ମସ୍କୋ/କିଭ୍,୨୬।୧୨ : ରୁଷିଆ ୟୁକ୍ରେନ୍ ଯୁଦ୍ଧରେ ଏବେ ନୂଆ ମୋଡ଼ ଆସିଛି। ଆକ୍ରମଣର ସମ୍ମୁଖୀନ ହୋଇଥିବା ୟୁକ୍ରେନ ବର୍ତ୍ତମାନ ଯୁଦ୍ଧର ଗତି ବଦଳାଇ ରୁଷିଆର କେତେକ ଅଞ୍ଚଳରେ ଆକ୍ରମଣ ଆରମ୍ଭ କରିଛି। ସଦ୍ୟତମ ମାମଲା ରୁଷିଆର ଏଞ୍ଜେଲ୍ସ ଏୟାରବେସ ଉପରେସୋମବାର ସକାଳେ ଦୁଇଟି ବଡ ବିସ୍ଫୋରଣ ଘଟିଛି। ଏହି ଆକ୍ରମଣ ୟୁକ୍ରେନ ପକ୍ଷରୁ ହୋଇଛି ବୋଲି ଏପର୍ଯ୍ୟନ୍ତ ନିଶ୍ଚିତ ହୋଇନାହିଁ। ଯଦି ଏଭଳି ହୋଇଥାଏ ତେବେ ଏହା ରୁଷିଆ ପାଇଁ ଚିନ୍ତାର ବିଷୟ ହେବ। କାରଣ ଏଞ୍ଜେଲ୍ସ ଏୟାରବେସ ରୁଷିଆ-ୟୁକ୍ରେନ ସୀମାଠାରୁ ପ୍ରାୟ ୬୦୦ କିଲୋମିଟର ଦୂରରେ ଅବସ୍ଥିତ ।
ନ୍ୟୁଜ ଏଜେନ୍ସି ରଏଟର୍ସ ଅନୁଯାୟୀ, ୟୁକ୍ରେନ ଏବଂ ରୁଷିଆର ଗଣମାଧ୍ୟମ ଏହି ବିସ୍ଫୋରଣ ସମ୍ପର୍କରେ ରିପୋର୍ଟ ପ୍ରକାଶ କରିଛନ୍ତି। ଏୟାରବେସରେ ଦୁଇଟି ବଡ଼ ଧରଣର ବିସ୍ଫୋରଣ ହୋଇଥିବା ସୂଚନା ମିଳିଛି। କିଛି ସ୍ଥାନୀୟ ଲୋକ କହିଛନ୍ତି ଯେ ବିସ୍ଫୋରଣର କିଛି ସମୟ ପୂର୍ବରୁ ଏୟାର ସାଇରନ ଶବ୍ଦ ଶୁଣା ଯାଇଥିଲା।
କୂଟନୈତିକ ଦୃଷ୍ଟିରୁ ରୁଷ ପାଇଁ ଏଞ୍ଜେଲ୍ସ ଏୟାରବେସ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ଏହା ରୁଷିାର ସାରାଟୋଭ ସହର ନିକଟରେ। ରୁଷିଆର ରାଜଧାନୀ ମସ୍କୋଠାରୁ ଏହାର ଦୂରତା ୭୩୦ କିଲୋମିଟର। ଡିସେମ୍ବର ୫ ରେ ମଧ୍ୟ ଏହି ଏୟାରବେସରେ ୟୁକ୍ରେନ ଡ୍ରୋନ ଆକ୍ରମଣ ହେବାର ଖବର ଆସିଥିଲା। ରୁଷିା କିମ୍ବା ୟୁକ୍ରେନ ଏହାକୁ ନେଇ ସେତେବେଳେ କୌଣସି ମନ୍ତବ୍ୟ ପ୍ରଦାନ କରି ନ ଥିଲେ।
ତେବେ ବର୍ତ୍ତମାନ ଏହି ଏୟାରବେସ ଉପରେ ଆଉ ଏକ ଆକ୍ରମଣ ରୁଷିଆର ସାମରିକ ଭାବମୂର୍ତ୍ତିକୁ ବ୍ୟାପକ କ୍ଷତି ପହଞ୍ଚାଇପାରେ। ବିଶ୍ଳେଷକମାନେ କହିଛନ୍ତି ଯେ ଯଦି ଏହି ଆକ୍ରମଣ ୟୁକ୍ରେନରୁ କରାଯାଇଛି, ତେବେ ଏହା ରୁଷିଆର ବାୟୁ ପ୍ରତିରକ୍ଷାର ଏକ ପ୍ରମୁଖ ବିଫଳତା ଭାବରେ ଦେଖାଯିବ।
