ଦୀପ୍ତିରେଖା ପାଢ଼ୀ, ଓଡ଼ିଆ ସଙ୍ଗୀତ ଜଗତର ଜଣେ ବହୁ ପରିଚିତ ନାଁ। ଅନେକ ସୁପରହିଟ୍ ଗୀତ ଗାଇ ଆଜି ସେ ଘରେ ଘରେ ପରିଚିତ। ତା’ଛଡ଼ା ନିଜ ଅଭିନୟର ଯାଦୁରେ ବି ଦିନେ ସେ ସମସ୍ତଙ୍କ ହୃଦୟରେ ଘର କରିଥିଲେ। ଏହି ବହୁମୁଖୀ ପ୍ରତିଭା ଏଥରର ସେଲିବ୍ରିଟି ସିକ୍ରେଟ୍ରେ…
ସଙ୍ଗୀତର ଆରମ୍ଭ: ପିଲାଟି ଦିନରୁ ମୋର ସଙ୍ଗୀତ ପ୍ରତି ରୁଚି ଥିଲା। ତେଣୁ ଦ୍ୱିତୀୟ ଶ୍ରେଣୀରେ ପଢ଼ିବାବେଳେ ମୁଁ ବୋଉକୁ ଗୀତ ଶିଖିବା ପାଇଁ କହିଥିଲି। ସେ ମତେ ରାଜଧାନୀ କଳା ସଂସଦରେ ଆଡମିସନ୍ କରାଇଥିଲେ। ତା’ସହ ପାଠପଢ଼ା ବି ଚାଲିଥାଏ।
ଓଲିଉଡ୍ରେ ପ୍ରଥମ ବ୍ରେକ୍: ୨୦୦୯ରେ ମୋର ଓଲିଉଡ୍ରେ ଏଣ୍ଟ୍ରି ହେଲା। ମୋ ସାନ କକା ମତେ ପ୍ରେମାନନ୍ଦ ସାର୍ଙ୍କ ସହ ଦେଖା କରାଇଥିଲେ। ସେ ମୋ ସ୍ବର ଶୁଣି ବହୁତ ପସନ୍ଦ କରିଥିଲେ। ଆଉ ଦୁଇଟି ଗୀତ ଗାଇବାର ସୁଯୋଗ ଦେଇଥିଲେ। ‘ଲଭ୍ ଡଟ୍ କମ୍’ ଚଳଚ୍ଚିତ୍ରରେ ଗୋଟିଏ ଗୀତ ଓ ସାବିତ୍ରୀ ମ୍ୟୁଜିକ୍ର ‘ନୂଆ ପ୍ରେମିକା’ ଆଲବମ୍୍ରେ ଗୋଟିଏ ଗୀତ ଗାଇଥିଲି।
ଗଡ୍ ଫାଦର: ପ୍ରେମାନନ୍ଦ ସାର୍ ମୋ ପାଇଁ ଗଡ୍ ଫାଦର୍। ଆଜି ମୁଁ ଯେଉଁ ସ୍ଥାନରେ ପହଞ୍ଚତ୍ଛି, ଯେଉଁ ପରିଚୟ ପାଇଛି ସବୁ କିଛି ତାଙ୍କ ପାଇଁ ସମ୍ଭବ ହୋଇଛି। ମତେ ନେଇ ସେ ଏକ୍ସପେରିମେଣ୍ଟ କରିଛନ୍ତି। ଆଉ ବିଭିନ୍ନ ପ୍ରକାର ଗୀତ ଗାଇବାକୁ ସୁଯୋଗ ଦେଇଛନ୍ତି।
