ଅହମ୍ମଦାବାଦ,୨୯।୧୧: ଆଉ ଦିନକ ପରେ ଗୁଜୁରାଟ ବିଧାନସଭା ନିର୍ବାଚନ। ଏହାକୁ ନେଇ ରାଜନୀତି ବେଶ୍ ସରଗରମ ରହିଛି। ଆଜି ପଥମ ପର୍ଯ୍ୟାୟ ନିର୍ବାଚନ ପାଇଁ ପ୍ରଚାରର ଶେଷ ଦିନ ଥିବା ବେଳେ ବହୁ ବରିଷ୍ଠ ନେତା ଜୋରଦାର ପ୍ରଚାର ଚଳାଇଛନ୍ତି। ଏହାରି ମଧ୍ୟରେ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖାର୍ଗେ କ୍ରମାଗତ ଭାବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଟାର୍ଗେଟ କରିଆସୁଛନ୍ତି। ଏଥିସହ ଭାଜପା ମଧ୍ୟ ମୁହଁ ତୋଡ ଜବାବ ଦେଉଛି। ଖାର୍ଗେ ଅହମ୍ମଦାବାଦର ବେହରାମପୁରାରେ ଏକ ସାଧାରଣ ସଭାରେ ମୋଦିଙ୍କୁ ରାବଣଙ୍କ ସହ ତୁଳନା କରିଛନ୍ତି। ସେ କହିଛନ୍ତି, କର୍ପୋରେସନ ନିର୍ବାଚନ ହେଉ କି ବିଧାୟକ ନିର୍ବାଚନ ହେଉ କିମ୍ବା ଏମ୍ପି ନିର୍ବାଚନରେ ଆମେ ଆପଣଙ୍କ ମୁହଁ ସବୁଆଡେ ଦେଖିବାକୁ ପାଉଛୁ, ଆପଣଙ୍କର ରାବଣ ପରି ୧୦୦ଟି ମୁଣ୍ଡ ଅଛି କି ବୋଲି ଖାର୍ଗେ କହିଛନ୍ତି। ତେବେ ଏଭଳି ପ୍ରତିକ୍ରିୟାକୁ ନେଇ ଭାଜପା ଅସନ୍ତୋଷ ପ୍ରକାଶ କରିଛି।
