ଭୋପାଳ,୯।୧: ମଣିଷଙ୍କର ବିବାହ ହୋଇଥାଏ। ତେବେ କେତେକ ଅଞ୍ଚଳରେ ଲୋକେ ବିଭିନ୍ନ ପରମ୍ପରା ଅନ୍ତର୍ଗତ କିଛି ପ୍ରାଣୀଙ୍କ ବିବାହ ମଧ୍ୟ କରାଇଥାନ୍ତି। ମଧ୍ୟପ୍ରଦେଶର ନିଓ୍ବାଡ଼ି ଜିଲାର ପୁଛିକରଗୁଓ୍ବା ଗାଁରେ ହୋଇଥିବା କୁକୁର ବାହାଘର ଏବେ ସୋସିଆଲ୍ ମିଡ଼ିଆରେ ଚର୍ଚ୍ଚାର କେନ୍ଦ୍ର ପାଲଟିଛି। ଏଠାରେ ଲୋକେ ପାଣି ପାଇଁ ହନ୍ତସନ୍ତ ହୋଇଥାନ୍ତି। ତେବେ କୁକୁର ବାହାଘର କଲେ ବର୍ଷା ହେବ ବୋଲି ସ୍ଥାନୀୟ ଲୋକଙ୍କ ବିଶ୍ୱାସ ରହିଛି। ଏହାର ପରମ୍ପରାଗତ ଭାବେ ଏଠାରେ ପ୍ରାୟତଃ କରାଯାଇଥାଏ। ପୁଛିକରଗୁଓ୍ବା ଗାଁର ମୁଳଚାନ୍ଦ ନାୟକଙ୍କ ମାଈକୁକୁର ରଶ୍ମୀ ସହିତ ଉତ୍ତରପ୍ରଦେଶର ବକଓ୍ବା ଖୁର୍ଦ ନିବାସୀ ଅଶୋକ ଯାଦବଙ୍କ କୁକୁର ଗୋଲୁର ବିବାହ ଅତି ଧୁମ୍ଧାମ୍ରେ ଅନୁଷ୍ଠିତ ହୋଇଛି। ବିବାହ ସମ୍ପୂର୍ଣ୍ଣ ଭାବେ ହିନ୍ଦୁ ପରମ୍ପରା ଅନୁସାରେ ହୋଇଥିଲା। ସାରା ରାତି ଲୋକେ ନାଚିଥିଲେ। ୮୦୦ରୁ ଅଧିକ ଲୋକ ବାହାଘର ଭୋଜିରେ ଯୋଗଦେଇ ଭୋଜନ କରିଥିଲେ। ରଶ୍ମୀକୁ ଲୋକ ଗୋଲୁ ସହିତ କାନ୍ଦିକାନ୍ଦି ବିଦା କରିଥିବାର ଭିଡ଼ିଓ ଏବେ ସୋସିଆଲ୍ ମିଡ଼ିଆରେ ଭାଇରାଲ ହେବାରେ ଲାଗିଛି।
