ନୂଆଦିଲ୍ଲୀ, ୩୦।୬- କିମ୍ବଦନ୍ତୀ ଭାରତୀୟ ବ୍ୟାଟ୍ସମ୍ୟାନ ସଚିନ ତେନ୍ଦୁଲକରଙ୍କୁ ଆଉଟ୍ କରିବା ପ୍ରତି ବୋଲରଙ୍କ ଏକ ସ୍ବପ୍ନ ରହିଥାଏ। ବର୍ତ୍ତମାନ ଭାରତୀୟ ଦ୍ରୁତ ବୋଲିଂ ବିଭାଗର ଭାର ସମ୍ଭାଳୁଥିବା ଭୁବନେଶ୍ୱର କୁମାରଙ୍କୁ ମଧ୍ୟ ପ୍ରଥମ ଶ୍ରେଣୀ କ୍ରିକେଟ୍ରେ ଥରେ ସଚିନଙ୍କୁ ଆଉଟ୍ କରିବାର ସୁଯୋଗ ମିଳିଥିଲା। ୨୦୦୯ରେ ମାତ୍ର ୧୯ ବର୍ଷ ବୟସରେ ଭୁବନେଶ୍ୱର ଉତ୍ତର ପ୍ରଦେଶ ପକ୍ଷରୁ ଖେଳୁଥିବାବେଳେ ସଚିନଙ୍କୁ ଶୂନରେ ଆଉଟ୍ କରିଥିଲେ। ସଚିନ ମୁମ୍ବାଇ ପକ୍ଷରୁ ଖେଳୁଥିଲେ। ଭୁବନେଶ୍ୱରଙ୍କ ଏକ କଟର୍ ବଲ୍ ସଚିନଙ୍କ ବ୍ୟାଟ୍ର ଇନ୍ସାଇଡ୍ ଏଜ୍ ଲାଗି ଫିଲ୍ଡରଙ୍କ ହାତକୁ ଚାଲିଯାଇଥିଲା। ଫଳରେ ଖାତା ଖୋଲିବା ପୂର୍ବରୁ ସଚିନଙ୍କୁ ଶୂନରେ ପ୍ୟାଭିଲିୟନ ଫେରାଇ ଦେଇଥିଲେ ଭୁବନେଶ୍ୱର। ଏହି ମୁହୂର୍ତ୍ତକୁ ଆଜି ପର୍ଯ୍ୟନ୍ତ ଭୁଲି ପାରି ନ ଥିବା ଉତ୍ତର ପ୍ରଦେଶର ଏହି ସୁଇଂ ବୋଲର କହିଛନ୍ତି। ‘ସଚିନଙ୍କୁ ଆଉଟ୍ କରିବା ମୋ ପାଇଁ ଏକ ସୌଭାଗ୍ୟପୂର୍ଣ୍ଣ ମୁହୂର୍ତ୍ତ ଥିଲା। ଯାହାକୁ ଶଦ୍ଦରେ ବର୍ଣ୍ଣନା କରିହେବ ନାହିଁ। ଏହି ମୁହୂର୍ତ୍ତକୁ କେବଳ ଅନୁଭବ କରିହେବ। ଏହି କଟର୍ ବଲ୍ଟି ସଚିନଙ୍କ ବ୍ୟାଟ୍ର ଇନ୍ ସାଇଡ୍ ଏଜ୍ ଲାଗି ସିଧା ଫିଲ୍ଡର ହାତକୁ ଚାଲିଯାଇଥିଲା। ସେତେବେଳେ ଉତ୍ତର ପ୍ରଦେଶ ଦଳର ଅଧିନାୟକ ଥିବା ମହମ୍ମଦ କୈଫଙ୍କୁ ମଧ୍ୟ ଏଥିଲାଗି ଧନ୍ୟବାଦ ଦେବି। ସେ ଫିଲ୍ଡରକୁ ନେଇ ଏକ ଅଜବ ସ୍ଥାନରେ ଠିଆ କରାଇଥିଲେ। ଯେଉଁଠିକି ସାଧାରଣତଃ କୌଣସି ଫିଲ୍ଡର ଠିଆ ହୋଇ ନ ଥାନ୍ତି’ ବୋଲି ଭୁବନେଶ୍ୱର ଏକ ସାକ୍ଷାତ୍କାର ଅବସରରେ କହିଛନ୍ତି। ପ୍ରଥମ ଶ୍ରେଣୀ କ୍ରିକେଟ୍ରେ ଶୂନରେ ଆଉଟ୍ ହେବାରେ ସଚିନଙ୍କ ପାଇଁ ଏହା ପ୍ରଥମ ଘଟଣା ଥିଲା।
