ଭୁବନେଶ୍ୱର, ୭ା୫(ବ୍ୟୁରୋ): ୭ କୋଟିର ଠକେଇ ମାମଲାରେ ଚିଟ୍ଫଣ୍ଡ ସଂସ୍ଥାର ନିର୍ଦ୍ଦେଶିକାଙ୍କୁ କ୍ରାଇମବ୍ରାଞ୍ଚର ଅର୍ଥନୈତିକ ଅପରାଧ ଶାଖା (ଇଓଡବ୍ଲ୍ୟୁ) ଢେଙ୍କାନାଳରୁ ଗିରଫ କରିଛି। ସେ ହେଲେ ଚିଟ୍ଫଣ୍ଡ ସଂସ୍ଥା ‘ପର୍ପଲ କ୍ୱାଲ୍ଭସ୍ ଫାଇନାନ୍ସିିଆଲ ସର୍ଭିସେସ୍ ପ୍ରାଇଭେଟ ଲିମିଟେଡ’ର ନିର୍ଦ୍ଦେଶିକା ପଲ୍ଲବୀ ମିଶ୍ର। ତାଙ୍କ ଘର ଢେଙ୍କାନାଳ ଜିିଲା ସଦର ଥାନା ଅନ୍ତର୍ଗତ ବଣିସିଂହ ଗ୍ରାମରେ। ପୂର୍ବରୁ ମାର୍ଚ୍ଚ ୧୧ରେ ଢେଙ୍କାନାଳ ଟାଉନ ଥାନା ପୋଲିସ ଏକ ଠକେଇ ମାମଲା( ନଂ.୧୩୧/୨୦୨୨) ରୁଜୁ କରି ପଲ୍ଲବୀଙ୍କ ସ୍ବାମୀ ତଥା ନିର୍ଦ୍ଦେଶକ ସତ୍ୟରଞ୍ଜନ ହୋତାଙ୍କୁ ଗିରଫ କରିଥିଲା। ସେ ଏବେ ବିଚାରାଧୀନ କଏଦୀ ଭାବେ ଜେଲରେ ଅଛନ୍ତି। ଏହି ଘଟଣାର ବଳିଷ୍ଠ ତଦନ୍ତ ପାଇଁ ଇଓଡବ୍ଲ୍ୟୁ ଏପ୍ରିଲ ୨୭ରେ ନିଜ ଆଡୁ ଏକ ମାମଲା( ନଂ.୧୦/୨୦୨୨) ରୁଜୁ କରି ତଦନ୍ତ ଆରମ୍ଭ କରିଥିଲା। ଗିରଫ ପରେ ଅଭିଯୁକ୍ତା ପଲ୍ଲବୀଙ୍କୁ ଗୁରୁବାର ଇଓଡବ୍ଲ୍ୟୁ କଟକ ଓପିଆଇଡି କୋର୍ଟକୁ ଚାଲାଣ କରିଥିଲା। ସେଠାରେ ଜାମିନ ନାମଞ୍ଜୁର ହେବାରୁ ତାଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି।
ସୂଚନା ଅନୁଯାୟୀ, ଅଭିଯୁକ୍ତ ସତ୍ୟରଞ୍ଜନ ଭୁବନେଶ୍ୱର ପଟିଆସ୍ଥିତ ଡିଏଲ୍ଏଫ୍ ବିଲ୍ଡିଂରେ ‘ପର୍ପଲ କ୍ୱାଲ୍ଭସ୍ ଫାଇନାନ୍ସିଆଲ ସର୍ଭିସେସ୍ ପ୍ରାଇଭେଟ ଲିମିଟେଡ’ରେ ଏକ ଚିଟ୍ଫଣ୍ଡ ସଂସ୍ଥା ଖୋଲିଥିଲେ। ସେ ଓ ତାଙ୍କ ସ୍ତ୍ରୀ ଏହାର ନିର୍ଦ୍ଦେଶକ ଥିଲେ। ଏହି ସଂସ୍ଥା ଦ୍ୱାରା ଉଭୟେ କୋଟି କୋଟି ଟଙ୍କା ହଡ଼ପ କରିବାକୁ ଯୋଜନା କରିଥିଲେ। ତାଙ୍କ କମ୍ପାନୀରେ ଟଙ୍କା ଜମା କଲେ ଏହାକୁ ଶେୟାରରେ ଲଗାଇ ଅଧିକ ସୁଧ ଦେବାକୁ ଲୋକଙ୍କୁ ପ୍ରତିଶ୍ରୁତି ଦେଇଥିଲେ। ଉକ୍ତ କଥାକୁ ବିଶ୍ୱାସ କରି ୨୦୧୮ରୁ ରାଜ୍ୟର ବିଭିନ୍ନ ଜିଲାର ୪୩ ଜଣ ନିବେଶକ ପ୍ରାୟ ୭ କୋଟି ଟଙ୍କା ତାଙ୍କ କମ୍ପାନୀରେ ନିବେଶ କରିଥିଲେ। ଏପରିକି ଜନସାଧାରଣଙ୍କ ଟଙ୍କା ନେବା ଓ ତାହାକୁ ଶେୟାର ମାର୍କେଟରେ ତାଙ୍କ କମ୍ପାନୀ ଦ୍ୱାରା ନିବେଶ କରିବାକୁ ସେମାନେ ‘ଆର୍ବିଆଇ’ ଓ ‘ସେବି’ ଠାରୁ ମଧ୍ୟ ଅନୁମତି ଆଣି ନ ଥିଲେ। ପ୍ରଥମେ ବିଶ୍ୱାସ ଜନ୍ମାଇବାକୁ ସେମାନେ କିଛି ପରିମାଣର ସୁଧ ଦେଇଥିଲେ। ହେଲେ ପରବର୍ତ୍ତୀସମୟରେ ନିବେଶକଙ୍କୁ ଆଉ ଟଙ୍କା ଦେଇ ନ ଥିଲେ। ନିବେଶକମାନେ ଟଙ୍କା ମାଗିବାରୁ ଧମକ ଦେବା ସହ ଆଉ ଧରାଛୁଆଁ ଦେଇ ନ ଥିଲେ। ଏନେଇ କିଛି ନିବେଶକ ଢେଙ୍କାନାଳ ଟାଉନ ଥାନାରେ ସ୍ବାମୀ ଓ ସ୍ତ୍ରୀଙ୍କ ନାମରେ ଅଭିଯୋଗ କରିଥିଲେ। ହେଲେ ଟାଉନ ଥାନା ପୋଲିସ ସେତେବେଳେ କେବଳ ସ୍ବାମୀ ସତ୍ୟରଞ୍ଜନଙ୍କୁ ଗିରଫ କରିଥିବାବେଳେ ପଲ୍ଲବୀଙ୍କୁ ଥାନାରେ ପଚରାଉଚରା କରି ଛାଡ଼ି ଦେଇଥିଲା।
