ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀ ଆଜି ୬୭ ବର୍ଷରେ ପଦାର୍ପଣ କରିଛନ୍ତି। ସେ ଜାନୁୟାରୀ ୧୯୫୫ରେ ପଶ୍ଚିମବଙ୍ଗର ରାଜଧାନୀ କଲିକତା (ବର୍ତ୍ତମାନ କୋଲକାତା)ର ଏକ ବ୍ରାହ୍ମଣ ପରିବାରରେ ଜନ୍ମଗ୍ରହଣ କରିଥିଲେ। ମମତା ୧୫ ବର୍ଷ ବୟସରେ ଉଚ୍ଚ ମାଧ୍ୟମିକ ପରୀକ୍ଷାରେ ଉତ୍ତୀର୍ଣ୍ଣ ହୋଇଥିଲେ ଏବଂ ସେହି ବର୍ଷ ସେ ମଧ୍ୟ ରାଜନୀତିରେ ପ୍ରବେଶ କରିଥିଲେ। ତାଙ୍କ ପିତା ପ୍ରୋମିଲେଶ୍ୱର ବାନାର୍ଜୀ ଜଣେ ସ୍ବାଧୀନତା ସଂଗ୍ରାମୀ ଥିଲେ। ମମତାଙ୍କୁ ୧୭ ବର୍ଷ ହୋଇଥିବାବେଳେ ଚିକିତ୍ସା ସୁବିଧା ଅଭାବରୁ ତାଙ୍କ ପିତାଙ୍କର ମୃତ୍ୟୁ ହୋଇଥିଲା। ମମତା ବାନାର୍ଜୀଙ୍କ ରାଜନୈତିକ ଯାତ୍ରା ତୃଣମୂଳ ସ୍ତରରୁ ଆରମ୍ଭ ହୋଇ ରାଜ୍ୟର ମୁଖ୍ୟମନ୍ତ୍ରୀ ହେବା ପର୍ଯ୍ୟନ୍ତ ସଂଘର୍ଷମୟ ଥିଲା। ଯଦିଓ ମମତା ତାଙ୍କର ସଫଳ ରାଜନୀତି ଏବଂ ସରଳତା ପାଇଁ ବିଖ୍ୟାତ, କିନ୍ତୁ ଦିଦି ନାମରେ ଜଣାଶୁଣା ମମତା ମଧ୍ୟ ସମାନ ଭାବରେ ଜିଦ୍ଖୋର୍, ନିର୍ଭୀକ।
ମମତା ମାତ୍ର ୧୫ ବର୍ଷ ବୟସରୁ ଛାତ୍ର ରାଜନୀତିରେ ସକ୍ରିୟ ଥିଲେ। ଜୁଲାଇ ୧୯୯୩ରେ, ସେ ଯୁବ କଂଗ୍ରେସ ସଭାପତି ଥିବାବେଳେ ରାଜ୍ୟ ସଚିବାଳୟ ରାଇଟର୍ସ ବିଲଡିଂ ଅଭିଯାନରେ ପୋଲିସର ଗୁଳିରେ ୧୩ଜଣ ଯୁବକଙ୍କର ମୃତ୍ୟୁ ଘଟିଥିଲା। ଏହି ପୋଲିସ ଆକ୍ରମଣରେ ମମତା ରାଗି ଯାଇଥିଲେ। କିନ୍ତୁ ତତ୍କାଳୀନ ମୁଖ୍ୟମନ୍ତ୍ରୀ ଜ୍ୟୋତି ବସୁ ଏହି ଆକ୍ରମଣର ଯଥାର୍ଥତା ଦେଇଥିଲେ।
୧୯୯୩ର ପ୍ରାରମ୍ଭ ଦିନରେ ମମତା ନଦିଆ ଜିଲାର ଭିନ୍ନ ଭିନ୍ନ ବଳାତ୍କାର ପୀଡିତାଙ୍କ ସହ ରାଇଟର୍ସ ବିଲଡିଂକୁ ଯାଇ ତତ୍କାଳୀନ ମୁଖ୍ୟମନ୍ତ୍ରୀ ଜ୍ୟୋତି ବସୁଙ୍କୁ ଭେଟିବା ପାଇଁ ତାଙ୍କ ଚାମ୍ବର ଦ୍ୱାର ସମ୍ମୁଖରେ ଏକ ଧାରଣାରେ ବସିଥିଲେ। କେବଳ ରାଜନୈତିକ ସମ୍ପର୍କ ହେତୁ ଅପରାଧୀଙ୍କୁ ଗିରଫ କରାଯାଉ ନାହିଁ ବୋଲି ମମତା ଅଭିଯୋଗ କରିଥିଲେ। ସେ ସେତେବେଳେ କେନ୍ଦ୍ର ମନ୍ତ୍ରୀ ଥିଲେ କିନ୍ତୁ ବସୁ ତାଙ୍କୁ ଭେଟି ନ ଥିଲେ। ମହିଳା ପୋଲିସ ତାଙ୍କୁ ଏବଂ ନୀଡିତାଙ୍କୁ ସିଡ଼ିରୁ ଟାଣି ନେଇ ପୋଲିସ ମୁଖ୍ୟାଳୟ ଲାଲବାଜରକୁ ନେଇ ଯାଇଥିଲେ। ଏହି ସମୟରେ ତାଙ୍କ ଶାଢି ମଧ୍ୟ ଚିରି ଯାଇଥିଲା।
ମମତା ସେହି ଦିନ ସେହି ସ୍ଥାନରେ ଶପଥ ନେଇଥିଲେ ଯେ ସେ ମୁଖ୍ୟମନ୍ତ୍ରୀ ହେବା ପରେ ପୁନର୍ବାର ଏହି କୋଠାକୁ ଯିବେ। ଶେଷରେ, ପ୍ରାୟ ୧୮ବର୍ଷ ପରେ, ୨୦ ମେ ୨୦୧୧ରେ, ସେ ପୁଣିଥରେ ମୁଖ୍ୟମନ୍ତ୍ରୀ ଭାବରେ ଏହି ଐତିହାସିକ ଲାଲ ଭବନରେ ପ୍ରବେଶ କଲେ। କୁହାଯାଏ ଯେ ପୂର୍ବତନ ମୁଖ୍ୟମନ୍ତ୍ରୀ ଜ୍ୟୋତି ବସୁ ମମତାଙ୍କ ରାଜନୀତିରେ ଏତେ ବିରକ୍ତ ହୋଇଥିଲେ ଯେ ସେ ତାଙ୍କ ନାମକୁ ସର୍ବସାଧାରଣରେ ମଧ୍ୟ ନେଉ ନ ଥିଲେ। ଏହା ପରିବର୍ତ୍ତେ, ସେ ସର୍ବଦା ମମତାଙ୍କୁ ‘ସେହି ଲେଡି’ ବୋଲି ସମ୍ବୋଧନ କରୁଥିଲେ।
