ଭୁବନେଶ୍ୱର,୩।୧୦ (ବ୍ୟୁରୋ): ପୁରୀ ଜିଲା ନିମାପଡ଼ା ନିର୍ବାଚନମଣ୍ଡଳୀ ଅନ୍ତର୍ଗତ ୧୧ ନମ୍ବର ଜୋନ୍ର ବିଜେଡି ଜିଲା ପରିଷଦ ସଭ୍ୟ ଧର୍ମେନ୍ଦ୍ର ସାହୁଙ୍କ ଭୁବନେଶ୍ୱରରେ ଆତ୍ମହତ୍ୟା ଘଟଣାକୁ ସପ୍ତାହରୁ ଊର୍ଦ୍ଧ୍ୱ ବିତିଯାଇଥିଲେ ମଧ୍ୟ କମିଶନରେଟ ପୋଲିସ ଏହା ପଛର ରହସ୍ୟ ପାଇପାରୁ ନାହିଁ। ଏ ପରିସ୍ଥିତିରେ ଭାଇରାଲ ହୋଇଥିବା ଧର୍ମେନ୍ଦ୍ର ଓ ଖବରଦାତା ଅକ୍ଷୟ ନାୟକଙ୍କ ବାର୍ତ୍ତାଳାପର ଅଡିଓ କଲ୍ ରେକର୍ଡିଂକୁ ନେଇ ପୋଲିସ ଅନୁସନ୍ଧାନ କରୁଛି। ଧର୍ମେନ୍ଦ୍ର ଉକ୍ତ ଅଡିଓରେ କହୁଛନ୍ତି ‘ଯଦି ମୋର ମୃତ୍ୟୁ ହୁଏ ତା’ ହେଲେ ୪ଜଣ ଦାୟୀ ରହିବେ’। ସେହି ୪ଜଣଙ୍କ ନାମକୁ ମଧ୍ୟ ସେ ଅକ୍ଷୟଙ୍କୁ କହୁଥିବା ଉକ୍ତ ଭାଇରାଲ ଅଡ଼ିଓରେ ରହିଥିବାରୁ ତାହାକୁ ନେଇ ଚର୍ଚ୍ଚା ଲାଗି ରହିଛି। ଏନେଇ ପୋଲିସ ଅକ୍ଷୟଙ୍କୁ ପୂର୍ବରୁ ନୋଟିସ୍ କରିଥିବାବେଳେ ରବିବାର ସେ ଭୁବନେଶ୍ୱର ଡିସିପି ଅଫିସରେ ପହଞ୍ଚତ୍ଥିଲେ। ଏହାପରେ ୩ ଜଣିଆ ପୋଲିସ ଟିମ୍ ତାଙ୍କୁ ଘଣ୍ଟାଏରୁ ଊର୍ଦ୍ଧ୍ୱ ସମୟ ଧରି ପଚରାଉଚରା କରିବା ସହ ବିଭିନ୍ନ ତଥ୍ୟ ହାସଲ କରିଛି। ଏଥିସହ ଉକ୍ତ ଅଡିଓ କଲ୍ ରେକର୍ଡିଂ ଥିବା ତାଙ୍କ ମୋବାଇଲକୁ ପୋଲିସ ଜବତ କରି ଫୋରେନ୍ସିକ୍ ଲାବ୍କୁ ପଠାଇଛି। ପୋଲିସ ଉପରେ ପୂର୍ଣ୍ଣ ଭରସା ରହିଛି। ପୋଲିସ ଏହି ତଦନ୍ତ ପ୍ରକ୍ରିୟାକୁ ଆଗକୁ ନେବ ବୋଲି ଅକ୍ଷୟ ଗଣମାଧ୍ୟମ ଜରିଆରେ କହିଛନ୍ତି।
ଉଲ୍ଲେଖଯୋଗ୍ୟ, ଧଉଳି ଥାନା ଅନ୍ତର୍ଗତ ଶିଶୁପାଳଗଡ଼ ଲକ୍ଷ୍ମୀବିହାର ଅଞ୍ଚଳରେ ଥିବା ବାସଭବନ ଆଗରୁ ସେପ୍ଟେମ୍ବର ୨୪ ସକାଳେ ଝୁଲନ୍ତା ଅବସ୍ଥାରେ ଧର୍ମେନ୍ଦ୍ରଙ୍କ ମୃତଦେହ ମିଳିଥିଲା। ଏହାପରେ ତାଙ୍କର ୨ଟି ମୋବାଇଲକୁ ଅପରାହ୍ନ ୫ଟାରେ ପୋଲିସ ସନ୍ଧାନୀ କୁକୁର ସାହାଯ୍ୟରେ ଘର ନିକଟ ଏକ ପ୍ଲଟରୁ ଠାବ କରିଥିଲା। ଏଥିରେ ଗଣଶିକ୍ଷା ମନ୍ତ୍ରୀଙ୍କ ହାତର ଥିବା ଅଭିଯୋଗ ହେବା ପରେ ମାମଲାକୁ ଗୁରୁତ୍ୱର ସହ ନେଇ ତଦନ୍ତ କରୁଛି ପୋଲିସ।
