ପଟ୍ଟାଙ୍ଗୀ,୨।୪(ଡି.ଏନ.ଏ.): କୋରାପୁଟ ଜିଲା ପଟ୍ଟାଙ୍ଗି ବ୍ଲକ କୋଟିଆ ପଞ୍ଚାୟତର ଫାଟୁସିନେରି ଗ୍ରାମକୁ ଶନିବାର କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଗସ୍ତ କରିଛନ୍ତି। ଏହି ସମୟରେ ସେଠାରେ ଉପସ୍ଥିତ ଆନ୍ଧ୍ର ପୋଲିସକୁ ସେ କଡ଼ା ତାଗିଦ କରିଛନ୍ତି। ନୋ ଆନ୍ଧ୍ର ଓନ୍ଲି ଓଡ଼ିଶା, ଗୋ ବ୍ୟାକ୍ କହି ଆନ୍ଧ୍ର ପୋଲିସକୁ ସୀମାନ୍ତ ଅଞ୍ଚଳ ଛାଡ଼ି ଚାଲିଯିବାକୁ କେନ୍ଦ୍ରମନ୍ତ୍ରୀ ନିର୍ଦ୍ଦେଶ ଦେଇଥିଲେ।
କେନ୍ଦ୍ରମନ୍ତ୍ରୀ ପ୍ରଧାନ ପ୍ରଥମେ ଫାଟୁସିନେରି ଗ୍ରାମରେ ପହଞ୍ଚତ୍ଥିଲେ। ଗ୍ରାମର ପ୍ରାଥମିକ ବିଦ୍ୟାଳୟ ଓ ଅଙ୍ଗନଓ୍ବାଡି କେନ୍ଦ୍ର ପରିଦର୍ଶନକରି ଉପସ୍ଥିତ ଛାତ୍ରୀଛାତ୍ରଙ୍କ ସହ ଆଲୋଚନା କରିଥିଲେ। ସେମାନଙ୍କୁ ଓଡ଼ିଶା ଦିବସର ମହତ୍ତ୍ୱ ସମ୍ପର୍କରେ କେନ୍ଦ୍ରମନ୍ତ୍ରୀ ବୁଝାଇବା ସହ ବନ୍ଦେ ଉତ୍କଳ ଜନନୀ ସଙ୍ଗୀତ ଗାଇଥିଲେ। ଛାତ୍ରୀଛାତ୍ରମାନେ ମଧ୍ୟ ତାଙ୍କ ସହ ସ୍ବର ମିଳାଇଥିଲେ। ବିଦ୍ୟାଳୟରେ କମ୍ ସଂଖ୍ୟାରେ ଛାତ୍ରୀଛାତ୍ର ଉପସ୍ଥିତ ଥିବା ଦେଖି ଏ ସମ୍ପର୍କରେ ସେଠାରେ ଉପସ୍ଥିତ ଅଭିଭାବକ ଓ ଗ୍ରାମବାସୀଙ୍କ ସହ ଆଲୋଚନା କରିଥିଲେ। ଆନ୍ଧ୍ର ସରକାରଙ୍କ ପକ୍ଷରୁ ଛାତ୍ରୀଛାତ୍ରଙ୍କ ପାଠ ପଢ଼ିବା ପାଇଁ ଖାତା, ପେନ୍ , ଆମ୍ବାବାଡି ଯୋଜନାରେ ବାର୍ଷିକ ୧୫ହଜାର ଟଙ୍କା ମିଳୁଛି। ସେଥିଯୋଗୁ ଉକ୍ତ ବ୍ୟବସ୍ଥାକୁ ଗୁରୁତ୍ୱ ଦେଉଛୁ ବୋଲି ଗ୍ରାମବାସୀ କହିିଥିଲେ। ପରେ କେନ୍ଦ୍ରମନ୍ତ୍ରୀ ପ୍ରଧାନ ଗ୍ରାମ ମଣ୍ଡପରେ ଗ୍ରାମବାସୀଙ୍କ ସହ ଆଲୋଚନା କରିଥିଲେ। ଗ୍ରାମର ମହିଳା ଏବଂ ବୃଦ୍ଧାଙ୍କୁ କେନ୍ଦ୍ର ଓ ରାଜ୍ୟ ସରକାରଙ୍କ ପକ୍ଷରୁ କାର୍ଯ୍ୟକାରୀ ହେଉଥିବା ଯୋଜନା ସମ୍ପର୍କରେ ପଚାରି ବୁଝିଥିଲେ। ଏହି ସମୟରେ ହିମାରିକା ବୁଲ୍କି ନାମକ ଜଣେ ବୃଦ୍ଧା ରାଜ୍ୟ ସରକାରଙ୍କ ପକ୍ଷରୁ ମିଳୁଥିବା ବାର୍ଦ୍ଧକ୍ୟ ଭତ୍ତା ୫୦୦ ଟଙ୍କା ପାଇଁ ଆମେ ହଜାରେ ଟଙ୍କା ଖର୍ଚ୍ଚ କରିବାକୁ ପଡୁଛି। ବ୍ଲକ ସଦରସ୍ଥିତ ବ୍ୟାଙ୍କକୁ ଯିବାକୁ ଏହି ଅର୍ଥ ଖର୍ଚ୍ଚ ହେଉଛି। ଏବେ ଗତ ୭ ମାସ ହେଲା ଆମେ ୮ ଜଣ ହିତାଧିକାରୀ ଭତ୍ତା ପାଇବାରୁ ବଞ୍ଚତ୍ତ ହୋଇଛୁ ବୋଲି କେନ୍ଦ୍ରମନ୍ତ୍ରୀ ପ୍ରଧାନଙ୍କ ଦୃଷ୍ଟି ଆକର୍ଷଣ କରିଥିଲେ। ବୃଦ୍ଧା ବୁଲ୍ଲିଙ୍କ ଅଭିଯୋଗକୁ ଗୁରୁତ୍ୱ ଦେଇ ପ୍ରଧାନ ସେଠାରେ ଉପସ୍ଥିତ ଥିବା ଉପଜିଲାପାଳ ବେଣୁଧର ଶବର ଏବଂ ତହସିଲଦାର ଦେବେନ୍ଦ୍ର ସିଂ ଧାରୁଆଙ୍କୁ ଏଥିପ୍ରତି ଦୃଷ୍ଟିଦେବାକୁ ପରାମର୍ଶ ଦେଇଥିଲେ। ବ୍ଲକ ପ୍ରଶାସନ ପକ୍ଷରୁ ଗ୍ରାମରେ ସୋଲାରଚାଳିତ ପାନୀୟ ଜଳ ଯୋଗାଣ ବ୍ୟବସ୍ଥା ହୋଇଛି। ମାତ୍ର ୧ମାସ ନ ପୂରୁଣୁ ଏହା ଖରାପ ହୋଇପଡ଼ିଛି। ଏହାକୁ ସଜାଡ଼ିବା ଲାଗି କେହି ଦୃଷ୍ଟି ଦେଉନାହାନ୍ତି। ପ୍ରଧାନମନ୍ତ୍ରୀ ଆବାସ ଯୋଜନା ଅବା ବିଜୁ ପକ୍କା ଯୋଜନାରେ ଗୃହ ନିର୍ମାଣ ସାରିଲେ ଆମକୁ ଏମ୍ଜିଏନ୍ଆର୍ଇଜିଏସ୍ ମାଧ୍ୟମରେ ଶ୍ରମିକଙ୍କୁ ମିଳିବାକୁ ଥିବା ୧୦୦ ଦିନର ଅର୍ଥ ମିଳୁନାହିଁ। ଏହା ପ୍ରଦାନ କରିବାରେ ଜିଆର୍ଏସ୍ ଆଗ୍ରହ ପ୍ରକାଶ କରୁନାହାନ୍ତି ବୋଲି ଗ୍ରାମବାସୀ ଅଭିଯୋଗ କରିଥିଲେ।
ଫାଟୁସିନେରରେ କାର୍ଯ୍ୟକ୍ରମ ସାରି ପ୍ରଧାନ କୋଟିଆ ଅଭିମୁଖେ ଯିବାବେଳେ ବିଦ୍ୟାଳୟ ନିକଟରେ ଆନ୍ଧ୍ର ସରକାରଙ୍କ ପକ୍ଷରୁ ନିର୍ମାଣ ହୋଇଥିବା ଏକ ବଡ଼ ପାଣିଟାଙ୍କିକୁ ଦେଖି ବିରକ୍ତି ପ୍ରକାଶ କରିଥିଲେ। ଏହି ପାଣିଟାଙ୍କି ନିର୍ମାଣ ନେଇ କିଏ ଅନୁମତି ଦେଇଛି ବୋଲି ଉପଜିଲାପାଳ ଶବର ଏବଂ ଗ୍ରାମବାସୀଙ୍କୁ ପଚାରିଥିଲେ। କୋଟିଆ ପଞ୍ଚାୟତରେ ପହଞ୍ଚତ୍ ଆଶ୍ରମ ବିଦ୍ୟାଳୟ ପରିଦର୍ଶନ କରିଥିଲେ। ପରେ ପଞ୍ଚାୟତ କାର୍ଯ୍ୟାଳୟ ସମ୍ମୁଖରେ ଆୟୋଜିତ ସଭାରେ ଉଦ୍ବୋଧନ ଦେଇଥିଲେ। ମଞ୍ଚରେ ପୂର୍ବତନ ଏମ୍ପି ଜୟରାମ ପାଙ୍ଗୀଙ୍କ ପୁଅ ତଥା ପୂର୍ବତନ ବ୍ଲକ ଅଧ୍ୟକ୍ଷ ଜଗତଜ୍ୟୋତି ପାଙ୍ଗୀ, ତାଙ୍କ ଝିଅ ତଥା କୋଟିଆ ସମିତିସଭ୍ୟା ଅମ୍ବିକା ପାଙ୍ଗୀ ଉପସ୍ଥିତ ଥିଲେ। କେନ୍ଦ୍ରମନ୍ତ୍ରୀ ପ୍ରଧାନଙ୍କ ଏହି ଗସ୍ତ ବେଳେ ନବରଙ୍ଗପୁର ଜିଲା ଉମରକୋଟ ବିଧାୟକ ନିତ୍ୟାନନ୍ଦ ଗଣ୍ଡ, ବଲାଙ୍ଗୀର ଜିଲା ଲୋଇସିଂହା ବିଧାୟକ ମୁକେଶ ମହାଲିଙ୍ଗ, ପୁରୀ ଜିଲା ବ୍ରହ୍ମଗିରି ବିଧାୟକ, ଭଦ୍ରକ ଜିଲା ଧାମନଗର ବିଧାୟକ ସୂର୍ଯ୍ୟବଂଶୀ ସୁରଜ, କୋରାପୁଟ ଜିଲା ଭାଜପା ସଭାପତି ସୁମନ୍ତ ପ୍ରଧାନ, ବରିଷ୍ଠ କାର୍ଯ୍ୟକର୍ତ୍ତା ଗୌତମ ସାମନ୍ତରାୟଙ୍କ ସମେତ ଅନ୍ୟମାନେ ଉପସ୍ଥିତ ଥିଲେ।
