ରାୟଗଡ଼ା,୨୯ା୧୧(ଆଶିଷ ରଞ୍ଜନ ପଣ୍ଡା): ମାଆ ପଛେପଛେ ଯାଇ ନଦୀରେ ବୁଡ଼ି ଶୁକ୍ରବାର ଚାଲିଗଲା ୩ ବର୍ଷ ଶିଶୁପୁତ୍ରର ଜୀବନ। ଏହିଭଳି ଘଟଣା ଦେଖିବାକୁ ମିଳିଛି ରାୟଗଡ଼ା ଜିଲା କାଶୀପୁର ବ୍ଲକ କାହ୍ନୁଗୁଡ଼ା ଗ୍ରାମରେ। ଘଟଣାରୁ ପ୍ରକାଶ ଯେ, କାହ୍ନୁଗୁଡ଼ା ଗ୍ରାମର କମ୍ବୁ ମାଝୀଙ୍କ ସ୍ତ୍ରୀ ଶୈଳେନ୍ଦ୍ରୀ ଶୁକ୍ରବାର ସକାଳେ ନଦୀକୁ ଯାଇଥିଲେ। ତାଙ୍କ ୩ ବର୍ଷର ପୁଅ ତରୁ ମାଆଙ୍କ ଅଗୋଚରରେ ତାଙ୍କ ପଛେ ପଛେ ନଦୀକୁ ଚାଲି ଯାଇଥିଲା। ମାଆ ନଦୀରୁ ଫେରି ପୁଅକୁ ଖୋଜି ପାଇଲେ ନାହିଁ। ଏହାପରେ ତରୁଙ୍କ ଜେଜେମାଆ ନାତିକୁ ନଦୀ ନିକଟରେ ଖୋଜିବାକୁ ଯିବା ସମୟରେ ନଦୀକୂଳରେ ତରୁର ମୃତଦେହ ପଡ଼ିଥିବା ଦେଖିବାକୁ ପାଇଥିଲେ। ଏନେଇ ପରିବାରବର୍ଗ ପୋଲିସକୁ ସୂଚନା ଦେବା ପରେ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଉଦ୍ଧାର କରି ବ୍ୟବଚ୍ଛେଦ ପାଇଁ କାଶୀପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ନେଇଥିଲା। ତେବେ ରାତି ହୋଇଯାଇଥିବାରୁ ଶନିବାର ବ୍ୟବଚ୍ଛେଦ ହୋଇଥିଲା। ଦାୟିତ୍ୱରେ ଥିବା ଡାକ୍ତର ଶନିବାର ମୃତଦେହ ବ୍ୟବଚ୍ଛେଦ କରିଥିଲେ। ହେଲେ ଶିଶୁଟିର ମୃତଦେହ ବ୍ୟବଚ୍ଛେଦ ପରେ ଡାକ୍ତରଙ୍କ ସହଯୋଗୀ ପରିବାରବର୍ଗଙ୍କୁ ୨ହଜାର ଟଙ୍କା ମାଗିଥିଲେ। ତେବେ ପରିବାରବର୍ଗ ଛୋଟ ଶିଶୁଟିର ମୃତ୍ୟୁର ଅବସାଦରେ ଭାଙ୍ଗି ପଡ଼ିଛନ୍ତି। ଉପସ୍ଥିତ ଗାଁ ଲୋକେ ଚାନ୍ଦା କରି ପ୍ରଥମେ ୫୦୦ ଟଙ୍କା ଦେବାରୁ ମନା କରିଥିଲେ। ତେବେ ପୁଣି ଥରେ ଗାଁ ଲୋକେ ୧ହଜାର ଟଙ୍କା ଦେଇଥିଲେ। ହେଲେ ସହଯୋଗୀ ତାହା ଗ୍ରହଣ ନ କରି ଛେଳି କାଟିଲେ ଲୋକେ ୫ ହଜାର ଟଙ୍କା ନେଉଛନ୍ତି। ଆଉ ମୋତେ ୧ହଜାର ଟଙ୍କା ଭିକ ଦେଉଛ କି ବୋଲି ଗାଁ ଲୋକଙ୍କୁ ପ୍ରଶ୍ନ କରିଥିଲେ।
ତେବେ ଗୋଟିଏ ପଟେ ତିନି ବର୍ଷର ଛୁଆ ମାଆ କୋଳ ଛାଡ଼ି ଚାଲିଯାଇଥିବାରୁ ପରିବାରବର୍ଗ ଓ ଗାଁ ଲୋକେ ଦୁଃଖରେ ରହିଥିବା ବେଳେ ମୃତଦେହ ବ୍ୟବଚ୍ଛେଦ ପାଇଁ ଏହିଭଳି ଟଙ୍କା ମାଗିବା ଘଟଣାକୁ ଅଞ୍ଚଳବାସୀ ନିନ୍ଦା କରିଛନ୍ତି। ଏନେଇ ଗାଁ ଲୋକେ ଥାନାରେ ଲିଖିତ ଅଭିଯୋଗ କରିବା ସହିତ ଜିଲା ମୁଖ୍ୟ ଚିକିତ୍ସାଧିକାରୀ ଓ କାଶୀପୁର ଗୋଷ୍ଠୀ ସ୍ବାସ୍ଥ୍ୟ ଅଧିକାରୀଙ୍କୁ ମଧ୍ୟ ଅଭିଯୋଗ କରିଛନ୍ତି । ଅଭିଯୋଗ ପାଇବା ପରେ କାଶୀପୁର ଗୋଷ୍ଠୀ ସ୍ବାସ୍ଥ୍ୟାଧିକାରୀ ଏନେଇ ଜିଲା ମୁଖ୍ୟ ଚିକିତ୍ସାଧିକାରୀଙ୍କୁ କାର୍ଯ୍ୟାନୁଷ୍ଠାନ ଚିଠି କରିଛନ୍ତି। ହେଲେ ଏନେଇ ସାମାଜିକ କର୍ମୀ ବଳରାମ ପଣ୍ଡା କହିଛନ୍ତି ଯେ, ଗରିବ ଲୋକଙ୍କ ପାଇଁ ରାଜ୍ୟ ସରକାର ଓ କେନ୍ଦ୍ର ସରକାର ବିଭିନ୍ନ ଉନ୍ନତିମୂଳକ ଯୋଜନା କରୁଥିବା ବେଳେ ସରକାରୀ ବ୍ୟବସ୍ଥା କଳରେ ଏହିଭଳି ଅମାନବୀୟ କାର୍ଯ୍ୟ ଲୋକଙ୍କୁ ସୁବିଧା ପାଇବାରୁ ବଞ୍ଚିତ କରୁଛି। ଲୋକେ ଭୟଭୀତ ହୋଇ ଆଉ ସରକାରୀ କାର୍ଯ୍ୟାଳୟକୁ ଯାଉନାହାନ୍ତି ବୋଲି କହିଛନ୍ତି ବଳରାମ। ତେଣୁ ଜିଲା ପ୍ରଶାସନ ଏଥିରେ ହସ୍ତକ୍ଷେପ କରି ଜିଲାରେ ଘଟୁଥିବା ଏହିଭଳି ଦୁର୍ନୀତି ଉପରେ ସମ୍ପୂର୍ଣ୍ଣ ଅଙ୍କୁଶ ଲଗାଇବା ଆବଶ୍ୟକ ବୋଲି କହିଛନ୍ତି ବଳରାମ।
