ରାୟଗଡ଼ା,୨୧ା୪(ସ୍ବ.ପ୍ର.): ରାୟଗଡ଼ା ଜିଲାରେ ଗରିବ ଆଦିବାସୀମାନେ ଋତୁକାଳୀନ ପୁଲ ଓ ଫଳକୁ ବିକ୍ରି କରି ନିଜ ପରିବାରର ଗୁଜରାଣ ମେଣ୍ଟାନ୍ତି। ସେମାନେ ଦିନତମାମ କଷ୍ଟ କରି ଏସବୁ ସଂଗ୍ରହ କରୁଥିଲେ ମଧ୍ୟ ଉଚିତ ମୂଲ୍ୟ ପାଉନାହାନ୍ତି। ସରକାର ଉଚିତ ପଦକ୍ଷେପ ନେଉ ନ ଥିବାରୁ ଆଦିବାସୀମାନେ ଦଲାଲ କବଳରେ ପଡ଼ି ନୟାନ୍ତ ହେଉଛନ୍ତି।
ବର୍ତ୍ତମାନ ଗ୍ରୀଷ୍ମ ଋତୁରେ ମହୁଲ ଫୁଲ ସଂଗ୍ରହ କରିବା ସମୟ। ଚଳିତବର୍ଷ ଜିଲାରେ ମହୁଲ ଫୁଲ ଉପତ୍ାଦନ ଭଲ ହୋଇଛି। କେବଳ ରାୟଗଡ଼ା ନୁହେଁ, ପ୍ରାୟ ସମସ୍ତ ଆଦିବାସୀ ଅଧ୍ୟୁଷିତ ଜିଲାରେ ମହୁଲ ଭରି ହୋଇଛି। ଏହି ହିସାବରେ ମହୁଲ ଫଳ ବା ଟୋଲ ଉପତ୍ାଦନ ବି ଅନୁରୂପ ହେବ ବୋଲି ଆଦିବାସୀମାନେ ଆଶା ରଖିଛନ୍ତି। ହେଲେ ପ୍ରତିବର୍ଷ ଭଳି ଚଳିତବର୍ଷ ମଧ୍ୟ ଟ୍ରାଇବାଲ ଡେଭଲପମେଣ୍ଟ କୋଅପରେଟିଭ କର୍ପୋରେଶନ (ଟିଡ଼ିସିସି) ମହୁଲ ସଂଗ୍ରହକୁ ତାଲିକାଭୁକ୍ତ କରିନି। ଏପଟେ ମହୁଲ ସଂଗ୍ରହ କରିବାକୁ ଲକ୍ଷ୍ୟ ରଖିଛି। ଏମ୍ଏସ୍ପି ୨୯ଟଙ୍କା ହିସାବରେ ମହୁଲ ସଂଗ୍ରହ କରିବାକୁ ଧାର୍ଯ୍ୟ କରାଯାଇଥିଲା ବେଳେ ମାତ୍ର ୭ଟି ଜିଲାକୁ ଏଥିରେ ସାମିଲ କରାଯାଇଛି। ମହୁଲ ଫୁଲକୁ ଟିଡ଼ିସିସି ତାଲିକାଭୁକ୍ତ ନ କରାଯିବା ଫଳରେ ରାଜ୍ୟର ଶହ ଶହ ବନବାସୀ ମହୁଲ ବାର୍ଷିକ ଆୟରୁ ବଞ୍ଚିତ ହେବେ।
ବର୍ତମାନ ନୂଆ କରି ମହୁଲ ଫୁଲ ସଂଗ୍ରହ ଅଭିଯାନ ଆରମ୍ଭ ହୋଇଥିବା ବେଳେ ସ୍ଥାନୀୟ ବଜାରରେ ଏହା ୩୦ରୁ ୩୫ ଟଙ୍କାରେ ବିକ୍ରି ହେଉଛି। ଦାମ୍ କମାଇବା ପାଇଁ ଅନେକ ଜିଲାରେ ଟ୍ରେଡରମାନେ ମହୁଲ କିଣିବା ବନ୍ଦ କରି ଦେଇଛନ୍ତି। ଚଳିତ ବର୍ଷ ଦେବଗଡ଼ ଜିଲାରୁ ପ୍ରାୟ ୧୪୫୦ କୁଇଣ୍ଟାଲ ମହୁଲ, ସମ୍ବଲପୁରରୁ ୨୨୪୫ କୁଇଣ୍ଟାଲ, ମୟୁରଭଞ୍ଜରୁ ୫୭୦ କୁଇଣ୍ଟାଲ, ନୟାଗଡ଼ରୁ ୫୦୦ କୁଇଣ୍ଟାଲ ଓ କନ୍ଧମାଳରୁ ୫୫୦ କୁଇଣ୍ଟାଲ ମହୁଲ ଉପତ୍ାଦନ ହେବ ବୋଲି ଆଶା ରଖାଯାଇଛି। ଏହି ଜିଲାଗୁଡ଼ିକର ପ୍ରାୟ ୬ହଜାର ଆଦିବାସୀଙ୍କର ୧ କୋଟି ଟଙ୍କା ଆୟ ହେବା କଥା। ହେଲେ ଟିଡ଼ିସିସି ମହୁଲ ଫୁଲ ସଂଗ୍ରହକୁ ତାଲିକାଭୁକ୍ତ କରିନଥିବା ବେଳେ ଟ୍ରେଡ଼ରମାନଙ୍କ ମନମୁଖୀ କାର୍ଯ୍ୟ ଆଗକୁ ନିଶ୍ଚିତ ଭାବେ ଆଦିବାସୀଙ୍କୁ ଅସୁବିଧାରେ ପକାଇବ।
