ମୁମ୍ବାଇ,୨୦।୪ : ମହେନ୍ଦ୍ର ସିଂ ଧୋନୀଙ୍କ ନେତୃତ୍ୱଶୈଳୀର ଜବାବ ନାହିଁ। ମୁମ୍ବାଇ ପିଚ୍ ଓ ପ୍ରଥମ ବ୍ୟାଟିଂ ଆଉ ତା’ ପରେ ମ୍ୟାଚ୍ ଜିତିବା ବେଶ୍ କଷ୍ଟକର। ଏହା ଧୋନୀଙ୍କ ଦକ୍ଷ ନେତୃତ୍ୱ ବଳରେ ସମ୍ଭବ ହୋଇପାରିଛି। ସୋମବାର ଖେଳାଯାଇଥିବା ମ୍ୟାଚ୍ ପୂର୍ବରୁ କେବଳ ଥରେ ଓ୍ବାଙ୍ଖଡରେ ପ୍ରଥମେ ବ୍ୟାଟିଂ କରିଥିବା ଦଳ ଭାଗରେ ପଡ଼ିଥିଲା ବିଜୟ। ଦୁର୍ଭାଗ୍ୟବଶତଃ ସେଥର ମଧ୍ୟ ରାଜସ୍ଥାନ ରୟାଲ୍ସକୁ ଦେଖିବାକୁ ପଡ଼ିଥିଲା ପରାଜୟର ମୁହଁ। କିନ୍ତୁ ଧୋନୀଙ୍କ ନେତତ୍ୱାଧୀନ ସିଏସ୍କେ ଅତି ସହଜ(୪୪ ରନ୍)ରେ ରାଜସ୍ଥାନକୁ ହରାଇ ଦେଇଛି। ସିଏସ୍କେର ଅଧିନାୟକ ଭାବେ ଏହା ଥିଲା ଧୋନୀଙ୍କ ୨୦୦ତମ ମ୍ୟାଚ୍। ରବୀନ୍ଦ୍ର ଜାଡେଜା ୪ କ୍ୟାଚ୍ ନେବା ସହ ହାତେଇଥିଲେ ୨ ଉଇକେଟ। ବିଜୟ ସହ ଚେନ୍ନାଇ ପଏଣ୍ଟ ଟେବୁଲର ଦ୍ୱିତୀୟ ସ୍ଥାନକୁ ଉନ୍ନୀତ ହୋଇଛି।
ଆମନ୍ତ୍ରଣ ପାଇ ପ୍ରଥମେ ବ୍ୟାଟିଂ କରିଥିବା ଚେନ୍ନାଇ ପୂରା ୨୦ ଓଭରରେ ୯ ଉଇକେଟ ହରାଇ ୧୮୮ ରନ୍ କରିଥିଲା। ଦଳ ପାଇଁ ଫାଫ ଡୁ’ପ୍ଲେସି ୩୩ (୪ ଚୌକା ଓ ୨ ଛକା), ମୋଇନ ଅଲି ୨୬ (୧ ଚୌକା ଓ ୨ ଛକା), ସୁରେଶ ରାଇନା ୧୮ (୧ ଲେଖାଏ ଚୌକା ଓ ଛକା), ଅମ୍ବାତି ରାୟୁଡୁ ୨୭ (୩ ଛକା) ଓ ଡ୍ବେନ ବ୍ରାଭୋ ୨୦ ( ୨ ଚୌକା ଓ ୧ ଛକା) ରନ୍ କରିଥିଲେ। ପ୍ରଥମରୁ ଧିମା ବ୍ୟାଟିଂ ଓ ପରେ ବଡ଼ ଶଟ୍ ମାରିବାକୁ ଉଦ୍ୟମ କରି ବିଫଳ ହୋଇଥିଲେ ଅଧିନାୟକ ଧୋନୀ (୧୮)। ତାଙ୍କ ଇନିଂସରେ ସାମିଲ ଥିଲା ଦୁଇ ଚୌକା। ରାଜସ୍ଥାନ ବୋଲର ପାଇଁ ଉଇକେଟ ନେଇଥିଲେ ଚେତନ ସାକାରିୟା (୩) ଓ କ୍ରିସ ମୋରିସ (୨)। ଜବାବରେ ସିଏସ୍କେର ସ୍ପିନରର୍ସ ଓ ଜାଡେଜାଙ୍କ ଫିଲ୍ଡିଂ ଯୋଗୁ ରାଜସ୍ଥାନ ୯ ଉଇକେଟ ହରାଇ ୧୪୩ ରନ୍ କରିବାକୁ ସକ୍ଷମ ହୋଇଥିଲା। ମୋଇଲ ଅଲିଙ୍କୁ ମିଳିଥିଲା ୩ ସଫଳତା। ଆଉ ଜାଡେଜା ଓ ସାମ କୁରାନ ହାତେଇଥିଲେ ୨ ଲେଖାଏ ଉଇକେଟ। ଅନ୍ୟପକ୍ଷରେ ଜୋସ ବଟଲର(୪୯ ରନ୍ ୫ ଚୌକା ଓ ୨ ଛକା)ଙ୍କ ବ୍ୟତୀତ ଫେଲ୍ ମାରିଥିଲେ ରାଜସ୍ଥାନର ସମସ୍ତ ବ୍ୟାଟ୍ସମ୍ୟାନ।
