ଭୁବନେଶ୍ୱର,୮।୭(ସୂର୍ଯ୍ୟକାନ୍ତ ବେହେରା): ଟିକସ ଫାଙ୍କିବା ଅଭିଯୋଗରେ ରିୟଲ୍ ଇଷ୍ଟେଟ୍ କମ୍ପାନୀ ଡିଏନ୍ ଗ୍ରୁପ୍ ଉପରେ ଲଗାତର ତିନିଦିନ ଧରି ଆୟକର ବିଭାଗ ଚଢାଉ ଜାରି ରଖିଛି। ତଦନ୍ତ ଯେତେ ଭିତରକୁ ଯାଉଛି, ସେତେ କଳାଧନ ମିଳୁଥିବା ଜଣାପଡିଛି। ତେବେ ପ୍ରଥମ ଦିନ କର୍ମଚାରୀଙ୍କ ଘରୁ ୩୦ କୋଟି ନଗଦ ଟଙ୍କା ଜବତ ହେବା ଓ ଗୁରୁବାର ଦ୍ୱିତୀୟ ଦିନରେ ଡିଏନ୍ ଗ୍ରୁପ୍ର ୧୦୫ କୋଟିରୁ ଅଧିକ ଟଙ୍କାର ବ୍ୟବସାୟିକ କାରବାର ଚିଠା ମିଳିବା ପରେ ଆୟକର ଟିମ୍ ତଦନ୍ତ ପ୍ରକ୍ରିୟାକୁ ଜୋର୍ଦାର କରିଛି। ଶୁକ୍ରବାର ଆୟକର ଅଧିକାରୀମାନେ ଆଇଆର୍ସି ଭିଲେଜସ୍ଥିତ ମୁଖ୍ୟ କାର୍ଯ୍ୟାଳୟରେ ପହଞ୍ଚତ୍ ଡିଏନ ଗ୍ରୁପ୍ର ଅଧ୍ୟକ୍ଷ ଜଗ୍ଦୀଶ ପ୍ରସାଦ ନାୟକ ଓ ସହଯୋଗୀଙ୍କ ସମେତ ଅନ୍ୟମାନଙ୍କୁ ମାରାଥନ ପଚରାଉଚରା କରିଛି। ଏହାସହ ୩୦କୋଟି ଟଙ୍କା ରଖିଥିବା ଡିଏନ୍ ଗ୍ରୁପ୍ର ଲିଗାଲ ଅଫିସର ଚନ୍ଦ୍ରଶେଖର ପଣ୍ଡାଙ୍କ ବନ୍ଧୁ ନୀରଜ ସିଂଙ୍କୁ ମଧ୍ୟ ଜେରା କରିଥିବା ଜଣାପଡିଛି। ତେବେ ନୀରଜ ସିଂ କିଏ ଓ ଡିଏନ୍ ଗ୍ରୁପ୍ କାର୍ଯ୍ୟରେ ତାଙ୍କର ଭୂମିକା କ’ଣ ତାକୁ ନେଇ ଅଧିକ ଖୋଳତାଡ ଚାଲିଛି। ପଚରାଉଚରାବେଳେ ଏମାନଙ୍କଠାରୁ ଡିଏନ୍ ଗ୍ରୁପ୍ ଠୁଳ କରିଥିବା କଳାଧନର ବିଭିନ୍ନ ଉତ୍ସକୁ ଧରିଛନ୍ତି ଆୟକର ଅଧିକାରୀ। ଆଉ କେତେ ବେନାମୀ ସମ୍ପତ୍ତି ଲୁଚାଇଛନ୍ତି, କେତେ ଆୟକର ଫାଙ୍କି ହୋଇଛି ତାହାର ହିସାବ ଖୋଜି ଚାଲିଛନ୍ତି। ଅନ୍ୟପକ୍ଷରେ ଡିଏନ୍ ଗ୍ରୁପର ବେଆଇନ ଆର୍ଥିକ କାରବାର କଥା ସାମ୍ନାକୁ ଆସୁଥିବାରୁ କିଛି ନେତା ଓ ପ୍ରଶାସକ ଏଥିରେ ପୁଞ୍ଜିନିବେଶ କରିଥିବା ଅଭିଯୋଗ ଉଠୁଥିବାରୁ ବିଭାଗ ଏ ଦିଗରେ ମଧ୍ୟ ତଦନ୍ତକୁ ଆଗକୁ ନେଇଛି। ରାଜଧାନୀର ଆଖପାଖ ଅଞ୍ଚଳରେ ଡିଏନ୍ ଗ୍ରୁପ୍କୁ ବେଆଇନ ଭାବେ ସରକାରୀ ଜମି ଦିଆଯାଇଛି ଥିବା କଥା ବି ଉଠୁଛି। ଏଥିରେ ବଡ଼ ଧରଣର ସ୍କାମ ହୋଇଥିବା ଅଭିଯୋଗ ହେଉଛି। ଏହାକୁ ତଦନ୍ତ ପରିସରଭୁକ୍ତ କରିବାକୁ ଦାବି ହେଉଛି। ତେଣୁ ଏତେ ପରିମାଣର ନଗଦ ଅର୍ଥ ଓ ବେନାମୀ ସମ୍ପତ୍ତିର ସୁରାକ ମିଳିବା ପରେ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ତତ୍ପର ହୋଇପଡିଛି। କେଉଁ ମୁହୂର୍ତ୍ତରେ ଇଡି ତଦନ୍ତ ଭାର ହାତକୁ ନେଇ ଚଢାଉ କରିବ ବୋଲି ଚର୍ଚ୍ଚା ଚାଲିଛି।
ସୂଚନା ଅନୁସାରେ, ଡିଏନ୍ ଗ୍ରୁପ୍ ବିରୋଧରେ ଆୟକର ଫାଙ୍କି ନେଇ ଅଭିଯୋଗ ଆସିଥିଲା। ବୁଧବାର ସକାଳେ ୭ଟି ଟିମ୍ ଭୁବନେଶ୍ବର ନୂଆପଲ୍ଲୀସ୍ଥିତ ଅଫିସ, ଘର, କଟକ ସମେତ ୨୦ଟି ସ୍ଥାନରେ ଚଢ଼ାଉ କରିଥିଲା। ୟୁନିଟ-୪ରେ ଥିବା ପୋଷ୍ଟାଲ କଲୋନିରେ ରହୁଥିବା ଡିଏନ୍ ଗ୍ରୁପ୍ର ଲିଗାଲ ଅଫିସର ଚନ୍ଦ୍ରଶେଖର ପଣ୍ଡାଙ୍କ ଘର ଖଟ ତଳେ ୩ଟି ଟ୍ରଙ୍କ ଓ ଗୋଟିଏ ଆଟାଚିରେ ଥିବା ୩୦କୋଟି ଟଙ୍କା ଜବତ କରାଯାଇଥିଲା। ଏହାପରଠାରୁ ଆୟକର ଟିମ୍ ଚଢ଼ାଉ, ଯାଞ୍ଚ ଓ ଜେରା ଚଳାଇଥିବାବେଳେ କଳାଧନର ହିସାବ ସରୁ ନ ଥିବା ଜଣାପଡିଛି। ତେବେ ତଦନ୍ତ ଚାଲିଥିବାରୁ ବିଭାଗ ପକ୍ଷରୁ ଅଧିକ କିଛି ସୂଚନା ଦିଆଯାଇନାହିଁ।