ଓଡ଼ିଶାରେ ପ୍ରତିବର୍ଷ ପାଖାପାଖି ୨୦ହଜାର କୁଇଣ୍ଟାଲ ମହୁଲ ଫୁଲ ଆଦିବାସୀମାନେ ସଂଗ୍ରହ କରି ବିକ୍ରି କରୁଥିବା ବେଳେ କିଲୋ ପ୍ରତି ୨୫ରୁ ୩୫ଟଙ୍କା ପାଇଥାନ୍ତି। ମହୁଲ ଫୁଲକୁ ବ୍ୟବହାର କରି ପ୍ରସ୍ତୁତ ଖାଦ୍ୟ ସାମଗ୍ରୀ କିଲୋ ପ୍ରତି ୧୪୦ରୁ ୧୬୦ ଟଙ୍କାରେ ବିକ୍ରି ହେଉଛି। ଆଦିବାସୀଙ୍କ ପାନୀୟ ଭାବେ ମଦ ପ୍ରସ୍ତୁତିରେ ବ୍ୟବହାର କରାଯାଉଥିବା ମହୁଲ ଏବେ ଖାଦ୍ୟ ନିରାପତ୍ତା ତାଲିକାରେ ସାମିଲ ହେଲାଣି। ପାରମ୍ପରିକ ଆଦିବାସୀମାନେ ମହୁଲରୁ ପ୍ରସ୍ତୁତ ଖାଦ୍ୟ ଗ୍ରହଣ କରୁଥିବା ବେଳେ ଆଗାମୀ ଦିନରେ ଏହାର ବଜାର ପ୍ରବେଶ ପାଇଁ ଓଡ଼ିଶା ପକ୍ଷରୁ ପ୍ରୟାସ ଆରମ୍ଭ ହୋଇଛି। କେବଳ ମହୁଲ କାକୋ ନୁହେଁ ବରଂ ମହୁଲରୁ ପ୍ରସ୍ତୁତ ଜାମ୍, ଜେଲି, କୁକିଜ୍, ପାଚକ ଗୋଳି, ଗୁଲାବଜାମୁନ୍, କେକ୍, ଚକୋଲେଟ, ଲଡ଼ୁ ଆଦିର ବି ବ୍ୟବସାୟୀକରଣ କରାଯିବ। ମହୁଲ ଫୁଲରୁ ଏବେ ପରୀକ୍ଷାମୂଳକ ଭାବେ ହ୍ୟାଣ୍ଡ ସାନିଟାଇଜର ଓ ଫ୍ଲୋର କ୍ଲିନିଂ ତିଆରି କରାଯାଉଛି। ଏଥିପାଇଁ ବନଜା ବାଣିଜ୍ୟ ସଂଘ ସହାୟତାରେ କିଛି ମହିଳାଙ୍କୁ ସମ୍ବଲପୁର ବିଶ୍ୱ ବିଦ୍ୟାଳୟ ପକ୍ଷରୁ ତାଲିମ ଦିଆଯାଇଛି। ଏଭଳି ସ୍ଥିତିରେ ମହୁଲ ସଂଗ୍ରହକାରୀଙ୍କୁ ଉପଯୁକ୍ତ ମୂଲ୍ୟ ମିଳିବା ପାଇଁ ରାଜ୍ୟ ସରକାର ଟିଡ଼ିସିସି ସହାୟତାରେ ପ୍ରୟାସ କରିବା ଆବଶ୍ୟକ। ନଚେତ୍ ଦଲାଲଙ୍କ କବଳରେ ପଡ଼ି ମହୁଲ ସଂଗ୍ରହକାରୀ ହତାଶ ହେବା ସୁନିଶ୍ଚିତ। ଏନେଇ ଅନୁସୂଚିତ ଜାତି ଓ ଜନଜାତି କଲ୍ୟାଣ ମନ୍ତ୍ରୀ ଜଗନ୍ନାଥ ସାରକା କହିଛନ୍ତି, ମହୁଲ ଗୋଟାଳି ଓ ଆଦିବାସୀମାନେ ଯେପରି ଅଭାବୀ ବିକ୍ରିର ସମ୍ମୁଖୀନ ନ ହେବେ ସେଥିପ୍ରତି ପଦକ୍ଷେପ ଗ୍ରହଣ କରାଯିବ। ସେ ନିଜେ ସ୍ଥିତି ଅନୁଧ୍ୟାନ କରିବେ ବୋଲି କହିଛନ୍ତି।
