ଲାଉସେନ,୨୬।୧୧(ଏପି): ଡୋପିଂ କାରଣରୁ ରୋମାନିଆର ଦୁଇଜଣ ଭାରୋତ୍ତୋଳକ ୨୦୧୨ ଲଣ୍ଡନ ଅଲିମ୍ପିକ୍ସ ପଦକ ହରାଇଛନ୍ତି। ଷ୍ଟେରଏଡ୍ ସେବନ କାରଣରୁ ଡୋପ୍ ଟେଷ୍ଟରେ ଏମାନେ ପଜିଟିଭ ବୋଲି ଜଣାପଡିବା ପରେ ବୁଧବାର ଏହି ଦୁଇ ଆଥଲେଟ୍ଙ୍କଠାରୁ ପଦକ କାଢି ନିଆଯାଇଛି।
ଲଣ୍ଡନ ଅଲିମ୍ପିକ୍ସରେ ରୋକ୍ସାନା କୋକୋସ ରୌପ୍ୟ ଓ ରାଜଭାନ ମାର୍ଟିନ ବ୍ରୋଞ୍ଜ୍ ପଦକ ଜିତିଥିଲେ। ତେବେ ନମୁନାର ରିଆନାଲିସିସ୍ ପରେ ଏହି ଦୁଇ ଖେଳାଳି ଏକାଧିକ ଷ୍ଟେରଏଡ୍ ସେବନ କାରଣରୁ ଡୋପ୍ ଟେଷ୍ଟରେ ବିଫଳ ହୋଇଥିଲେ ବୋଲି ଅନ୍ତର୍ଜାତୀୟ ଅଲିମ୍ପିକ କମିଟି (ଆଇଓସି) ସୂଚନା ଦେଇଛି। ରୋମାନିଆର ତୃତୀୟ ଭାରୋତ୍ତୋଳକ ଗାବ୍ରିଏଲ ସିନକ୍ରେଆନ ମଧ୍ୟ ସମ କାରଣ ପାଇଁ ପଜିଟିଭ ଜଣାପଡିଛି। ତୃତୀୟ ଥର ପାଇଁ ଡୋପ୍ ଟେଷ୍ଟରେ ବିଫଳ ହେବା ପରେ ତାଙ୍କୁ ଅନ୍ତର୍ଜାତୀୟ ଓ୍ବେଟ୍ ଲିଫ୍ଟିଂ ଫେଡେରେଶନ ଆଜୀବନ ବାସନ୍ଦ କରିଛି। ଲଣ୍ଡନ ଅଲିମ୍ପିକ୍ସରେ ଅଂଶଗ୍ରହଣ କରିଥିବା ରୋମାନିଆର ସବୁ ୪ ଜଣ ଭାରୋତ୍ତୋଳକ ଡୋପିଂ ପାଇଁ ଆଇଓସି ଦ୍ୱାରା ଅଯୋଗ୍ୟ ଘୋଷିତ ହୋଇଛନ୍ତି। ମାର୍ଟିନ ପୁରୁଷ ୬୯ କେ.ଜି. ବର୍ଗରେ ବ୍ରୋଞ୍ଜ୍ ଜିତିଥିଲେ। ସେହିପରି କୋକୋସ ମହିଳା ୬୯ କେ.ଜି. ବର୍ଗରେ ଦ୍ୱିତୀୟ ସ୍ଥାନ ଅଧିକାର କରି ରୌପ୍ୟ ପଦକ ହାସଲ କରିଥିଲେ। ମାର୍ଟିନ ଡିସ୍କ୍ୱାଲିଫାଏ ହେବା ପରେ ଉତ୍ତର କୋରିଆର କିମ୍ ମିଅଙ୍ଗ-ହିଓକ ଚତୁର୍ଥ ସ୍ଥାନରୁ ଅପ୍ଗ୍ରେଡ ହାସଲ କରି ବ୍ରୋଞ୍ଜ୍ ପଦକ ପାଇବେ। ସେହିପରି କୋକୋସ ଅଯୋଗ୍ୟ ଘୋଷିତ ହେବା ପରେ କାଜାଖସ୍ଥାନର ଆନ୍ନା ନୁରମୁଖାମ୍ବେଟୋଭା ଓ କଲମ୍ବିଆର ଉବାଲଡିନା ଭାଲୋୟେସ ଅପ୍ଗ୍ରେଡ୍ ହେବା ସହ ପଦକ ହାସଲ କରିବେ।
