ସହ ଯୋଡ଼ିବା ପାଇଁ ଲକ୍ଷ୍ୟ ଧାର୍ଯ୍ୟ ହୋଇଥିଲା । ହେଲେ ଏ ଯାଏ ତାହା ହୋଇନାହିିଁ । ଯଦ୍ଦ୍ବାରା କେତକ ଅଞ୍ଚଳକୁ ଆବଶ୍ୟକ ଅନୁଯାୟୀ ପାଣି ଯୋଗାଣରେ ବାଧା ଦେଖାଦେଇଛି । ବର୍ତ୍ତମାନ ସୁଦ୍ଧା ପ୍ରାୟ ୩ କି.ମି. ୮ଶହ ମିଟର ପାଇପ ବିଛା ହୋଇଥିବା ବେଳେ ଏବେ ବି ବ୍ରାହ୍ମଣସାହିର ୯୦ ମିଟର ପାଇପ ବିଛା କାମ ସରିନାହିଁ। ପାଇପ୍ ବିଛାଇବା ଏବଂ ସଂଯୋଗ କାମ ତୁରନ୍ତ ନ ସରିଲେ ଖରାଦିନ ଆରମ୍ଭରୁ ସହରରେ ପାନୀୟ ସମସ୍ୟା ବଢ଼ିବ। ଅନ୍ୟପକ୍ଷରେ ପାର୍କ ରୋଡ଼ରେ ବୃହତ ଜଳ ବିଶୋଧାନାଗାର ପ୍ରକଳ୍ପ କାର୍ଯ୍ୟ ମଧ୍ୟ ଚାଲିଛି । ଉକ୍ତ କାମ ଜୁଲାଇ ୯ ତାରିଖ ସୁଦ୍ଧା ସରିବା ଲକ୍ଷ୍ୟ ରଖାଯାଇଛି । ଏ ବାବଦରେ ୨ କୋଟି ୩୮ ଲକ୍ଷ ଟଙ୍କା ଖର୍ଚ୍ଚ ହେବ। କିନ୍ତୁ ଉକ୍ତ କାର୍ଯ୍ୟ ମଧ୍ୟ ଧିମାରେ ଚାଲିଛି । ବିଭାଗୀୟ ଉଚ୍ଚ କର୍ତ୍ତୃପକ୍ଷ ଏଥିପ୍ରତି ଦୃଷ୍ଟି ଦେଇ ଆବଶ୍ୟକ ପଦକ୍ଷେପ ନେବାକୁ ଦାବି ହୋଇଛି । ଏ ସମ୍ପର୍କରେ ଜନସ୍ବାସ୍ଥ୍ୟ ବିଭାଗ ସହକାରୀ ଯନ୍ତ୍ରୀଙ୍କ ସହ ଯୋଗାଯୋଗ କରିବାରୁ ସେ କହିଛନ୍ତି, ସହରବାସୀଙ୍କ ଆବଶ୍ୟକତାକୁ ଦେଖି ପଦକ୍ଷେପ ନିଆଯାଉଛି । ଗ୍ରୀଷ୍ମ ଋତୁରେ ପାନୀୟ ଜଳ ଯୋଗାଣରେ କୌଣସି ବାଧା ଦେଖାଦେବ ନାହିଁ ବୋଲି କହିଛନ୍ତି।