ଅଭିନୟର ଆରମ୍ଭ: ଏକ ଆଓ୍ବାର୍ଡ ଫଙ୍କସନ୍ରେ ମଳୟ ସାର୍ ଦେଖା ହୋଇଥିଲେ। ସେ ରାଜକନ୍ୟା ସିରିୟଲର ମୁଖ୍ୟ ଚରିତ୍ରରେ ଅଭିନୟ କରିବା ପାଇଁ ଅଫର୍ ଦେଇଥିଲେ। ଅଭିନୟର ଅଭିଜ୍ଞତା ନ ଥିବାରୁ ପ୍ରଥମେ ମୁଁ ରାଜି ହୋଇ ନ ଥିଲି। ହେଲେ ବାପା ମତେ କହିଥିଲେ ଭଲ ଚରିତ୍ର ଅଛି, ତେଣୁ କର। ମୁଁ ଅଡିସନ ଦେଲି। ସିଲେକ୍ଟ ବି ହୋଇଗଲି। ଭାବିଥିଲି କିଛିଦିନ କରି ଅଭିନୟ ଛାଡ଼ି ଦେବି। ହେଲେ ୪ ବର୍ଷ କାମ କଲି। ଦର୍ଶକଙ୍କର ଅଜସ୍ର ଭଲ ପାଇବା ବି ମିଳିଲା। ଏଇ ଅଭିନୟରୁ ମୁଁ ଅନେକ କିଛି ଶିଖିଛି। ଇଣ୍ଡଷ୍ଟ୍ରିକୁ ଚିହ୍ନିଛି। ଆଉ ନିଜକୁ ନୂଆ କରି ଗଢ଼ିଛି।
ଅଭିନୟ ପରେ ସଙ୍ଗୀତର ପୁନଃ ଆରମ୍ଭ: ‘ଚାଲ କରିବା ଠିଆପାଲା’ ଗୀତରୁ ଅଟକିଯାଇଥିବା ସଙ୍ଗୀତର ଯାତ୍ରା ପୁଣିଥରେ ଆରମ୍ଭ ହୋଇଥିଲା। ଆଉ ଏଇ ଗୀତଟି ହିଟ୍ ହୋଇଥିଲା। ପରେ ଅନେକ ଚଳଚ୍ଚିତ୍ରରେ ଅନେକ ହିଟ୍ ଗୀତ ଗାଇବାର ସୁଯୋଗ ପାଇଲି।
ଅଭିନୟ ନା ସଙ୍ଗୀତ: ଉଭୟ ଅଭିନୟ ଓ ସଙ୍ଗୀତ ମତେ ଲୋକଙ୍କ ଭଲ ପାଇବା ଦେଇଛି। ତେବେ ସଙ୍ଗୀତ ପ୍ରତି ମୋର ଭଲ ପାଇବା ଟିକେ ଅଧିକ। ମୋ ବାପାଙ୍କର ବି ସଙ୍ଗୀତରେ ରୁଚି ଥିଲା। ତେଣୁ କହିବାକୁ ଗଲେ ସଙ୍ଗୀତ ମତେ ବେଶି ଖୁସି ଦିଏ। ଅଭିନୟରେ ଟାଇମ୍ ଟେବୁଲ ଠିକ୍ ରହେନା। ତେଣୁ ସଙ୍ଗୀତ ଦୁନିଆକୁ ଫେରିଆସିଥିଲି।
ଶସ୍ତା ଗୀତ ଗାଏନା: ମୁଁ କେବେ ଶସ୍ତା, ଡବଲ ମିନିଂ ଗୀତ ଗାଇନି। ଏମିତିକି ରେକର୍ଡିଂ ପାଇଁ ଷ୍ଟୁଡିଓକୁ ଯାଇ ଯଦି ଜାଣେ ଏଭଳି ଗୀତ ଗାଇବାକୁ ହେବ, ତେବେ ରେକର୍ଡିଂ ନ କରି ମଧ୍ୟ ଫେରିଛି।
ସିକ୍ରେଟ୍ ଶେୟାର କରେ: ମୁଁ ମନର କଥା କେବଳ ବାପାଙ୍କ ସହ ଶେୟାର କରୁଥିଲି। ହେଲେ ବାପା ଚାଲିଗଲା ପରେ ମୁଁ ଆଉ କାହାକୁ ସେତିକି ନିଜର ଭାବିନି ମୋ ମନର କଥା ଖୋଲି କହିବା ପାଇଁ। ଏବେ ମୁଁ ମୋ ମନର ଦୁଃଖକଷ୍ଟ ଓ ସିକ୍ରେଟ୍ ପ୍ରଭୁ ଶ୍ରୀଜଗନ୍ନାଥଙ୍କୁ ଜଣାଏ।
