ଥୁଆମୂଳ ରାମପୁର,୧୮।୮(ଦୁର୍ଗା କୀର୍ତ୍ତି): କଳାହାଣ୍ଡି ଜିଲା ଥୁଆମୂଳ ରାମପୁର ସଦର ମହକୁମାରେ ଆଲୋକୀକରଣ ବ୍ୟବସ୍ଥା ସମ୍ପୂର୍ଣ୍ଣ ବିପର୍ଯ୍ୟସ୍ତ ହୋଇପଡ଼ିଛି। ଗୋଟିଏ ପଟେ ମାନ୍ୟବର ରାଜ୍ୟସଭା MP ସୁଜିତ କୁମାରଙ୍କ ପ୍ରସ୍ତାବକ୍ରମେ ସାଂସଦ ଆଞ୍ଚଳିକ ଉନ୍ନୟନ ପାଣ୍ଠି (MPLADS) ୨୦୨୫-୨୬ ଯୋଜନାରୁ ୧୦ ଲକ୍ଷ ଟଙ୍କା ବ୍ୟୟ ଅଟକଳରେ ସମନ୍ୱିତ ଆଦିବାସୀ ଉନ୍ନୟନ ସଂସ୍ଥା (ITDA) ଦ୍ୱାରା ମାଣିକେଶ୍ୱରୀ ମନ୍ଦିର ନିକଟରେ ନୂତନ ସୌର ହାଇମାକ୍ସ ଲାଇଟ୍ ଯୋଗାଣ ଓ ସ୍ଥାପନ କରାଯାଇଛି। ମାତ୍ର ଏହା କାର୍ଯ୍ୟକ୍ଷମ ହେବା ଦିନଠାରୁ ହିଁ ବିକଳ ଅବସ୍ଥାରେ ରହିଛି। ଏହି ସୋଲାର ଲାଇଟ୍ଟି ନିୟମିତ ନଜଳି କେବେ ଜଳୁଛି ତ କେବେ ସମ୍ପୂର୍ଣ୍ଣ ବନ୍ଦ ରହୁଛି। ସାମାନ୍ୟ ବର୍ଷା ହେଲେ ହିଁ ସୋଲାର ଲାଇଟ୍ କାମ କରୁ ନଥିବାରୁ ଏତେ ବଡ଼ ବ୍ୟୟବହୁଳ ୧୦ ଲକ୍ଷ ଟଙ୍କାର ପ୍ରକଳ୍ପର ସ୍ଥାୟିତ୍ୱ ଓ ନିର୍ମାଣ ମାନକୁ ନେଇ ସାଧାରଣରେ ଗମ୍ଭୀର ପ୍ରଶ୍ନବାଚୀ ସୃଷ୍ଟି ହୋଇଛି।
ମାଣିକେଶ୍ୱରୀ ମନ୍ଦିର ପାଖରେ ପୂର୍ବରୁ ଲଗାଯାଇଥିବା ଆଉ ଏକ ହାଇମାକ୍ସ ଲାଇଟ୍ ମଧ୍ୟ ଦୀର୍ଘ ଦିନରୁ ସମ୍ପୂର୍ଣ୍ଣ ଅକାମୀ ହୋଇ ପଡ଼ିରହିଛି। ଅନ୍ୟପଟେ ସ୍ଥାନୀୟ ଜେ.ଏମ୍.ଏଫ୍.ସି. (JMFC) କୋର୍ଟ ସାମ୍ନାରେ ଥିବା ହାଇମାକ୍ସ ଲାଇଟ୍ଟି ମଧ୍ୟ କେତେକ ମାସ ହେଲା ଅଚଳ ହୋଇପଡ଼ିଛି। ଫଳରେ ରାତ୍ରି ସମୟରେ ଆଇନଜୀବୀ, କୋର୍ଟକୁ ଆସୁଥିବା ସାଧାରଣ ଜନତା ଏବଂ ସ୍ଥାନୀୟ ଲୋକେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି।
ତହସିଲ ଛକଠାରୁ ମାର୍କେଟ୍ ପର୍ଯ୍ୟନ୍ତ ମୁଖ୍ୟ ରାସ୍ତାରେ ରୋଡ୍ ଲାଇଟ୍ ସ୍ଥାପନ ପାଇଁ ସ୍ଥାନୀୟ ଲୋକେ ବାରମ୍ବାର ଦାବି କରିଆସୁଥିଲେ ମଧ୍ୟ ପ୍ରଶାସନ ପକ୍ଷରୁ କୌଣସି ପଦକ୍ଷେପ ନିଆଯାଉନାହିଁ। ଫଳରେ ସଞ୍ଜ ନମାଉଣୁ ପୂରା ଥୁଆମୂଳ ରାମପୁର ବସ୍ତି, କୋର୍ଟ ପରିସର ଓ ମୁଖ୍ୟ ରାସ୍ତା ଘୋର ଅନ୍ଧାରରେ ବୁଡ଼ି ରହୁଛି। ଅନ୍ଧାର ଯୋଗୁ ସାଧାରଣ ଯାତାୟାତରେ ବାଧା ସୃଷ୍ଟି ହେବା ସହ ଦୁର୍ଘଟଣା ଏବଂ ଅପରାଧିକ କାର୍ଯ୍ୟକଳାପ ବୃଦ୍ଧି ପାଇବାର ଭୟ ବଢ଼ିବାରେ ଲାଗିଛି।
ତେଣୁ ପ୍ରଶାସନ ତୁରନ୍ତ ୧୦ ଲକ୍ଷ ଟଙ୍କାର ନୂତନ ସୋଲାର ଲାଇଟ୍ର ତ୍ରୁଟି ସୁଧାରିବା ସହ ଅନ୍ୟ ସମସ୍ତ ଅଚଳ ଲାଇଟ୍ର ମରାମତି ଏବଂ ମୁଖ୍ୟ ରାସ୍ତାରେ ନୂତନ ରୋଡ୍ ଲାଇଟ୍ ଲଗାଇବାକୁ ସ୍ଥାନୀୟ ଅଞ୍ଚଳବାସୀ ଦାବି କରିଛନ୍ତି।
