ଚିତ୍ରକୂଟ, ୧।୫ : ଉତ୍ତରପ୍ରଦେଶରେ ଚିତ୍ରକୂଟ ମଣ୍ଡଳର ଦାୟିତ୍ୱରେ ଥିବା ମନ୍ତ୍ରୀ ଜୟବୀର ସିଂ ରବିବାର ସ୍ଥାନୀୟ ଜିଲା ହସ୍ପିଟାଲ ଅଚାନକ ଗସ୍ତ କରିଥିଲେ। ଏହି ସମୟରେ ମନ୍ତ୍ରୀ ଜିଲା ହସ୍ପିଟାଲରେ ବହୁ ତ୍ରୁଟି ଦେଖିଥିଲେ। ମନ୍ତ୍ରୀ ଅଚାନକ ଏକ ୱାର୍ଡରେ ରୋଗୀମାନଙ୍କ ଅବସ୍ଥା ଜାଣିବା ଏବଂ ଫଳ ବଣ୍ଟନ କରିବା ପାଇଁ ସେଠାରେ ପହଞ୍ଚିଥିଲେ। ସେତେବେଳେ ସେଠାରେ ଡାକ୍ତର ଜଣେ ମୃତ ରୋଗୀଙ୍କର ଚିକିତ୍ସା କରୁଥିବାର ଦେଖିବାକୁ ମିଳିଥିଲା।
ଚିକିତ୍ସା କରୁଥିବା ଡାକ୍ତର ଜଣକ ମୃତ ମହିଳାଙ୍କୁ ବେଡସିଟ୍ରେ ଘୋଡ଼ାଇ ଚିକିତ୍ସା କରୁଥିଲେ। ମିଳିଥିବା ସୂଚନା ଅନୁଯାୟୀ, ଏହି ମହିଳାଙ୍କ ନାମ ମୈକି । କିଛି ଘଣ୍ଟା ପୂର୍ବରୁ ତାଙ୍କର ମୃତ୍ୟୁ ଘଟିଥିଲା। ତେବେ ଏହା ଜାଣି ନ ଥିବା ମନ୍ତ୍ରୀ ମୃତ ମହିଳାଙ୍କ ସ୍ବାସ୍ଥ୍ୟାବସ୍ଥା ସମ୍ପର୍କରେ ପଚାରି ବୁଝିବା ପରେ ଫଳ ରଖି ସେଠାରୁ ଚାଲିଯାଇଥିଲେ।
ଏହି ସମୟରେ ସେଠାରେ ଥିବା ଜିଲା ପଞ୍ଚାୟତର ସଦସ୍ୟ ମୀରା ଭାରତୀ ସ୍ବାସ୍ଥ୍ୟ ବିଭାଗର ଏଭଳି କାର୍ଯ୍ୟ ନେଇ ପ୍ରଶ୍ନ ଉଠାଇଥିଲେ। ସେ ମନ୍ତ୍ରୀ ଙ୍କୁ କହିଛନ୍ତି ଯେ ଯେଉଁ ମହିଳାଙ୍କୁ ସେ ବର୍ତ୍ତମାନ ଫଳ ଦେଇଛନ୍ତି, ତାଙ୍କର କିଛି ଘଣ୍ଟା ମୃତ୍ୟୁ ଘଟି ସାରିଛି।
ଏହା ଶୁଣି ମନ୍ତ୍ରୀ ମଧ୍ୟ ଆଶ୍ଚର୍ଯ୍ୟ ହୋଇ ଡାକ୍ତରମାନଙ୍କୁ ପଚରାଉଚରା କରିଥିଲେ। ଏ ସମ୍ପର୍କରେ ମନ୍ତ୍ରୀ ତୁରନ୍ତ ଡାକ୍ତରଖାନାର ଦାୟିତ୍ୱରେ ଥିବା ସିଏମଏସଙ୍କଠାରୁ ସ୍ପଷ୍ଟୀକରଣ ମାଗିଛନ୍ତି ଏବଂ ମାମଲାର ଯାଞ୍ଚ୍ କରିବା ପରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଡିଏମଙ୍କୁ ନିର୍ଦ୍ଦେଶ ଦେଇଛନ୍ତି।
