ବରଗଡ଼,୧୨।୩(ପ୍ରେମାନନ୍ଦ ଖମାରୀ)- ରବି ଧାନ ସଂଗ୍ରହ ପ୍ରକ୍ରିୟା ପାଇଁ ଗତ ମଙ୍ଗଳବାରରୁ ଚାଷୀ ପଞ୍ଜୀକରଣ ପ୍ରକ୍ରିୟା ଆରମ୍ଭ ହୋଇଛି। ତେବେ ଏଥିପାଇଁ ରହିଥିବା ଅବଧିକୁ ନେଇ ଆରମ୍ଭରୁ ବରଗଡ଼ ଜିଲାରେ ଚାଷୀ ଅସନ୍ତୋଷ ଦେଖାଯାଇଛି। ପଞ୍ଜୀକରଣ ଅବଧିକୁ ଆସନ୍ତା ଏପ୍ରିଲ ମାସ ୧୦ତାରିଖ ପର୍ଯ୍ୟନ୍ତ ବୃଦ୍ଧି କରିବା ପାଇଁ ଜିଲାର ବିଭିନ୍ନ ଚାଷୀ ସଂଗଠନ ଦାବି କରିଛନ୍ତି। ଏହି କ୍ରମରେ ବୁଧବାର ସଂଯୁକ୍ତ କୃଷକ ସଂଗଠନ, ବାରପାହାଡ କୃଷକ ସଂଗଠନ, ଅତାବିରା କୃଷକ ସଂଗଠନର ପ୍ରତିନିଧିମାନେ ସ୍ଥାନୀୟ ସମବାୟ ଉପ ନିବନ୍ଧକ (ଡିଆରସିଏସ୍) ଯୁଗଳ କିଶୋର ଦାଶଙ୍କୁ ଭେଟି ଦାବି ଜଣାଇଛନ୍ତି। ସୂଚନା ଅନୁଯାୟୀ, ଗତ ୧୨ତାରିଖରୁ ରବିଧାନ ସଂଗ୍ରହ ପାଇଁ ଚାଷୀ ପଞ୍ଜୀକରଣ ପ୍ରକ୍ରିୟା ଆରମ୍ଭ ହୋଇଛି। ସରକାରୀ ବିଜ୍ଞପ୍ତି ଅନୁଯାୟୀ, ପଞ୍ଜୀକରଣ ପାଇଁ ଚଳିତ ମାସ ୧୦ତାରିଖରୁ ୨୦ତାରିଖ ପର୍ଯ୍ୟନ୍ତ ପ୍ରାଥମିକ କୃଷି ସମବାୟ ସମିତିର ଉଦ୍ଦିଷ୍ଟ ଆବେଦନ ଫର୍ମ ବଣ୍ଟନ ଅବଧି ରହିଛି । ସେହିପରି ଆସନ୍ତା ୨୨ତାରିଖ ସୁଦ୍ଧା ଆବଶ୍ୟକ କାଗଜପତ୍ର ଦାଖଲ ସହିତ ଆବେଦନ ଫର୍ମ ଜମା ଏବଂ ଆବେଦନ ଫର୍ମର ଡିଜିଟାଇଜେଶନ ଅବଧି ରହିଛି। ଏହାପରେ ନିର୍ଦ୍ଦିଷ୍ଟ ସମୟସୀମା ମଧ୍ୟରେ ବିଭାଗୀୟ ଅଧିକାରୀଙ୍କ କାର୍ଯ୍ୟାଳୟରେ ଆବେଦନ ଫର୍ମ ଗୁଡିକର ଯାଞ୍ଚ ପରେ ପଞ୍ଜୀକୃତ ଚାଷୀଙ୍କ ଚୂଡାନ୍ତ ତାଲିକା ଜେନେରେଶନ ହେବ ବୋଲି ବିଜ୍ଞପ୍ତିରେ ଉଲ୍ଲେଖ ରହିଛି। ତେବେ ଜିଲାର ଚାଷୀମାନେ ଆବଶ୍ୟକ କାଗଜପତ୍ର ଦାଖଲ ସତ୍ତ୍ବେ ଏପର୍ଯ୍ୟନ୍ତ ଗତ ଖରିଫ ଧାନ କିଣାବିକା ପାଇଁ ପଞ୍ଜୀକୃତ ହୋଇ ନ ପାରି ଅମଳ ଧାନ ବିକ୍ରି କରି ପାରି ନ ଥିବାବେଳେ ଏଭଳି ସ୍ବଳ୍ପ ଅବଧିରେ ରବି ଧାନ ସଂଗ୍ରହ ପ୍ରକ୍ରିୟା ପାଇଁ ପଞ୍ଜୀକରଣ କରିବା ସେମାନଙ୍କ ପକ୍ଷରେ ସମ୍ଭବ ନୁହେଁ ବୋଲି ଚାଷୀ ସଂଗଠନ ଗୁଡ଼ିକ ଅଭିଯୋଗ କରିଛନ୍ତି ଏବଂ ପଞ୍ଜୀକରଣ ପ୍ରକ୍ରିୟାକୁ ଏକ ମାସ ବୃଦ୍ଧି କରିବା ପାଇଁ ଦାବି କରିଛନ୍ତି। ଏହି ଦାବି ନେଇ ସମବାୟ ଉପ ନିବନ୍ଧକଙ୍କୁ ଭେଟିବା ସମୟରେ ସଂଯୁକ୍ତ କୃଷକ ସଂଗଠନର ନିରଞ୍ଜନ ପ୍ରଧାନ, ସୁରେଶ ନିକାଣ୍ଟି, ବାରପାହାଡ କୃଷକ ସଂଗଠନର ଈଶାନ୍ତ ଭୋଇ, ରୋହିତ ଖମାରୀ, ଅତାବିରା କୃଷକ ସଂଗଠନର ବିରେନ୍ଦ୍ର କର, ଟିକେଲାଲ ମିଶ୍ର, ସୁବାସ ବିଶ୍ବାଳ ପ୍ରମୁଖ ଉପସ୍ଥିତ ଥିଲେ।
