କେନ୍ଦୁଝର,୧୮।୪(ନରେଶ ଚନ୍ଦ୍ର ପଟ୍ଟନାୟକ): କେନ୍ଦୁଝର ଜିଲାର ପ୍ରତିଷ୍ଠିତ ଭେଷଜ ବିଶେଷଜ୍ଞ ଡାକ୍ତର ପି.ସି ଦାସଙ୍କ ଶନିବାର ପରଲୋକ ହୋଇଯାଇଛି। ତାଙ୍କୁ ୮୬ ବର୍ଷ ବୟସ ହୋଇଥିଲା। ତାଙ୍କ ମୃତ୍ୟୁ ଖବର ପ୍ରଚାରିତ ହେବା ପରେ ବିଭିନ୍ନ ମହଲରେ ଶୋକର ଛାୟା ଖେଳିଯାଇଛି।
ଡାକ୍ତର ଦାସ ଦୀର୍ଘ ଦିନ ହେଲା ଅସୁସ୍ଥ ହୋଇ ଭୁବନେଶ୍ବର ସ୍ଥିତ ଏକ ଘରୋଇ ଚିକିତ୍ସାଳୟରେ ଚିକିତ୍ସିତ ହେଉଥିଲେ। ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଥିବା ତାଙ୍କ ସାନ ପୁଅ ବରଦା ପ୍ରସନ୍ନ ଦାସ ସୂଚନା ଦେଇଛନ୍ତି। ବରଦା କେନ୍ଦୁଝରଗଡ଼ ପୌର ଉପାଧ୍ୟକ୍ଷ ଅଛନ୍ତି।
ଡାକ୍ତର ଦାସ କେନ୍ଦୁଝରରେ ରହି ଶେଷ ପର୍ଯ୍ୟନ୍ତ ରୋଗୀ ସେବା ଯୋଗାଇ ଆସୁଥିଲେ । ସେ କେନ୍ଦୁଝର ଜିଲା ମୁଖ୍ୟ ଚିକିତ୍ସାଳୟରେ ତାଙ୍କର କର୍ମମୟ ଜୀବନ ଆରମ୍ଭ କରି ବାରିପଦା ଓ ପରେ ଜଗତସିଂହପୁର ଜିଲାରେ ସିଡିଏମ୍ଓ ଭାବେ କର୍ମମୟ ଜୀବନରୁ ଅବସର ପରେ ମଧ୍ୟ ଲୋକଙ୍କୁ ଚିକିତ୍ସା ସେବା ଦେଇ ଆସୁଥିଲେ । ଡାକ୍ତର ଦାସ ପେଶାରେ ଜଣେ ଡାକ୍ତର ଥିଲେ ହେଁ ସେ ରୋଟାରୀ କ୍ଲବ, ମା’ ତାରିଣୀ ୱାକର୍ସ କ୍ଲବ ଭଳି ବିଭିନ୍ନ ସାମାଜିକ ଅନୁଷ୍ଠାନ ସହ ସକ୍ରୀୟ ଭାବେ ଜଡିତ ରହି ମାଗଣାରେ ଚିକିତ୍ସା ସହାୟତା ସହ ଔଷଧ ବଣ୍ଟନ, ଚାରାରୋପଣ, ସାସ୍ଥ୍ୟ ସଚେତନତା ଭଳି ବିଭିନ୍ନ କାର୍ଯ୍ୟରେ ନିଜକୁ ନିୟୋଜିତ କରି ଆସୁଥିଲେ । ବିଶେଷକରି ସେ କେନ୍ଦୁଝର ଓ ମୟୂରଭଞ୍ଜ ଜିଲା ସମେତ ପଡ଼ୋଶୀ ଝାଡ଼ଖଣ୍ଡ ରାଜ୍ୟର ବହୁ ଦୁରାରୋଗ୍ୟ ପକ୍ଷାଘାତ ପୀଡିତଙ୍କୁ ସଫଳ ଚିକିତ୍ସା କରି ନିଜ ସ୍ବତନ୍ତ୍ର ଖ୍ୟାତି ଅର୍ଜନ କରିଥିଲେ। ମୃତ୍ୟୁ ଶଯ୍ୟା ନିକଟରେ ପୁଅ, ବୋହୂ, ଝିଅ, ଜ୍ବାଇଁ, ନାତି ନାତୁଣୀ ଓ ଆତ୍ମୀୟସ୍ବଜନ ଉପସ୍ଥିତ ଥିବାବେଳେ ରବିବାର ମରଶରୀର କେନ୍ଦୁଝର ଆସିବ ବୋଲି ସୂଚନା ମିଳିଛି।