ସବୁଠୁ ସୁଖ ଓ ଦୁଃଖର ମୁହୂର୍ତ୍ତ: ଯେବେ ମୋ’ ଚଳଚ୍ଚିତ୍ରର ଗୀତ ହିଟ୍ ହେଲା ଓ ଓଡ଼ିଶାର ଗଳିକନ୍ଦିରେ ବାଜିଲା, ଦୁନିଆର ସବୁ ଖୁସି ମିଳିଗଲା ପରି ମତେ ଲାଗିଥିଲା। ଆଉ ଯେବେ ବାପା ଆମକୁ ଛାଡ଼ି ଆରପାରିକୁ ଚାଲିଗଲେ ମୋର ସବୁକିଛି ଚାଲିଗଲା ପରି ଲାଗିଥିଲା।
ସ୍ବାମୀ ସ୍ତ୍ରୀ ସମ୍ପର୍କ: ମୋ କ୍ୟାରିୟର କ୍ଷେତ୍ରରେ ବାପାଙ୍କ ପରେ ସ୍ବାମୀଙ୍କର ବହୁତ ସପୋର୍ଟ ରହିଛି। ତାଙ୍କ ବ୍ୟସ୍ତତା ଭିତରୁ ବି ସେ କିଛି ସମୟ ବାହାର କରି ମୋର ଶୁଟିଂ ଓ ରେକର୍ଡିଂକୁ ଯାଇ ମତେ ଏନ୍କରେଜ୍ କରନ୍ତି।
ଅଧିକ କଟକଣା ଭଲ ଲାଗେନା: ମୋ ହୃଦୟ ଭାରତୀୟ। ସବୁବେଳେ ମୁଁ ଶାଢ଼ି, ସଲ୍ଓ୍ବାର ଭଳି ଭାରତୀୟ ପୋଷାକ ପିନ୍ଧିବାକୁ ଭଲ ପାଏ। ଏମିତିକି ମୋ ବାପା ବି ଭାରତୀୟ ସଂସ୍କୃତିକୁ ବହୁତ ଭଲ ପାଉଥିଲେ ଓ ମତେ କେବେ ଜିନ୍ସ ପିନ୍ଧିବାକୁ ଦେଇ ନ ଥିଲେ। ତେଣୁ ପିନ୍ଧାପିନ୍ଧିରେ ଯଦି ମୋ ଉପରେ କେହି ଆହୁରି ଅଧିକ କଟକଣା ଲଗାଇବାକୁ ଚେଷ୍ଟା କରନ୍ତି ମତେ ଭଲ ଲାଗେନା। ସବୁଠୁ ବଡ କଥା ହେଲା ମୋ ଶାଶୁଘରେ ମୋ ଉପରେ କେବେ କିଛି କଟକଣା ଲଗାଇ ନାହାନ୍ତି। ତେଣୁ ମୁଁ ବହୁତ ଖୁସିରେ ଅଛି। ତା’ସହ ପରିବାରର ସମସ୍ତେ ମତେ ଖୁବ୍ ସହଯୋଗ ବି କରନ୍ତି।
ପ୍ରଭୁ ଶ୍ରୀଜଗନ୍ନାଥ ମୋର ସବୁକିଛି
ବାପାଙ୍କ ପରେ ପ୍ରଭୁ ଶ୍ରୀଜଗନ୍ନାଥଙ୍କୁ ହିଁ ମୁଁ ମୋର ସବୁକିଛି ଭାବେ। ତାଙ୍କୁ ବହୁତ ଭଲ ପାଏ। ଆଉ ଯେତେବେଳେ ବି ତାଙ୍କୁ ଖୋଜେ ଲାଗେ ସେ ମୋ ପାଖରେ ଅଛନ୍ତି।
-ଶିବାନୀ ମହାନ୍ତି
