ଦିଗପହଣ୍ଡି,୨୫।୨(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ଚିକିଟିଆ ସାହିରେ ରହୁଥିବା ଏସ୍.ସତ୍ୟନାରାୟଣ ଦୋରା(୪୩)ଙ୍କ ମୃତଦେହକୁ ବ୍ରହ୍ମପୁର ଶ୍ରୀରାମ ନଗର ନିକଟ ମୁଖ୍ୟରାସ୍ତାରୁ ବୁଧବାର ସକାଳେ ଉଦ୍ଧାର କରାଯାଇଛି। ମଙ୍ଗଳବାର ମଧ୍ୟାହ୍ନରେ ଜ୍ବରରେ ସଂକ୍ରମିତ ହୋଇ ସେ ଗୁରୁତର ହୋଇ ପଡ଼ିଥିଲେ। ପରିବାରଲୋକେ ତାଙ୍କୁ ଦିଗପହଣ୍ଡି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ। ଅବସ୍ଥାରେ ସୁଧାର ନ ଆସିବାରୁ ତାଙ୍କୁ ବ୍ରହ୍ମପୁର ବଡ଼ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ଡାକ୍ତରଖାନା ବେଡ ନଂ.୭୭୦ରେ ତାଙ୍କୁ ଚିକିତ୍ସା କରାଯାଉଥିଲା। ବୁଧବାର ଭୋରରେ ତାଙ୍କ ମା’ ଏସ୍. ଚିଟି ଆମ୍ମା ପାନୀୟଜଳ ଆଣିବା ପାଇଁ ଯାଇଥିବା ବେଳେ ପୁଅ ସତ୍ୟନାରାୟଣ ଡାକ୍ତରଖାନା ବେଡରୁ ଆକସ୍ମିକ ଭାବେ ନିଖୋଜ ହୋଇଯାଇଥିଲେ।
ସତ୍ୟନାରାୟଣଙ୍କ ମା’ ଏବଂ ମାମୁଁ ପି. ଭୀମା ଦୋରା ଆଖପାଖରେ ଖୋଜାଖୋଜି କରିବା ପରେ ମଧ୍ୟ ତାଙ୍କ ସନ୍ଧାନ ମିଳି ନ ଥିଲା। ଏନେଇ ଉଭୟେ ବ୍ରହ୍ମପୁର ଡାକ୍ତରଖାନା ପୋଲିସ ଫାଣ୍ଡିରେ ପହଞ୍ଚି ଉପସ୍ଥିତ ପୋଲିସ କର୍ମଚାରୀଙ୍କୁ ସମସ୍ତ ଘଟଣା ଜଣାଇଥିଲେ। ପରେ ତାଙ୍କ ମୃତଦେହ ଶ୍ରୀରାମ ନଗର ନିକଟ ରାସ୍ତାରେ ପଡ଼ିଥିବା ଖବରପାଇ ସେଠାକୁ ଯାଇ ତାଙ୍କ ମୃତଦେହକୁ ଉଦ୍ଧାର କରି ଦିଗପହଣ୍ଡି ଘରକୁ ନେଇଥିଲେ। ଶୋକାକୂଳ ପରିବେଶ ମଧ୍ୟରେ ଗାଁ ଶ୍ମଶାନରେ ତାଙ୍କ ଅନ୍ତିମ ସଂସ୍କାର କରାଯାଇଛି। ସତ୍ୟନାରାୟଣଙ୍କ ଆକସ୍ମିକ ମୃତ୍ୟୁରେ ତାଙ୍କ ସାଙ୍ଗ ସାଥି ଓ ସହପାଠୀ ମହଲରେ ଗଭୀର ଶୋକ ପ୍ରକାଶ ପାଇଛି।
