ନୂଆଦିଲ୍ଲୀ,୭।୧୧ : ଅର୍ଥନୈତିକ ଦୁର୍ବଳ ବର୍ଗ (ଇଡବ୍ଲୁଏସ)ଙ୍କ ପାଇଁ ୧୦ ପ୍ରତିଶତ ସଂରକ୍ଷଣ ବ୍ୟବସ୍ଥା ଉପରେ ସୁପ୍ରିମକୋର୍ଟର ସାମ୍ବିଧାନିକ ପୀଠରେ ଅସହମତି ପ୍ରକାଶ ପାଇଛି। ୫ରୁ ୩ ଜଣ ବିଚାରପତି କହିଛନ୍ତି ଏହା ସାମ୍ବିଧାନିକ ବ୍ୟବସ୍ଥାର ଉଲ୍ଲଂଘନ କରୁ ନାହିଁ। ପ୍ରଧାନ ବିଚାରପତି ୟୁୟୁ ଲଲିତଙ୍କ ସମେତ ୫ ଜଣ ବିଚାରପତିଙ୍କ ନେତୃତ୍ୱରେ ଗଠିତ ସାମ୍ବିଧାନିକ ଖଣ୍ଡପୀଠ ଏହି ମାମଲାର ଶୁଣାଣି କରିଛନ୍ତି।
ଇଡବ୍ଲୁଏସ ସଂରକ୍ଷଣର ବୈଧତାକୁ ଚ୍ୟାଲେଞ୍ଜ କରୁଥିବା ଅନେକ ଆବେଦନ ଉପରେ ଦୀର୍ଘ ଦିନର ଶୁଣାଣି ପରେ ସର୍ବୋଚ୍ଚ ନ୍ୟାୟାଳୟ ସେପ୍ଟେମ୍ବର ୨୭ ରେ ଏହାର ରାୟ ସଂରକ୍ଷିତ ରଖିଥିଲେ। ଖଣ୍ଡପୀଠ ଏହି ସଂରକ୍ଷଣ ବ୍ୟବସ୍ଥା ସମ୍ବିଧାନର ମୌଳିକ ସଂରଚନାକୁ ଉଲ୍ଲଂଘନ କରୁଛି କି ନାହିଁ ତାହା ସ୍ଥିର କରିବା ନେଇ ବିଚାର କରିଥିଲେ। ୫ ଜଣିଆ ଖଣ୍ଡପୀଠ ମଧ୍ୟରୁ ୫ ଜଣ ବିଚାରପତି ଏହା ସପକ୍ଷରେ ମତ ଦେଇଥିଲେ। ଜଷ୍ଟିସ ଦୀନେଶ ମହେଶ୍ୱରୀ କହିଥିଲେ ଯେ ଏହି ସଂରକ୍ଷଣ ସମ୍ବିଧାନର ମୌଳିକ ଗଠନକୁ ଉଲ୍ଲଂଘନ କରୁନାହିଁ। ଏଥି ସହିତ ଜଷ୍ଟିସ ବେଲା ତ୍ରିବେଦୀ ମଧ୍ୟ ଏହାର ସପକ୍ଷରେ ଥିଲେ। ସେ କହିଥିଲେ ଯେ ଇଡବ୍ଲୁଏସ ସଂରକ୍ଷଣ ସମ୍ବିଧାନର ବିରୋଧୀ ନୁହେଁ। ଜଷ୍ଟିସ ଜେବି ପାରଦିଓ୍ବାଲା ମଧ୍ୟ ସପକ୍ଷରେ ମତ ଦେଇଥିଲେ।
ତେବେ ପ୍ରଧାନ ବିଚାରପତି ୟୁୟୁ ଲଳିତ ଏବଂ ଏସ୍ ରବିନ୍ଦ୍ର ଭଟ୍ଟ ଏନେଇ ଅସହମତି ପ୍ରକାଶ କରିଥିଲେ।
ଏହି ସଂରକ୍ଷଣ ଜାରି ରହିବ ବୋଲି ଶୀର୍ଷକୋର୍ଟ କହିଛନ୍ତି।
